ରାହୁଲଙ୍କୁ ‘ନମୁନା’ କହିଲେ ଆଦିତ୍ୟନାଥ : ଜବାବ ଦେଲା କଂଗ୍ରେସ
Rasmita Behera
କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ତଞ୍ଜ କସିଲେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ରାହୁଲଙ୍କୁ ନମୁନା ବୋଲି କହିବା ସହ, ଭାରତୀୟ ରାଜନୀତିରେ ଏବଂ ଭାରତୀୟ ଜନତା ପାର୍ଟିରେ ରାହୁଲଙ୍କ ପରି କିଛି ନମୁନା ରହିବା ଦରକାର ବୋଲି କହିଛନ୍ତି ଯୋଗୀ ଆଦିତ୍ୟନାଥ । ଏକ ଜାତୀୟ ଖବର ସରବରାହ ସଂସ୍ଥାକୁ ଇଣ୍ଟରଭ୍ୟୁ ଦେଇ ଯୋଗୀ ଭାରତ ଯୋଡୋ ଯାତ୍ରାକୁ ଟାର୍ଗେଟ୍ କରିଛନ୍ତି । ସେ କହିଛନ୍ତି, ଲୋକମାନେ ଏହି ଯାତ୍ରାକୁ ଭାରତ ତୋଡୋ ଯାତ୍ରା ଜାଣିବା ପରେ, ଏହାକୁ ଖାରଜ କରିଛନ୍ତି । ଭାରତ ଯୋଡୋ ଯାତ୍ରା, ଭାରତ ତୋଡୋ ଅଭିଯାନର ଅଂଶ ଥିଲା । ସେ ଭାରତ ବିଷୟରେ ଭାରତ ବାହାରେ ଆଲୋଚନା କରୁଛନ୍ତି । ତେଣୁ ଦେଶ ତାଙ୍କର ଏହି ସ୍ୱଭାବ ଏବଂ ଉଦ୍ଦେଶ୍ୟକୁ ବୁଝିସାରିଛି । ତେବେ ଭାରତୀୟ ଜନତା ପାର୍ଟି ପାଇଁ ରାହୁଲ ଗାନ୍ଧୀଙ୍କ ପରି କିଛି ନମୁନା ରହିବା ଆବଶ୍ୟକ ବୋଲି କହିଛନ୍ତି ଯୋଗୀ ।
ମୁଖ୍ୟମନ୍ତ୍ରୀ ଯୋଗୀଙ୍କ ବୟାନ ଉପରେ କଂଗ୍ରେସ ଅସନ୍ତୋଷ ପ୍ରକାଶ କରିଛି । ୟୁପି କଂଗ୍ରେସ ସଭାପତି ଅଜୟ ରାୟ କହିଛନ୍ତି, ଯଦି ଆମେ ସବୁଠାରୁ ବଡ଼ ନମୁନା ଦେଖିବା, ତେବେ ସେ ହେଉଛନ୍ତି ଯୋଗୀ। ଯୋଗୀଙ୍କ ଠାରୁ ବଡ଼ ନମୁନା ଆଉ କେହି ଅଛି କି? କେବଳ ମିଛ କହିବା ଏବଂ ବାରମ୍ବାର ମିଛ କହିବା... ଲୋକଙ୍କ ଭିତରେ ହିନ୍ଦୁ ଏବଂ ମୁସଲମାନମାନଙ୍କ ବିଷୟରେ କହିବା ତାଙ୍କ କାମ । କଂଗ୍ରେସ ଏବଂ ରାହୁଲ ଗାନ୍ଧୀ ଲୋକଙ୍କ ଭବିଷ୍ୟତକୁ ଭଲ କରିଛନ୍ତି, ଲୋକଙ୍କୁ ଆଗକୁ ନେଇଛନ୍ତି । ଆଜିର ଦିନରେ ଥିବା ସମସ୍ତ ଅନୁଷ୍ଠାନ କଂଗ୍ରେସ ଲୋକଙ୍କ ଦ୍ୱାରା ସୃଷ୍ଟି ହୋଇଛି । ଆଉ ରାହୁଲ ଗାନ୍ଧୀ ହେଉଛନ୍ତି ଦେଶର ସବୁଠାରୁ ଶକ୍ତିଶାଳୀ ଏବଂ ସବୁଠାରୁ ବିଦ୍ୱାନ ନେତା । ସେ ଜଣେ ପ୍ରଗତିଶୀଳ ନେତା। ତାଙ୍କର ଚିନ୍ତାଧାରା ହେଉଛି ଦେଶକୁ ଆଗକୁ ନେବା ଏବଂ ଏହାକୁ ସୁଦୃଢ଼ କରିବା ।
