ନବୀନଙ୍କୁ ‘କଟାକ୍ଷ’ ଯନ୍ତ୍ରଣା

ଇଲେଇତି କଲେ ଶାରଦା ଓ ଜୟ 

ଭୁବନେଶ୍ୱର : ଗାଁରେ ଗୋଟିଏ ଲୋକପ୍ରିୟ ଲୋକକଥା ଶୁଣିବାକୁ ମିଳେ  । ରାବଣ ମରିକି ପଡ଼ିଥାଏ  । ରାମ ପଚାରିଲେ ମୋ ତୀରଟା ଟିକେ ଜୋରରେ ବାଜିଛି  । କଷ୍ଟ ହେଉଥିବ  । ରାବଣ କହିଲେ, ତମ ତୀର ଯେତିକି ଯନ୍ତ୍ରଣା ନଦେଉଛି, ତା’ଠୁ ବେଶୀ କଷ୍ଟ ଦେଉଛି ସେ ମାଙ୍କଡ଼ଗୁଡ଼ା ଯେଉଁ ଖତେଇ ହେଉଛନ୍ତି... ଅର୍ଥାତ୍‌ ରାବଣକୁ ପରାସ୍ତ କରିବା ପରେ ବାନରସେନା ଉତ୍ସବମୁଖର ହୋଇ ଯାଇଥିଲେ  । ଏବେ ଠିକ୍‌ ସମାନ କଥା ବିଜେଡ଼ି ଓ ନବୀନଙ୍କ କ୍ଷେତ୍ରରେ ପରିଲକ୍ଷିତ ହେଉଛି  । ଚବିଶ ନିର୍ବାଚନ ଦରଜ ନବୀନଙ୍କୁ ଯେତିକି କଷ୍ଟଦେଉନି, ନିଜ ଦଳ ତଥା ବିଜେପି ଓ କଂଗ୍ରେସ ନେତାଙ୍କ କଟାକ୍ଷ ସେତିକି ଯନ୍ତ୍ରଣା ଦେଉଛି  ।

ଏକଦା ନବୀନଙ୍କର ଅତି ପ୍ରିୟ ଥିବା ପ୍ରସନ୍ନ ପାଟ୍ଟଶାଣୀ ବିଜେଡ଼ିକୁ ଭର୍ତ୍ସନା କରିଛନ୍ତି  । ନବୀନଙ୍କ ଆତ୍ମା ବୋଲି ରାଜନୀତିକ ମହଲରେ ଚର୍ଚ୍ଚିତ ପାଣ୍ଡିଆନଙ୍କ ପ୍ରତି ବି କଡ଼ା ଟିପ୍ପଣୀ ଦେଇଛନ୍ତି  । ସେହିପରି ପୁରୁଖା ନେତା ଅମର ପ୍ରସାଦ ଶତପଥି ମଧ୍ୟ ସିଧାସଳଖ ତାଙ୍କ ପ୍ରଶ୍ନର ଉତ୍ତର ଦେବାକୁ ବିଜେଡ଼ି ସଭାପତିଙ୍କୁ ଆହ୍ୱାନ ଦେଇଛନ୍ତି  । ଖାଲି ସେତିକିନୁହେଁ ଭୁବନେଶ୍ୱରରୁ ନେଇ ବ୍ରହ୍ମପୁର ଯାଏଁ ବିଜେଡ଼ି ନେତାଙ୍କ ମଧ୍ୟରେ ହେଉଥିବା କନ୍ଦଳ ନବୀନଙ୍କ କ୍ଷତକୁ ଆହୁରି ବିଦାରି ଦେଉଛି  । 

ଆଜି କଟାଘା’ରେ ମାହାଙ୍ଗା ବିଧାୟକ ଶାରଦା ପ୍ରଧାନ ଓ ଜୟ ନାରାୟଣ ମିଶ୍ର ବି ଚୁନ ମାରିଛନ୍ତି  । ବରିଷ୍ଠ ବିଜେପି ନେତା ଜୟନାରାୟଣ ମିଶ୍ର ବିଜେଡ଼ିକୁ କଟାକ୍ଷ କରି କହିଛନ୍ତିଯେ, ବିଜେଡ଼ି ନେତାମାନଙ୍କୁ ଚାକର ଭଳି ରଖିଥିଲା  । ଏବେ ସେମାନେ ପ୍ରତିଶୋଧ ମୁଡ୍‌କୁ ଆସି ଯାଇଛନ୍ତି  । ନେତାମାନେ ଗାତ ଖୋଳିଲେ, ଦରି ପାରିଲେ, ଟେଣ୍ଟ ବାନ୍ଧିଲେ, ଚେୟାର ବୋହିଲେ  । ବିଜେଡ଼ିର ଆୟୁଷ ଖୁବ୍‌ କମ୍‌  । ଖୁବଶୀଘ୍ର ବିଜେଡ଼ି ଖିନଭିନ ହୋଇଯିବ  । ସେ ଦଳ ଆଉ ରହିବ ନାହିଁ  । ସେହିପରି ବିଜେଡ଼ି ପାଖରେ ଆଉ ନେତୃତ୍ୱ ନାହିଁ  । ଅନେକ ନେତା ବିଜେପି ସହ ଯୋଗସୂତ୍ରରେ ରହିଛନ୍ତି  । ବହୁ ଜଲଦି ବିଜେଡ଼ି ଭାଙ୍ଗି ଛିନ୍ନଛତ୍ର ହୋଇଯିବ  । ବିଜେଡ଼ିର ବହୁ ନେତାଙ୍କ ଦୁର୍ନୀତି କଥା ବି ବିଚାର ହେବବୋଲି ସେ ଚେତାବନୀ ଦେଇଛନ୍ତି  ।

