ନବକୃଷ୍ଣଙ୍କ ଠାରୁ ନବୀନଙ୍କ ଯାଏଁ...୧୯୫୩ରେ ଆସିଥିଲା ପ୍ରଥମ ଅନାସ୍ଥା

ଭୁବନେଶ୍ୱରରୁ ରାମଚଣ୍ଡୀ ପ୍ରସାଦ ରଣସିଂହ : 

ପ୍ରାୟ ୧୭ ବର୍ଷ ପରେ ଓଡ଼ିଶା ବିଧାନସଭାରେ ସରକାରଙ୍କ ବିରୋଧରେ ଅନାସ୍ଥା ନୋଟିସ୍ ଆସିଛି  । କଂଗ୍ରେସ ବିଧାୟକମାନେ ଆଜି ବିଧାନସଭା ସଚିବଙ୍କ ଜରିଆରେ ବାଚସ୍ପତିଙ୍କୁ ଅନାସ୍ଥା ନୋଟିସ୍ ଦେଇଛନ୍ତି  । ବିଧାନସଭାରେ ବାଚସ୍ପତି ତାହାକୁ ଗ୍ରହଣ କରୁଛନ୍ତି କି ନାହିଁ, ଯଦି ଗ୍ରହଣ କରିବେ କେବେ ଆଲୋଚନା ହେବ, ବିଜେଡ଼ିର ଆଭିମୁଖ୍ୟ କ’ଣ ରହିବ ଏମିତି ଅନେକ ପ୍ରଶ୍ନ ରାଜନୀତିକ ଅଳିନ୍ଦରେ ଘୂରିବୁଲୁଛି  । ତେବେ ଓଡ଼ିଶାରେ ଅନାସ୍ଥା ଇତିହାସ ବହୁ ପୁରୁଣା  । ପ୍ରଥମ ବିଧାନସଭା ଅମଳରୁ ମୁଖ୍ୟମନ୍ତ୍ରୀ ଓ ମନ୍ତ୍ରୀମଣ୍ଡଳ ବିରୋଧରେ ଅନାସ୍ଥା ନୋଟିସ୍ ଆସିଥିବାର ନଜିର ରହିଛି  । ଏଯାବତ୍ ସରକାରଙ୍କ ବିରୋଧରେ ଆସିଥିବା ୧୪ଟି ଅନାସ୍ଥା ପ୍ରସ୍ତାବ ଉପରେ ଗୃହରେ ଆଲୋଚନା ହୋଇଛି  । ତେବେ  ସବୁଥର ଅନାସ୍ଥା ଭୋଟ୍ ସରକାରଙ୍କ ସପକ୍ଷରେ ହିଁ ଯାଇଛି  ।
ତଥ୍ୟ ଅନୁଯାୟୀ, ପ୍ରଥମ ବିଧାନସଭାରେ ୨ଟି, ତୃତୀୟ ବିଧାନସଭାରେ ୩, ଚତୁର୍ଥ ବିଧାନସଭାରେ ୩, ସପ୍ତମ ବିଧାନସଭାରେ ଗୋଟିଏ, ଅଷ୍ଟମ ବିଧାନସଭାରେ ଗୋଟିଏ, ଏକାଦଶ ବିଧାନସଭାରେ ୨ଟି, ଦ୍ୱାଦଶ ଓ ତ୍ରୟୋଦଶ ବିଧାନସଭାରେ ଗୋଟିଏ ଲେଖାଏଁ ଅନାସ୍ଥା ପ୍ରସ୍ତାବ ଆସିଥିଲା  । 
୧୯୫୩ରେ ବିଧାନସଭାରେ ପ୍ରଥମ ଅନାସ୍ଥା ଆସିଥିଲା  । ସେହିବର୍ଷ ଅପ୍ରେଲ ୧୫ରେ ଶ୍ରଦ୍ଧାକର ସୁପକାର ତକôାଳୀନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀଙ୍କ ବିରୋଧରେ ଅନାସ୍ଥା ଆଣିଥିଲେ  । ତେବେ ପ୍ରସ୍ତାବ ସପକ୍ଷରେ ୫୨ଟି ଭୋଟ୍ ଆସିଥିବାବେଳେ ବିପକ୍ଷରେ ଆସିଥିଲା ୬୮ ଭୋଟ୍  । ସେତେବେଳେ ସାତଦିନ ଧରି ପ୍ରସ୍ତାବ ଉପରେ ଆଲୋଚନା ହୋଇଥିଲା  । ୧୯୫୫ରେ ପୁଣି ନବକୃଷ୍ଣ ସରକାରଙ୍କ ବିରୋଧରେ ଶ୍ରଦ୍ଧାକର ଅନାସ୍ଥା ଆଣିଥିଲେବି ପ୍ରସ୍ତାବ ସପକ୍ଷରେ ୪୫ ଓ ବିପକ୍ଷରେ ୭୬ଟି ଭୋଟ୍ ପଡ଼ିଥିଲା  ।
