୫ ବର୍ଷରେ ବହିଷ୍କୃତ ହୋଇଛନ୍ତି ୧୫୯ ଜଣ ଦୁର୍ନୀତିଗ୍ରସ୍ତ ସରକାରୀ ଅଧିକାରୀ : ମୁଖ୍ୟମନ୍ତ୍ରୀ
Henamanjaree Swain
ଭୁବନେଶ୍ୱର: ଦୁର୍ନୀତି ବିରୋଧରେ ଏକ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି, ଓଡ଼ିଶା ସରକାର ଦୁର୍ନୀତି ଏବଂ ଆୟ ଠାରୁ ଅଧିକ ସମ୍ପତ୍ତି ସଂଗ୍ରହ ଅଭିଯୋଗରେ ଗତ ପାଞ୍ଚ ବର୍ଷ ମଧ୍ୟରେ ୧୫୯ ଜଣ ସରକାରୀ ଅଧିକାରୀଙ୍କୁ ଚାକିରିରୁ ବହିଷ୍କାର କରିଛନ୍ତି । ସୋମବାର ଓଡ଼ିଶା ବିଧାନସଭାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ସୂଚନା ଦେଇ ଦୁର୍ନୀତି ଏବଂ ଉତ୍ତରଦାୟିତ୍ୱ ପ୍ରତି ସରକାରଙ୍କ କଠୋର ଆଭିମୁଖ୍ୟ ସମ୍ପର୍କରେ ସୂଚନା ପ୍ରଦାନ କରିଛନ୍ତି ।
ବିଧାନସଭାରେ ପ୍ରଦାନ କରାଯାଇଥିବା ସରକାରୀ ତଥ୍ୟ ଅନୁଯାୟୀ, ୧୨୦ ଜଣ ସରକାରୀ ଅଧିକାରୀ ଏବଂ କର୍ମଚାରୀଙ୍କୁ ଚାକିରିରୁ ବହିଷ୍କାର କରାଯାଇଛି । ସେହିପରି ୩୯ ଜଣ ଅଧିକାରୀଙ୍କୁ ଆର୍ଥିକ ଅନିୟମିତତାର ଗୁରୁତର ଅଭିଯୋଗ ପାଇଁ ବାଧ୍ୟତାମୂଳକ ଅବସର ନେବାକୁ ବାଧ୍ୟ କରାଯାଇଛି । ରାଜ୍ୟ ସରକାର ଆୟଠାରୁ ଅଧିକ ସମ୍ପତ୍ତି ସଂଗ୍ରହ କରିଥିବା ଅଭିଯୋଗରେ ଅଭିଯୁକ୍ତ ଅଧିକାରୀମାନଙ୍କଠାରୁ ୫୯.୪୭ କୋଟି ଟଙ୍କାର ବେଆଇନ ସମ୍ପତ୍ତି ଜବତ କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଯେ, ୨୦୧୪ ରୁ ଫେବୃଆରି ୨୦୨୫ ମଧ୍ୟରେ, ସାରା ରାଜ୍ୟରେ ଭିଜିଲାନ୍ସ ବିଭାଗ ୩,୬୨୩ ଗୋଟି ଦୁର୍ନୀତି ସମ୍ପର୍କିତ ମାମଲା ପଞ୍ଜିକୃତ କରିଛି । ଏଥିମଧ୍ୟରୁ ୨,୫୫୩ଗୋଟି ମାମଲାର ସମାଧାନ କରାଯାଇଛି, ଯାହା ଯୋଗୁ ବହୁ ଅପରାଧୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ଦୁର୍ନୀତି ସମ୍ବନ୍ଧୀୟ ଅପରାଧରେ ୯୩୯ଜଣ ଅଧିକାରୀଙ୍କୁ ଦୋଷୀ ସାବ୍ୟସ୍ତ କରାଯାଇଥିବା ବେଳେ ପ୍ରର୍ଯ୍ୟାପ୍ତ ପ୍ରମାଣ ଅଭାବରୁ ୧,୦୫୩ ଜଣ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରାଯାଇଛି । ଓଡ଼ିଶା ବିଧାନସଭାରେ ଏକ ଲିଖିତ ପ୍ରଶ୍ନର ଉତ୍ତରରେ ଏହି ସୂଚନା ପ୍ରଦାନ କରାଯାଇଛି । ରାଜ୍ୟ ସରକାର ପ୍ରଶାସନରେ ସ୍ୱଚ୍ଛତା ଏବଂ ସଚ୍ଚୋଟତା ବଜାୟ ରଖିବା ପାଇଁ ତାଙ୍କର ପ୍ରତିବଦ୍ଧତାକୁ ପୁନଃ ଦୋହରାଇଛନ୍ତି । ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ ଦ୍ୱାରା ପ୍ରଶାସନରୁ ଅସାଧୁ ଅଧିକାରୀମାନଙ୍କୁ ବାହାର କରିବା ଏବଂ ଜନସାଧାରଣଙ୍କ ବିଶ୍ୱାସକୁ ବଜାୟ ରଖିବାର ବ୍ୟାପକ ପ୍ରୟାସର ଏହା ଏକ ଅଂଶ ।
