ଲିଙ୍ଗରାଜ ମନ୍ଦିରରେ ପାସ୍ ହେରାଫେରି : ଚଢ଼ା ଦରରେ ବିକ୍ରି ହେଲା ଜାଗର ଦର୍ଶନ ପାସ
Rasmita Behera
ପାସ ଦେଖାଅ ଭିତରକୁ ଯାଅ । ପାସ ନହେଲେ ଲିଙ୍ଗରାଜ ମନ୍ଦିର ଭିତରକୁ ପ୍ରବେଶ ମନା । ଏମିତି ନିୟମ ଜାରି କରିଥିଲା ପୋଲିସ ପ୍ରଶାସନ । ଲିଙ୍ଗରାଜ ମନ୍ଦିରର ଦକ୍ଷିଣ ଦ୍ୱାର ଖୋଲା ଥିଲା ଭିଆଇପିଙ୍କ ପ୍ରବେଶ ପାଇଁ । ସାଥିରେ ଭିଆଇପି ପାସ ଆଣିଲେ ହିଁ ଭିତରକୁ ଛାଡୁଥିଲେ ପୋଲିସ ବାବୁ । କିନ୍ତୁ ଦକ୍ଷିଣ ଦ୍ୱାର ବାହାରେ ଭିଆଇପି ପାସର ହେଉଥିଲା ହେରଫେର । ଶ୍ରଦ୍ଧାଳୁଙ୍କୁ ପାସ ବିକ୍ରି କରିବା ପାଇଁ ଫସାଉଥିଲେ କିଛି ସେବାୟତ । ଗୋଟିଏ ପାସର ଦାମ ଥିଲା ୫ଶହ ଟଙ୍କା । ଅଧିକ ଲୋକ ଗଲେ ଟିକେ ରିହାତିରେ ମିଳୁଥିଲା ପାସ୍ । ଏସବୁ ଦୃଶ୍ୟ କଏଦ ହୋଇଥିଲା କନକ ନ୍ୟୁଜ୍ କ୍ୟାମେରା ଲେନ୍ସରେ। ଆଉ କ୍ୟାମେରା ଦେଖି ଦୂରକୁ ପଳାଉଥିଲେ ସେବାୟତ। ପାସ ବିକ୍ରି ନେଇ ପଚାରିଲେ କ୍ୟାମେରା ଏଡାଇ ଚାଲିଯାଉଥିଲେ।
ବାରବାଟୀ ଏକ ଦିବୟୀୟ କ୍ରିକେଟ ମ୍ୟାଚବେଳେ ପାସ ଓ ଟିକେଟ ହେରଫେର ନେଇ ସାଂଘାତିକ ଅଭିଯୋଗ ଆସିଥିଲା। ବାରବାଟୀ ଷ୍ଟାଡିୟମର ପ୍ରାୟ ୩୦ ହଜାର ପାସକୁ ଭିଆଇପିଙ୍କୁ ବାଣ୍ଟି ଦେଇଥିଲେ ଓସିଏ କର୍ତ୍ତୁପକ୍ଷ। ଯାହାକୁ ନେଇ ନିରାଶ ହୋଇଥିଲେ ହଜାର ହଜାର କ୍ରୀଡା ପ୍ରେମୀ। ଆଉ ଏବେ ଲିଙ୍ଗରାଜ ମନ୍ଦିରର ଭିଆଇପି ପାସ୍ ହେରଫେରକୁ ନେଇ ପ୍ରଶ୍ନ ଉଠାଇଛି ବିରୋଧୀ କଂଗ୍ରେସ । ତେବେ ଲିଙ୍ଗରାଜ ପାସ ହେରଫେର ନେଇ ତଦନ୍ତ ହେବ ବୋଲି କହିଛନ୍ତି ବିଜେପି ବିଧାୟକ।
ତେବେ ସେବାୟତ ବିକ୍ରି କରୁଥିବା ଏହି ପାସ ହେଉଛି ଭିଆଇପି ପାସ । ସେବାୟତଙ୍କ ପରିବାର ସମେତ କିଛି ନିର୍ଦ୍ଧିଷ୍ଟ ବ୍ୟକ୍ତି ବିଶେଷଙ୍କୁ ଦିଆଯାଇଥିଲା ଏହି ପାସ । ତେବେ ପ୍ରଶ୍ନ ଉଠୁଛି, କିଛି ହାତ ଗଣତି ସେବାୟତଙ୍କ ପାଖରେ କେମିତି ଆସିଲା ଏତେ ପରିମାଣର ଭିଆଇପି ପାସ ? ପୋଲିସ ଉପସ୍ଥିତିରେ ପାସ ବିକ୍ରି ହେଉଥିଲେ ବି ଏସବୁ ଦେଖି କାହିଁକି ଚୁପ ଥିଲା ପୋଲିସ?
