ନିର୍ବାଚନ ପାଇଁ ପ୍ରଶାସନର ବ୍ୟାପକ ପ୍ରସ୍ତୁତି
Rasmita Behera
4500
ବୁଗୁଡ଼ା: ଚଳିତ ନିର୍ବାଚନକୁ ଅବାଧ ଓ ନିରପେକ୍ଷ କରିବା ପାଇଁ ସ୍ଥାନୀୟ ପ୍ରଶାସନ ବ୍ୟାପକ ପ୍ରସ୍ତୁତି କରିଛନ୍ତି । ପୋଲସରା ବିଧାନସଭା ନିର୍ବାଚନ ମଣ୍ଡଳୀର ସର୍ବମୋଟ ୨୬୩ଟି ମତଦାନ କେନ୍ଦ୍ର ମଧ୍ୟରୁ ବୁଗୁଡା ଅଞ୍ଚଳରେ ମୋଟ ୧୨୩ଟି ମତଦାନ କେନ୍ଦ୍ର ରହିଥିବା ବେଳେ ବ୍ଲକର ୨୧ଟି ପଞ୍ଚାୟତର ଭୋଟରଙ୍କ ପାଇଁ ୧୦୯ଟି ଓ ଏନ୍ଏସିର ୧୩ଟି ୱାର୍ଡର ଭୋଟଦାତାଙ୍କ ପାଇଁ ୧୪ଟି ମତଦାନ କେନ୍ଦ୍ର ରହିଛି । ଏଥରୁ ୧୯ଟି ଆଦର୍ଶ ମତଦାନ କେନ୍ଦ୍ର ରହିଥିବା ବେଳେ ଗୋଲିଆ ଗାଁର ୪ଟି ଓ ଭାମଶ୍ୟାଳି ଗ୍ରାମର ୨ଟି ହିସାବରେ ୬ଟି ବୁଥକୁ ସମ୍ବେଦନଶୀଳ ଭାବେ ଚିହ୍ନଟ କରାଯାଇଛି । ସାଧାରଣ ନିର୍ବାଚନର ପଞ୍ଚମ ପର୍ଯ୍ୟାୟ ତଥା ଚଳିତ ମାସ ୨୦ ତାରିଖରେ ଆସ୍କା ଲୋକସଭା ଓ ପୋଲସରା ବିଧାନସଭା ନିମନ୍ତେ ଭୋଟ ଗ୍ରହଣ ହେବାକୁ ଥିବାବେଳେ ବୁଗୁଡା ବ୍ଲକ ଓ ଏନ୍ଏସିର ମୋଟ ୧,୧୨,୮୭୮ ଜଣ ଭୋଟରଙ୍କ ମଧ୍ୟରେ ୧ ଜଣ ତୃତୀୟ ଲିଙ୍ଗି ଭୋଟରଙ୍କ ସମେତ ୫୮,୭୭୦ ଜଣ ପୁରୁଷ ଓ ୫୪,୧୦୭ ଜଣ ମହିଳା ଭୋଟର ରହିଥିବା ଜଣାପଡ଼ିଛି ।
