ସ୍ପଷ୍ଟୀକରଣ ଲୋଡ଼ିଲା ବିଜେଡ଼ି
Biju Janata Dal
Ramachandi Prasad
ଭୁବନେଶ୍ୱର : ତିନୋଟି ପ୍ରସଙ୍ଗରେ ବାଚସ୍ପତିଙ୍କ ଠାରୁ ସ୍ପଷ୍ଟୀକରଣ ଲୋଡ଼ିଛି ବିଜୁ ଜନତା ଦଳ । ଆଜି ଶୂନ୍ୟକାଳରେ ବିଜେଡ଼ି ବିଧାୟକ ପ୍ରତାପ କେଶରୀ ଦେବ କହିଥିଲେଯେ, ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଗିରଫ କରିବା ପାଇଁ ମନ୍ତ୍ରୀ କହିଥିଲେ । ଏହାକୁ ବିବରଣୀରୁ ବାଦ୍ ଦେବାକୁ ବିଜେଡ଼ି ପକ୍ଷରୁ ଦାବି କରାଯାଇଥିଲା । ବାଚସ୍ପତି ଏନେଇ ଜଣାଇବେ ବୋଲି କହିଥିଲେବି ଏଯାଏଁ କୌଣସି ନିଷ୍ପତ୍ତି ନେଇନାହାନ୍ତି ।
ସେହିପରି ରାଜ୍ୟପାଳଙ୍କ ପୁଅ ମାଡ଼ ମାରିବା ପ୍ରସଙ୍ଗରେ ୧୫ ଦିନରେ ଜିଲ୍ଲାପାଳ ରିପୋର୍ଟ ଦେବେବୋଲି ଆଇନ୍ ମନ୍ତ୍ରୀ କହିଥିଲେ । କିନ୍ତୁ ଏଯାଏଁ ରିପୋର୍ଟ ଆସିଲାନି କାହିଁକି ବୋଲି ସେ ପ୍ରଶ୍ନ କରିଥିଲେ । ଏହାଛଡ଼ା ମୁଖ୍ୟମନ୍ତ୍ରୀ ଅଗ୍ନିବୀରଙ୍କ ନିଯୁକ୍ତି ପ୍ରସଙ୍ଗରେ ଗୃହ ବାହାରେ ଘୋଷଣା କରିଥିଲେ । ଗୃହ ଚାଲିବା ବେଳେ ବାହାରେ କିଛି ଘୋଷଣା କରିବା କଥା ନୁହେଁ । ଏନେଇ ଆମେ ସ୍ୱାଧିକାର ଭଙ୍ଗ ପ୍ରସ୍ତାବ ବି ଆଣିଥିଲୁ । ଏହି ତିନି ପ୍ରସଙ୍ଗ ଉପରେ ସେ ବାଚସ୍ପତିଙ୍କ ଠାରୁ ସ୍ପଷ୍ଟୀକରଣ ଲୋଡ଼ିଥିଲେ । ତେବେ ପରେ ସେ ଏନେଇ କହିବେ ବୋଲି ବାଚସ୍ପତି ସୁରମା ପାଢ଼ୀ କହିଥିଲେ ।