୧୯୬୧ରେ ବିଜୁ ପଟ୍ଟନାୟକଙ୍କ ସରକାର ବିରୋଧରେ ଆରଏନ ସିଂହଦେଓ ଅନାସ୍ଥା ଆଣିଥିଲେ  । ୧୯୬୧ ଡିସେମ୍ବର ୬ରେ ଆସିଥିବା ଏହି ଅନାସ୍ଥା ପ୍ରସ୍ତାବ ସପକ୍ଷରେ ୪୯ ଓ ବିପକ୍ଷରେ ୭୯ ଜଣ ମତ ଦେଇଥିଲେ  । ସେତେବେଳେ ୩ ଦିନ ଧରି ପ୍ରସ୍ତାବ ଉପରେ ଆଲୋଚନା କରାଯାଇଥିଲା  । ପୁଣି ବିଜୁବାବୁଙ୍କ ସରକାର ବିରୋଧରେ ୧୯୬୩ ମସିହା ସେପ୍ଟେମ୍ବର ୧୬ରେ ଅନାସ୍ଥା ଆସିଥିବାବେଳେ ୩ ଦିନ ଆଲୋଚନା ହୋଇଥିଲା  । ତେବେ ବାଚନିକ ଭୋଟରେ ଅନାସ୍ଥା କାଟ୍ ଖାଇ ଯାଇଥିଲା  । ସେତେବେଳେ ହରିହର ପଟେଲ ଅନାସ୍ଥା ପ୍ରସ୍ତାବ ଆଗତ କରିଥିଲେ  ।
୧୯୬୪ ମସିହା ଅପ୍ରେଲ ୧୭ରେ ବୀରେନ ମିତ୍ରଙ୍କ ସରକାର ବିରୋଧରେ ଆରଏନ ସିଂହଦେଓ ଅନାସ୍ଥା ଆଗତ କରିଥିଲେ  । ଦୁଇଦିନ ଧରି ଆଲୋଚନା ହୋଇଥିବାବେଳେ ପ୍ରସ୍ତାବ ସପକ୍ଷରେ ୪୮ ଓ ବିପକ୍ଷରେ ୭୭ ମତ ଆସିଥିଲା  ।
ଦୁଇ ଦୁଇ ଥର ଆରଏନ ସିଂହଦେଓ ଅନ୍ୟ ସରକାରଙ୍କ ବିରୋଧରେ ଅନାସ୍ଥା ଆଣିଥିବାବେଳେ ସେ ମୁଖ୍ୟମନ୍ତ୍ରୀ ଥିବାବେଳେ ମଧ୍ୟ ଅନାସ୍ଥାର ସାମ୍ନା କରିଥିଲେ  । ସଦାଶିବ ତ୍ରିପାଠୀ ଓ ଅନ୍ୟମାନେ ସିଂହଦେଓଙ୍କ ମିଳିତ ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଗତ କରିଥିଲେ  । ୧୯୬୮ ମସିହା ଜୁନ୍ ୨୫ରେ ସେ ଅନାସ୍ଥା ଆଗତ କରିଥିବାବେଳେ ଜୁନ୍ ୨୭ରେ ପ୍ରସ୍ତାବ ସପକ୍ଷରେ ୫୬ ଓ ବିପକ୍ଷରେ ୭୪ ମତ ଆସିଥିଲା  । ୧୯୬୮ ଡିସେମ୍ବର ୩ରେ ନାରାୟଣ ସାହୁ ଓ ଅନ୍ୟମାନେ ସିଂହଦେଓ ସରକାର ବିରୋଧରେ ପୁଣି