ଡିଜିଟାଲ ଗିରଫ ମାମଲା : ତଦନ୍ତ କରିବ ସିବିଆଇ

ନୂଆଦିଲ୍ଲୀ : ସୁପ୍ରିମକୋର୍ଟ ସୋମବାର ଦିନ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ଡିଜିଟାଲ ଗିରଫ ଠକେଇର ବଢ଼ୁଥିବା ମାମଲାଗୁଡ଼ିକର  ଦେଶବ୍ୟାପୀ ତଦନ୍ତ କରିବା ପାଇଁ ଦାୟିତ୍ୱ ଦେଇଛନ୍ତି । ରାଜ୍ୟ ସରକାରଙ୍କୁ ସେମାନଙ୍କ କ୍ଷେତ୍ରାଧିକାର ମଧ୍ୟରେ ଏପରି ମାମଲାଗୁଡ଼ିକର ତଦନ୍ତ କରିବା ପାଇଁ ସମ୍ମତି ପ୍ରଦାନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ।

    ଭାରତର ମୁଖ୍ୟ ବିଚାରପତି ସୂର୍ଯ୍ୟକାନ୍ତ ଓ ବିଚାରପତି ଜୟମାଲ୍ୟ ବାଗଚୀଙ୍କୁ ନେଇ ଗଠିତ ଏକ ଖଣ୍ଡପୀଠ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)କୁ ମଧ୍ୟ ନୋଟିସ ଜାରି କରିଛନ୍ତି । ସାଇବର ଠକେଇ ମାମଲାରେ ବ୍ୟବହୃତ ବ୍ୟାଙ୍କ ଆକାଉଣ୍ଟଗୁଡ଼ିକୁ ଫ୍ରିଜ୍‌ କରିବା ପାଇଁ କାହିଁକି କୃତ୍ରିମ ବୁଦ୍ଧିମତ୍ତା (ଏଆଇ) କିମ୍ବା ମେସିନ୍‌ ଲର୍ଣ୍ଣିଂ ପ୍ରଯୁକ୍ତିବିଦ୍ୟା ବ୍ୟବହାର କରାଯାଇ ନାହିଁ ସେ ବିଷୟରେ ଜବାବ ମାଗିଛନ୍ତି । ସିବିଆଇ ସହିତ ଉତ୍ତମ ସମନ୍ୱୟ ସୁନିଶ୍ଚିତ କରିବା ପାଇଁ ଖଣ୍ଡପୀଠ ସମସ୍ତ ରାଜ୍ୟ, କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଏପରି ଅନଲାଇନ୍‌ ଅପରାଧର ମୁକାବିଲା ପାଇଁ ଏକ ଆଞ୍ଚଳିକ ଏବଂ ରାଜ୍ୟ ସାଇବର ଅପରାଧ ସମନ୍ୱୟ କେନ୍ଦ୍ର ସ୍ଥାପନ କରିବାକୁ କହିଛନ୍ତି । ହରିୟାଣାର ଜଣେ ବୃଦ୍ଧ ଦମ୍ପତିଙ୍କ ଅଭିଯୋଗ ଉପରେ ପଞ୍ଜିକୃତ ଏକ ସ୍ୱତଃପ୍ରବୃତ୍ତ ମାମଲାରେ ନିର୍ଦ୍ଦେଶ ଦେଇଥିବା ସର୍ବୋଚ୍ଚ଼ ନ୍ୟାୟାଳୟ ଉଲ୍ଲେଖ କରିଛନ୍ତି ଯେ ଅଧିକାଂଶ ବରିଷ୍ଠ ନାଗରିକଙ୍କୁ ସାଇବର ଅପରାଧୀମାନେ ଟାର୍ଗେଟ କରନ୍ତି ଏବଂ ସେମାନଙ୍କ କଠିନ ପରିଶ୍ରମର ଅର୍ଥ ନେଇ ଯାଆନ୍ତି । ଏହାସହ ଡିଜିଟାଲ ଗିରଫ ମାମଲା ସହିତ ଜଡିତ ତଦନ୍ତରେ ସିବିଆଇକୁ ବିବରଣୀ ଏବଂ ସହଯୋଗ ପ୍ରଦାନ କରିବାକୁ ସୂଚନା ପ୍ରଯୁକ୍ତି ମଧ୍ୟସ୍ଥିମାନଙ୍କୁ ନିର୍ଦ୍ଦେଶ ଦିଆଯାଇଛି ।

      ଖଣ୍ଡପୀଠ ସିବିଆଇକୁ ଅଫଶୋର ଟ୍ୟାକ୍ସ ହେଭନ ଦେଶଗୁଡ଼ିକରୁ କାର୍ଯ୍ୟ କରୁଥିବା ସାଇବର ଅପରାଧୀଙ୍କ ନିକଟରେ ପହଞ୍ଚିବା ପାଇଁ ଇଣ୍ଟରପୋଲର ସହାୟତା ନେବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି । ଏହାସହ ଟେଲିକମ୍‌ ବିଭାଗକୁ ଟେଲିକମ୍‌ ସେବା ପ୍ରଦାନକାରୀମାନେ ଗୋଟିଏ ବ୍ୟବହାରକାରୀ କିମ୍ବା ସଂସ୍ଥାକୁ ଏକାଧିକ ସିମ୍‌ କାର୍ଡ ପ୍ରଦାନ ନକରିବାକୁ ନିର୍ଦ୍ଦେଶ ଦେଇଛନ୍ତି । ସଲିସିଟର ଜେନେରାଲ ତୁଷାର ମେହଟାଙ୍କୁ ସାଇବର ଅପରାଧ ମାମଲାଗୁଡ଼ିକର ମୁକାବିଲା ପାଇଁ ଗୃହ ମନ୍ତ୍ରଣାଳୟ, ଟେଲିକମ୍‌ ବିଭାଗ, ଅର୍ଥ ମନ୍ତ୍ରଣାଳୟ ଏବଂ ଇଲେକ୍‌ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ସମେତ ବିଭିନ୍ନ କେନ୍ଦ୍ର ମନ୍ତ୍ରଣାଳୟର ମତାମତ ତାଙ୍କ ସମ୍ମୁଖରେ ରଖିବା ନିଶ୍ଚିତ କରିବାକୁ କହିଛନ୍ତି । ଆରମ୍ଭରେ ଖଣ୍ଡପୀଠ ସିବିଆଇକୁ ସେହି ବ୍ୟାଙ୍କ ଅଧିକାରୀମାନଙ୍କର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି ଯେଉଁମାନେ ନାଗରିକମାନଙ୍କୁ ଠକିବାରେ ଠକମାନଙ୍କ ସହିତ ହାତ ମିଳାଇ ଆକାଉଣ୍ଟ ପରିଚାଳନା କରିବାରେ ସାହାଯ୍ୟ କରନ୍ତି ।