ଅପରପକ୍ଷରେ ମାହାଙ୍ଗା ବିଧାୟକ ଶାରଦା ପ୍ରଧାନଙ୍କ ବାକ୍‌ସ୍ଫୋଟ ଆଜିକାଲି ଢେ଼ର ଚର୍ଚ୍ଚାରେ ରହିଛି  । ନିକଟରେ ସେ ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସଂତୃପ୍ତ ମିଶ୍ରଙ୍କୁ ଧୋଇଛନ୍ତି  । କେଉଁ ଏକ ପ୍ରସଙ୍ଗରେ ସଂତୃପ୍ତ କହିଥିଲେଯେ, ବିଜେପି ଗାଡ଼ି ଲଗାଇ ଲୋକ ନେଉଛି  । ଏହାର ଜବାବରେ ଶାରଦା କହିଛନ୍ତି, ବିଜେପି ଯଦି ଗାଡ଼ିରେ ନେଉଛି, ବିଜେଡ଼ି କ’ଣ ରେଳରେ ଲୋକଙ୍କୁ ନେଉଥିଲା ? ଖାଲି ସେତିକିନୁହେଁ ସଂତୃପ୍ତ ଜଣେ ରାଜନୈତିକ ବ୍ୟକ୍ତି ନୁହଁନ୍ତି  । ସେ ଯେଉଁ ହିସାବରେ ବିଜେଡ଼ିର ପ୍ରାର୍ଥୀ ହେଲେ ବିଜେପିକୁ ସେଭଳି ଭାବନ୍ତୁ ନାହିଁ  । ବିଜେପି ହେଉଛି ଏକ ବିଚାରଧାରାର ଦଳ  । ବିଜେଡ଼ି ଓ ବିଜେପି ମଧ୍ୟରେ ଆକାଶ ପାତାଳ ଫରକ ରହିଛି  । ସେ ଯୋଗ୍ୟ କି ଅଯୋଗ୍ୟ କଟକବାସୀ ତାହାର ନିଷ୍ପତ୍ତି ନେଇସାରିଛନ୍ତି  । ବିଜେଡ଼ିରେ ନବୀନ ବାବୁଙ୍କର କ୍ରେଜ୍‌ ରହିଛି  । ଦଳର କର୍ମୀଙ୍କ ନିକଟରେ ନବୀନ ନମ୍ବର ୱାନ୍‌ ବୋଲି କହିଛନ୍ତି  ।

ଖାଲି ସେତିକିନୁହେଁ, କଂଗ୍ରେସ ନେତା ମହମ୍ମଦ ମୋକିମ୍‌ ବି ବିଜେଡ଼ିକୁ ଛାଡ଼ିଲେନି  । ପୂର୍ବରୁ ସେ ଦେବାଶିଷ ସାମନ୍ତରାୟଙ୍କ କଂଗ୍ରେସ-ବିଜେଡ଼ି ମେଣ୍ଟ ପ୍ରସଙ୍ଗରେ ଟାର୍ଗେଟ୍‌ କରିଥିଲେ  । ଆଜି ସେ କହିଛନ୍ତି କଂଗ୍ରେସ ସହ ବିଜେଡ଼ି ଓ ବିଜେପିର ଅନେକ ନେତା ଯୋଗସୂତ୍ରରେ ରହିଛନ୍ତି  । ବିଶେଷକରି ବିଜେଡ଼ିର ବହୁ ନେତା ଯୋଗାଯୋଗରେ ଅଛନ୍ତି  । ପିସିସି ସଭାପତି ଚୟନ ପରେ ସେମାନେ କଂଗ୍ରେସକୁ ଆସିବେ ବୋଲି ମୋକିମ୍‌ କହିଛନ୍ତି  ।