ଅନାସ୍ଥା ଆଣିଥିଲେ  । ତେବେ ପ୍ରସ୍ତାବ ସପକ୍ଷରେ ୪୭ ଓ ବିପକ୍ଷରେ ୭୦ ମତ ଆସିଥିଲା  । ପୁନଶ୍ଚ ୧୯୭୦ ସେପ୍ଟେମ୍ବର ୧୧ରେ ଆରଏନ ସିଂହଦେଓଙ୍କ ସରକାର ବିରୋଧରେ ଗଙ୍ଗାଧର ପାଇକରାୟ ଓ ଅନ୍ୟମାନେ ଅନାସ୍ଥା ଆଣିଥିଲେ  । ସେହି ପ୍ରସ୍ତାବ ବି କାଟ୍ ଖାଇ ଯାଇଥିଲା  । 
ଏହାର ପ୍ରାୟ ୯ ବର୍ଷ ପରେ ଅର୍ଥାତ୍ ୧୯୭୯ ମସିହା ସେପ୍ଟେମ୍ବର ୧୨ରେ ପ୍ରହ୍ଲାଦ ମଲ୍ଲିକ ତକôାଳୀନ ମୁଖ୍ୟମନ୍ତ୍ରୀ ନୀଳମଣି ରାଉତରାୟ ଓ ତାଙ୍କ ମନ୍ତ୍ରୀମଣ୍ଡଳ ବିରୋଧରେ ଅନାସ୍ଥା ଆଣିଥିଲେ  । ଯାହା ସପକ୍ଷରେ ୪୪ ଓ ବିପକ୍ଷରେ ୮୪ ମତ ଆସିଥିଲା  । ୧୯୮୩ରେ ଜାନକୀ ପଟ୍ଟନାୟକଙ୍କ ସରକାର ବିରୋଧରେ ଅନାସ୍ଥା ଆଣିଥିଲେ ଶରତ ଦେବ  । ତେବେ ଆଲୋଚନା ପରେ ବାଚନିକ ଭୋଟରେ ପ୍ରସ୍ତାବଟି କାଟ୍ ଖାଇ ଯାଇଥିଲା  । ଏହାର ୧୪ ବର୍ଷ ପରେ ପୁଣି ବିଧାନସଭା ଦେଖିଥିଲା ଅନାସ୍ଥା  । ୧୯୯୭ ସେପ୍ଟେମ୍ବର ୧୧ରେ ଜାନକୀବାବୁଙ୍କ ସରକାର ବିରୋଧରେ ଅନାସ୍ଥା ଆଣିଥିଲେ ଅଶୋକ ଦାସ  । ତେବେ ଏହି ପ୍ରସ୍ତାବ ସପକ୍ଷରେ ୫୩ ଓ ବିପକ୍ଷରେ ୮୧ ମତ ଆସିଥିଲା  । ୧୯୯୮ ଅଗଷ୍ଟ ୩ରେ ପୁଣି ଅଶୋକ ଦାସ ଅନାସ୍ଥା ଆଣିଥିଲେବି ତାହା ବାଚନିକ ଭୋଟରେ କାଟ୍ ଖାଇ ଯାଇଥିଲା  ।
୨୦୦୧ରେ ପ୍ରଥମ ଥର ପାଇଁ ନବୀନ ପଟ୍ଟନାୟକଙ୍କ ସରକାର ଅନାସ୍ଥାର ସାମ୍ନା କରିଥିଲେ  । ଉମେଶ ସ୍ୱାଇଁ ଅନାସ୍ଥା ପ୍ରସ୍ତାବ ଆଗତ କରିଥିଲେ  । ଦୁଇଦିନ ଧରି ଆଲୋଚନା ପରେ ଏହି ପ୍ରସ୍ତାବଟି ବାଚନିକ ଭୋଟରେ କାଟ୍ ଖାଇ ଯାଇଥିଲା  । ୨୦୦୮ରେ ବି ନବୀନ ପଟ୍ଟନାୟକଙ୍କ ସରକାର ଅନାସ୍ଥାର ସାମ୍ନା କରିଥିଲେ  । ସେତେବେଳେ ବିରୋଧୀ ଦଳ ନେତା ଥିଲେ ଜାନକୀ ବଲ୍ଲଭ ପଟ୍ଟନାୟକ  । ଏହା ପରଠାରୁ ନବୀନ ବାବୁ କେବେ ଅନାସ୍ଥାର ସାମ୍ନା କରିନଥିଲେ  ।