ଆମେରିକାରେ ନେହାଲ ମୋଦି ଗିରଫ
Rasmita Behera
ନୂଆଦିଲ୍ଲୀ: ହଜାର ହଜାର କୋଟିର ଋଣ କରି ଦେଶ ଛାଡ଼ି ପଳାଇ ଯାଇଥିବା ନୀରବ ମୋଦିର ଭାଇ ନେହାଲ ମୋଦିକୁ ଗିରଫ କରାଯାଇଛି । ପଞ୍ଜାବ ନାସନାଲ ବ୍ୟାଙ୍କରୁ କୋଟି କୋଟି ଋଣ କରିଥିବା ଅଭିଯୋଗରେ ଆମେରିକାରେ ତାକୁ ଗିରଫ କରାଯାଇଛି । ନେହାଲକୁ ଗିରଫ କରିବା ପାଇଁ ଭାରତ ପକ୍ଷରୁ ଆମେରିକାକୁ ଅନୁରୋଧ କରାଯାଇଥିଲା । ଆମେରିକାର ଜଷ୍ଟିସ୍ ବିଭାଗର ସୂଚନା ଅନୁଯାୟୀ, ନେହାଲ ମୋଦି ବେଲଜିୟମର ନାଗରିକତ୍ୱ ଗ୍ରହଣ କରିଛନ୍ତି । ଜୁଲାଇ ୪ରେ ପୁଲିସ୍ ତାକୁ ଗିରଫ କରିଛି । ଟଙ୍କା ହେରଫେର ଓ ପ୍ରମାଣ ନଷ୍ଟ ଭଳି ସଂଗୀନ ଦଫା ବି ଲାଗିଛି ।
ସୂଚନାଯୋଗ୍ୟଯେ, ନୀରବ ମୋଦି, ମେହୁଲ ଚୋସ୍କି ଓ ନେହାଲକୁ ସିବିଆଇ ଜେରା କରିବାକୁ ଚାହୁଁଛି । ଜାଲ୍ କାଗଜପତ୍ର ଜରିଆରେ ପିଏନବିରୁ ସେମାନେ ୧୩୫୦୦ କୋଟି ଟଙ୍କାର ଋଣ ନେଇଥିଲେ । ପରିଶୋଧ ନକରି ସେମାନେ ଦେଶ ଛାଡ଼ି ପଳାଇ ଯାଇଛନ୍ତି । ନୀରବ ଏବେ ଲଣ୍ଡନ ଜେଲ୍ରେ ଅଛି । ତାକୁ ପ୍ରତ୍ୟର୍ପଣ କରିବା ପାଇଁ ବ୍ରିଟେନ୍ ହାଇକୋର୍ଟ ଅନୁମତି ଦେଇସାରିଛନ୍ତି । ତେବେ ନୀରବ ବାରବାର ଅପିଲ୍ କରୁଥିବାରୁ ଏହି ପ୍ରକ୍ରିୟା ବିଳମ୍ବିତ ହୋଇଛି । ଅପରପକ୍ଷରେ ବେଲଜିୟମ୍ରେ ଚୋକ୍ସିକୁ ମଧ୍ୟ ଗିରଫ କରାଯାଇଥିଲା । ୨୦୧୮ରେ ସେ ଦେଶ ଛାଡ଼ି ଆଣ୍ଟିଗୁଆ ଓ ବରଗୁଡ଼ାରେ ଲୁଚି ରହିଥିଲା । ଏମିତିକି ସେଠାକାର ନାଗରିକତ୍ୱ ବି ହାସଲ କରିନେଇଥିଲା ।
ସେପଟେ ଇଡ଼ି ଓ ସିବିଆଇ ପକ୍ଷରୁ କୁହାଯାଇଛିଯେ, ନୀରବ ମୋଦିର ଋଣ ଠକେଇରେ ନେହାଲ ପ୍ରମୁଖ ଭୂମିକା ଗ୍ରହଣ କରିଥିଲା । ଜାଲ୍ କମ୍ପାନୀ ଜରିଆରେ ନେହାଲ ଋଣ ଅର୍ଥକୁ ନେଇ ଯାଇଥିଲା । ନୀରବ ମୋଦିର ପ୍ରତ୍ୟର୍ପଣର ଶୁଣାଣୀ ଜୁଲାଇ ୧୭ରେ ହେବାର ଅଛି । ସେପଟେ ନେହାଲ ଜାମିନ୍ ଆବେଦନ କରିବାର ଥିବାବେଳେ ସ୍ଥାନୀୟ ପ୍ରଶାସନ ପକ୍ଷରୁ ଏହାର ବିରୋଧ କରାଯିବ । ନେହାଲକୁ ମଧ୍ୟ ପ୍ରତ୍ୟର୍ପଣ ପାଇଁ ଭାରତ ଆମେରିକାକୁ ଅନୁରୋଧ କରିବ ବୋଲି ଜାଣିବାକୁ ମିଳିଛି ।
