ପୁଅଙ୍କ ପାଇଁ ଅଣ୍ଟା ଭିଡ଼ିଲେ ବାପା

ଭୁବନେଶ୍ୱର : ‘ଆଗରୁ ମୋତେ ଭୋଟ ଦେଉଥିଲେ  । ଏଥର ମୋ ପୁଅ ଆପଣଙ୍କୁ ଲାଗିଲା  ।’ ପୁଅଙ୍କ ପାଇଁ ପ୍ରଚାର ମଙ୍ଗ ଧରି ଏମିତି ନିବେଦନ କରୁଛନ୍ତି ବାପା  । ପ୍ରଚାର ଜୋରଦାର ଆରମ୍ଭ ହୋଇଯାଇଥିବାବେଳେ ଏବେ ରାଜନେତାମାନେ ପିଲାଙ୍କୁ ଜିତାଇବା ପାଇଁ ଦିନରାତି ଏକ କରିଦେଇଛନ୍ତି  । ଏମିତିକି ପୁଅ ପ୍ରାର୍ଥୀ ହୋଇଥିଲେବି ବାପାଙ୍କ ଆଖିରୁ ନିଦ ହଜିଯାଇଛି  । 

ବରିଷ୍ଠ ନେତା ବିଜୟ ମହାପାତ୍ର ୨୦୦୦ରୁ ବିଧାନସଭା ମାଟି ମାଡ଼ି ପାରିନାହାନ୍ତି  । ଏଥର କିନ୍ତୁ ତାଙ୍କ ପୁଅ ଅରବିନ୍ଦ ବିଜେଡ଼ିରେ  । ନିଜର ପୁରୁଣାଗଡ଼ ପାଟକୁରାରୁ ନିର୍ବାଚନ ଲଢୁଛନ୍ତି  । ଅନେକ ବର୍ଷ ପରେ ବିଜୟର ସ୍ୱାଦ ଚାଖିବା ପାଇଁ ବିଜୟ ଏବେ ପାଟକୁରାର ପ୍ରତି ପଞ୍ଚାୟତ ନେତାଙ୍କ ସହ କଥା ହେଉଛନ୍ତି  । ପୁରୁଣା ତିକ୍ତତାକୁ ଭୁଲି ଅତନୁ ସବ୍ୟସାଚୀ ନାୟକଙ୍କ ସହ ଏକାଠି ବସି ଆଲୋଚନା ମଧ୍ୟ କରୁଛନ୍ତି  । ମାହାଙ୍ଗା ବିଧାୟକ ପ୍ରତାପ ଜେନା ଏଥର ଟିକେଟ ପାଇବା ନିଶ୍ଚିତ ଥିଲା  । କିନ୍ତୁ କୋର୍ଟରେ ମାମଲା ଥିବାବେଳେ ସେ କେତେକ ପ୍ରସଙ୍ଗରେ ବିବାଦୀୟ ହୋଇଯାଇଛନ୍ତି  । ତେଣୁ ତାଙ୍କ ପୁଅ ଅଙ୍କିତଙ୍କୁ ବିଜେଡ଼ି ଟିକେଟ ଦେଇଛି  । ପୁଅ ପ୍ରଥମ ଥର ପାଇଁ ନିର୍ବାଚନ ଲଢିବାକୁ ଯାଉଥିବାବେଳେ ତାଙ୍କୁ ଜିତାଇବା ପାଇଁ ସେ ହିଁ ବ୍ଳୁପ୍ରିଣ୍ଟ ପ୍ରସ୍ତୁତ କରିଛନ୍ତି  ।

