ଦେଶର ଶ୍ରେଷ୍ଠ ଯୋଜନା ନବୀନ ଗ୍ୟାରେଣ୍ଟି କାର୍ଡ

 ଭୁବନେଶ୍ୱର, : ବିଜୁ ଜନତା ଦଳର ମୁଖ୍ୟାଳୟ ଶଙ୍ଖ ଭବନ ଠାେରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦଳର ଜାତୀୟ ମୁଖପାତ୍ର ଡ଼ଃ ଅମର ପଟ୍ଟନାୟକ ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ ଓ କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନାକୁ ନେଇ ବିଜେପି ଦ୍ୱାରା ବାରମ୍ବାର ଉଠା ଯାଉଥିବା ପ୍ରଶ୍ନ ଉପରେ ଜବାବ ଦେଇଛନ୍ତି । ଡ଼ଃ ପଟ୍ଟନାୟକ କହିଥିଲେ, ନିକଟରେ ପ୍ରକାଶ କରା ଯାଇଥିବା ବିଜୁ ଜନତା ଦଳର ନିର୍ବାଚନୀ ଇସ୍ତାହାରରେ ପ୍ରତିଶ୍ରୁତି ଭାବେ ଦିଆ ଯାଇଥିବା ୨୪ଟି ଗ୍ୟାରେଣ୍ଟି ମଧ୍ୟରୁ ପନ୍ଦର ନମ୍ବର ଗ୍ୟାରେଣ୍ଟି ହେଉଛି ସମସ୍ତଙ୍କ ପାଇଁ ସ୍ୱାସ୍ଥ୍ୟର ଗ୍ୟାରେଣ୍ଟି । ଏହି ଗ୍ୟାରେଣ୍ଟ ଦେବା ପୂର୍ବରୁ ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ ମାଧ୍ୟମରେ ପ୍ରାୟ ଶାଢେ ତିନି କୋଟି ଲୋକଙ୍କୁ ମାଗଣା ଚିକିତ୍ସା ସୁବିଧା ଯୋଗାଇ ଦିଆ ଯାଉଥିଲା । ଏବେ ଏହାର ପରିଧିକୁ ବୃଦ୍ଧି କରି ରାଜ୍ୟର ସମସ୍ତ ନାଗରିକଙ୍କୁ ପ୍ରଦାନ କରିବା ପାଇଁ ବ୍ୟବସ୍ଥା କରାଯାଇଛି । ଆୟୁଷ୍ମାନ ଯୋଜନାରେ ପରିବାର ପାଇଁ ପାଞ୍ଚ ଲକ୍ଷ ଟଙ୍କାର ଚିକିତ୍ସା ସୁବିଧା ରହିଥିବା ବେଳେ ବିଏସକେୱାଇ ମାଧ୍ୟମରେ ପ୍ରତି ପରିବାରର ପୁରୁଷ ସଦସ୍ୟଙ୍କ ପାଇଁ ପାଞ୍ଚ ଲକ୍ଷ ଓ ମହିଳା ସଦସ୍ୟଙ୍କ ପାଇଁ ଦଶ ଲକ୍ଷ ଟଙ୍କାର ଚିକିତ୍ସା ବ୍ୟବସ୍ଥା ରହିଛି । ଆୟୁଷ୍ମାନ ଯୋଜନାରେ ୧୯୪୯ଟି ପ୍ୟାକେଜ ରହିଥିବା ବେଳେ ବିଏସକେୱାଇରେ ୨୦୭୧ଟି ପ୍ୟାକେଜ ରହିଛି । ସେହିପରି, ଆୟୁଷ୍ମାନ ଯୋଜନାରେ କେବଳ ଇଣ୍ଡୋର ଚିକିତ୍ସା ସୁବିଧା ରହିଥିବା ବେଳେ ବିଏସକେୱାଇ ମାଧ୍ୟମରେ ଉଭୟ ଇଣ୍ଡୋର ଓ ଆଉଟଡୋର ଚିକିତ୍ସା ସୁବିଧା ରହିଛି । ରାଜ୍ୟ ସ୍ୱାସ୍ଥ୍ୟ ସେବା କ୍ଷେତ୍ରରେ ନବୀନ ସରକାରଙ୍କ ବିଭିନ୍ନ ପଦକ୍ଷେପ ଯୋଗୁ ରାଜ୍ୟର ସ୍ୱାସ୍ଥ୍ୟ ସ୍ଥିତିରେ ବ୍ୟାପକ ପରିବର୍ତ୍ତନ ଆସିଛି ।  ଓଡ଼ିଶାରେ ୨୦୦୦ ମସିହା ବେଳକୁ ମାତ୍ର ତିନୋଟି ମେଡିକାଲ କଲେଜ ଥିଲା  । ଓଡ଼ିଶାରେ ଆହୁରି ଆଠୋଟି ମେଡିକାଲ କଲେଜ ଓ ଦୁଇଟି ପିଜି କଲେଜ ଖୋଲାଯାଇଛି । ପୂର୍ବରୁ ପ୍ରତି ବର୍ଷ ୩୨୧ ଟି ଏମବିବିଏସ ଓ ୨୫୪ଟି ସ୍ପେସିଆଲିଷ୍ଟ ବାହାରୁଥିବା ବେଳେ ଏବେ ପ୍ରତି ବର୍ଷ ୨୫୨୫ଟି ଏମବିବିଏସ ଓ  ୧୦୦୭ ଜଣ ସ୍ପେସିଆଲିଷ୍ଟ ବାହାରୁଛନ୍ତି । ଏହି ସାମ୍ବାଦିକ ସମ୍ମିଳନୀରେ ବିଜେଡିର ଅନ୍ୟତମ ଜାତୀୟ ମୁଖପାତ୍ର ଡ଼ଃ ସସ୍ମିତ ପାତ୍ର ମଧ୍ୟ ଉପସ୍ଥିତ ଥିଲେ ।