ନେତାମାନଙ୍କ ଉଚ୍ଚାକାଂକ୍ଷା

ବର୍ତ୍ତମାନର ନିର୍ବାଚନ ଘମାସନ ଭିତରେ ସବୁ ରାଜନୈତିକ ଦଳର ପଣ୍ଡିତମାନେ ଆକଳନ କରୁଛନ୍ତି ଯେ ସବୁ ଲୋକସଭା ସିଟ ପୋଛି ନେଇ ଆମେ ବିଜେତା ହେବୁ ଆଉ ବିଧାନ ସଭା ସିଟ ପୁରା ଆମ ପକେଟରେ । କେବଳ ସେତିକିରେ ଅଟକି ନାହାଁନ୍ତି ଆଉ ପାଦେ ଆଗକୁ ଯାଇ ଆପଣମାନେ ଆମ ଶପଥ ଗ୍ରହଣ ଉତ୍ସବକୁ ତାହା ପୁଣି ତାରିଖ ନିର୍ଦ୍ଧାରିତ ହୋଇ ଏପରି ଆଶା ଆସ୍ଫାଳନ ଓ ବାହାସ୍ପୋଟ ମଧ୍ୟ ଭାଷଣରୁ ଶୁଣିବାକୁ ମିଳୁଛି । ରାଜନୀତି ଯେ ସେବା ତାକୁ କେତେ ଜଣ ଗ୍ରହଣ କରିଥାନ୍ତି ନିଜ ମାଟିର ବିକାଶ ପାଇଁ କେତେ ଜଣଙ୍କ ପ୍ରାଣ କାନ୍ଦିଥାଏ? କେତେ ଜଣ ଛାତିରେ ହାତ ରଖି କହିପାରିବେ ପ୍ରିୟା ପ୍ରୀତି, ଦୁର୍ନିୀତି, ଜନବିରୋଧୀ ନୀତି ମୋ ନୀତି ନୁହେଁ? ତାହାହେଲେ ରାଜନୀତିରେ ଉଚ୍ଚାକାଂକ୍ଷା ରହୁ କିନ୍ତୁ ଏହି ଆକାଂକ୍ଷା ଭିତରେ ନେତାମାନେ ସମର୍ଥକ ଓ ଶୁଭେଚ୍ଛୁଙ୍କ ଭିତରେ ମନୋବଳ ବଢ଼ାଇବା ପାଇଁ ମିଛ ସ୍ୱପ୍ନ ଆଉ ମିଛ କଥା ରଖନ୍ତୁ ନାହିଁ । ଜନତାଙ୍କୁ ପ୍ରଭାବିତ କରିବା ପାଇଁ ଭୋଟ ପୂର୍ବରୁ ଯାହାସବୁ କରାଯାଏ ତାହା ସାମୟିକ କେବେ ବି ନିୟମିତ ହୋଇପାରିବ ନାହିଁ । ନେତା ମାନଙ୍କ ରାଜନୀତିକୁ ବି ଟିକେ ଦେଖନ୍ତୁ । ସେମାନେ ଭଲ ଭାବେ ଜାଣିଛନ୍ତି ଲମ୍ବା ଚଉଡା ଭାଷଣ ଦେଇ କିମ୍ବା କିଛି ଚକମା ଦେଖାଇ ଲୋକମାନଙ୍କୁ ନିଜ ଆଡ଼କୁ ଟାଣି ଆଣିବା ସମ୍ଭବ ନୁହେଁ ।   କିନ୍ତୁ ସେମାନେ ସବୁବେଳେ ଭୁଲିଯାନ୍ତି ଯେ  ମିଛ କହି ଆଉ ଭୂଅାଁ ବୁଲାଇବାର ଯୁଗ ହିଁ ନାହିଁ । କେତେଟା ଟଙ୍କା, ମଦ ଆଉ ମାଂସ ସବୁ ବିଜୟର ମାପକାଠି ହୋଇପାରେନାହିଁ । ଜଣେ ଗଣତନ୍ତ୍ରର ଯଥାର୍ଥ ପୂଜାରୀକୁ କୌଣସି ଦଳ ବା ବଳ କିଣିପାରିନଥାଏ । ସେପରି ଅନେକ ଚରିତ୍ର ଆମ ଆଖପାଖରେ ରହିଛନ୍ତି । ବଙ୍ଗଳା ରାଜ୍ୟର ନିର୍ବାଚନ ଡାକ ପରି "ମା', ମାଟି, ମାନୁଷ'ର ଡାକ ଦିଅନ୍ତୁ । ଯଥାର୍ଥରେ ମାଆ ମାତୃସମ ନିଜ ମାତୃଭୂମି, ନିଜ ମାଟି - ନିଜ ମୂଲକ ଆଉ ମଣିଷଙ୍କୁ ଯଥାର୍ଥ ଚିହ୍ନିବାରେ ଓ ସମ୍ମାନ ଦେବାରେ ନିଜକୁ ନିୟୋଜିତ କରିବାର ଡାକରା ପାଇଲେ କେହି ଆଉ କେଉଁ ଦଳକୁ ବି ମୂଲଚାଲ ଆଦୌ କରିବେ ନାହିଁ । ବରଂ ସେମାନଙ୍କ ବିକାଶର ଡାକରା ସେମାନଙ୍କୁ ସମ୍ମାନିତ ଆଉ ଗୌରବ ବଢ଼ାଇବା ସହ ନିଶ୍ଚିନ୍ତ ବିଜୟର ଟିକା ପିନ୍ଧାଇବ । ଆସନ୍ତୁ ଚଳିତ ଭୋଟ-୨୪ରେ ନିଜକୁ ସାମିଲ କରିବା ଓ ସମସ୍ତେ ନିଶ୍ଚିନ୍ତ ଭୋଟ ଦେବା ।