ବଲାଙ୍ଗୀରରୁ ଦୁଇ ଦୁଇ ଥର ରାଜ ପରିବାରକୁ ମାତ୍‌ ଦେଇ ରେକଡର଼୍ କରିଛନ୍ତି ନରସିଂହ ମିଶ୍ର  । ବୟସାଧିକ୍ୟ କାରଣରୁ ସେ ଏଥର ପୁଅ ସମରେନ୍ଦ୍ରଙ୍କୁ ବାଟ ଛାଡ଼ିଛନ୍ତି  । ରାଜ ପରିବାର ସହ ପୁଣି ଥରେ ତାଙ୍କର ମୁହାଁମୁହିଁ ହେବ  । ଯେଉଁଥିପାଇଁ ନରସିଂହ ଏବେ ବଲାଙ୍ଗୀରରେ ବସି ପୁଅ ପାଇଁ ଗୋଟି ଚଳାଇବା ଆରମ୍ଭ କରିଦେଇଛନ୍ତି  । କଳାହାଣ୍ଡି ସାଂସଦ ବସନ୍ତ ପଣ୍ଡା ଚବିଶ ନିର୍ବାଚନ ଲଢ଼ିବେ ନାହିଁ  । ତାଙ୍କ ପୁଅ ଅଭିନନ୍ଦନଙ୍କୁ ନୂଆପଡ଼ାରୁ ବିଜେପି ପ୍ରାର୍ଥୀ କରିଛି  । ପୂର୍ବରୁ ବସନ୍ତ ନୂଆପଡ଼ାରୁ ବିଧାୟକ ହୋଇଥିବାରୁ ସେ ହିଁ ପୁଅର ବିଜୟ ଭାର କାନ୍ଧକୁ ନେଇଛନ୍ତି  । ଜର୍ଜ ତିର୍କୀ ଓ ତାଙ୍କ ପୁଅ ରୋହିତ ଯୋଶେଫ ତିର୍କୀ ଗତ ନିର୍ବାଚନରେ ହାରି ଯାଇଥିଲେ  । ଏଥର କିନ୍ତୁ ତାଙ୍କ ପୁଅକୁ ବିଜେଡ଼ି ଟିକେଟ ଦେଇଛି  । ପଲା ଭାରି ଥିବାରୁ ପ୍ରଥମ ଥର ପାଇଁ ପୁଅର ବିଧାନସଭା ପ୍ରବେଶ ପାଇଁ ଜର୍ଜ ବି କୌଣସି ସୁଯୋଗ ହାତଛଡ଼ା କରୁନାହାନ୍ତି  ।

ଟାଣୁଆ ଆଦିବାସୀ ନେତା ମଙ୍ଗଳା କିଷାନଙ୍କ ପୁଅ ଅନୀଲ ବରୁଆ ଏଥର ନିର୍ବାଚନ ଲଢୁଛନ୍ତି । ତେଣୁ ନିଜ ରାଜନୀତିକ ଅଭିଜ୍ଞତା ଆଧାରରେ ପୁଅଙ୍କୁ ଜିତାଇବା ପାଇଁ ସେ ବି ଲାଗି ପଡ଼ିଛନ୍ତି  । ଏଥର କଳାହାଣ୍ଡିରେ ବାପା ଓ ପୁଅ ନିର୍ବାଚନ ମଇଦାନକୁ ଓହ୍ଲାଇଛନ୍ତି  । ଭକ୍ତଚରଣ ଦାସ ନର୍ଲାରେ ଲଢିବାର ଥିବାବେଳେ ପୁଅ ସାଗର ଚରଣ ଦାସ ପୁଣି ଭବାନୀପାଟଣାରୁ ନିର୍ବାଚନ ଲଢିବେ  । ଭକ୍ତ ଉଭୟ ନର୍ଲା ଓ ଭବାନୀପାଟଣା ପାଇଁ ରଣନୀତି ପ୍ରସ୍ତୁତି କରୁଛନ୍ତି  । ଚିକିଟି ରାଣୀ ଉଷାଦେବୀଙ୍କର ରାଜନୀତିକ କ୍ୟାରିୟର ବହୁତ ଲମ୍ବା  । ବହୁବାର ବିଧାୟିକା ଓ ମନ୍ତ୍ରୀ ହେବାର ସେ ସୁଯୋଗ ପାଇଛନ୍ତି  । ଏଥର ସେ ଆଉ ନିର୍ବାଚନ ନଲଢ଼ି ପୁଅ ଚିନ୍ମୟାନନ୍ଦ ଶ୍ରୀରୂପ ଦେବଙ୍କୁ ବାଟ ଛାଡ଼ିଛନ୍ତି  । ପୁଅ ଲଢୁଥିଲେ ବି ମାଆ ହିଁ ତାଙ୍କ ପାଇଁ ରଣନୀତି କରୁଛନ୍ତି  । କଂଗ୍ରେସ ନେତା ଭୁଜବଳ ମାଝୀ ଓ ତାଙ୍କ ଝିଅ ଡାକ୍ତର ଲିପିକା ମାଝୀଙ୍କୁ ଏଥର କଂଗ୍ରେସ ଟିକେଟ ଦେଇଛି  । ଭୁଜବଳ ନିଜ ନବରଙ୍ଗପୁର ଲୋକସଭା ଆସନ ଅପେକ୍ଷା ଝିଅ ଲିପିକାଙ୍କୁ ଡାବୁଗାଁରେ ଜିତାଇବା ପାଇଁ ବେଶୀ ଉଦ୍ୟମ କରୁଥିବା ଦେଖିବାକୁ ମିଳୁଛି  ।