ବୃଦ୍ଧଙ୍କ ଝୁଲନ୍ତା ଶବ ଉଦ୍ଧାର : ହତ୍ୟା ଅଭିଯୋଗ
ନୀଳଗିରି : ଝୁଲନ୍ତା ଅବସ୍ଥାରେ ବୃଦ୍ଧଙ୍କ ଶବ ଉଦ୍ଧାର ହୋଇଛି । ହତ୍ୟା ଅଭିଯୋଗ ଆଣିଲେ ପରିବାର ଲୋକେ ଫ ନୀଳଗିରି ଥାନା ଅଧୀନ ସଜନାଗଡ ହସ୍ପିଟାଲ୍ ନିକଟସ୍ଥ ତିନିକୋଶିଆ ଜଙ୍ଗଲରେ ମିଳିଛି ବୃଦ୍ଧଙ୍କ ଝୁଲନ୍ତା ଶବ । ସୋମବାର ସକାଳେ ମହୁଲ ଗୋଟାଇବାକୁ ଆସିଥିବା ମହିଳାମାନେ ଏହି ଶବଟିକୁ ଝୁଲନ୍ତା ଅବସ୍ଥାରେ ଦେଖି ଚିହ୍ନଟ କରିବା ସହ ପରିବାର ଲୋକଙ୍କୁ ଖବର ଦେଇଥିଲେ । ପରିବାର ଲୋକେ ଘଟଣା ସ୍ଥଳରେ ପହଞ୍ଚି ଶବକୁ ଚିହ୍ନଟ କରିଥିଲେ । ତାଙ୍କୁ କେହି ମାରି ଝୁଲେଇ ଦେଇଥିବା ଅଭିଯୋଗ କରିଛନ୍ତି । ମୃତ ବୃଦ୍ଧ ଜଣକ ଜାମୁଡିହା ପଞ୍ଚାୟତ ବେଢାସାହି ଗ୍ରାମର ଦାସ ମାଝୀ (୫୬) ବୋଲି ଜଣାପଡିଛି । ସ୍ଥାନୀୟ ଲୋକେ ନୀଳଗିରି ପୁଲିସକୁ ଅବଗତ କରିବା ପରେ ଘଟଣା ସ୍ଥଳରେ ପୁଲିସ ପହଞ୍ଚି ଶବ ଜବତ କରିବା ସହିତ ୧୧/୨୫ରେ ଏକ ଅପମୃତୁ୍ୟ ମାମଲା ରୁଜୁକରି ଅଧିକ ତଦନ୍ତ ଜାରି ରଖିଛି । ନୀଳଗିରି ମେଡିକାଲରେ ଶବ ବ୍ୟବଚ୍ଛେଦ ପରେ ପରିବାରକୁ ଶବ ହସ୍ତାନ୍ତର କରାଯାଇଥିବା ସୂଚନା ମିଳିଛି । ତେବେ ମୃତ ବ୍ୟକ୍ତିର ଗୋଡ ସମ୍ପୂର୍ଣ୍ଣ ତଳେ ଲାଗିଥିବା ବେଳେ ତାଙ୍କୁ କେହି ମାରି ଟାଙ୍ଗି ଦେଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି ।