ପିଇବା ପାଣିରେ ଭେଜାଲ
Rasmita Behera
ତାଳଚେର : ତାଳଚେର ସହରାଞ୍ଚଳ ଠାରୁ ଗାଁ ଗଣ୍ଡା ପର୍ଯ୍ୟନ୍ତ ବ୍ୟାପକ ଭାବେ ପାଣି ଜାରକିନ ଓ ପାଣି ବଟଲର ବିକ୍ରି ବୃଦ୍ଧି ପାଉଛି । ଖରାଦିନେ ଜଳସ୍ତର ହ୍ରାସ ପାଉଥିବା ସମୟରେ ପାନୀୟ ଜଳର ସଂକଟ ଦେଖାଦେଇଛି । ଏଭଳି ସ୍ଥିତିରେ ସହର ବଜାର ସବୁଠି ଥଣ୍ଡା ପାନୀୟ ଜଳକୁ କିଣି ପିଇବା ପାଇଁ ଜନସାଧାରଣ ଅଧିକ ପସନ୍ଦ କରୁଛନ୍ତି । ଏହାର ସୁଯୋଗ ନେଇ ମାନ୍ୟତା ପାଇନଥିବା ବହୁ ଜାଲ ପାଣି ବଟଲ୍ ଓ ପାଣି ପାଉଚ ବ୍ୟାପକ ଭାବେ ବଜାରରେ ବିକ୍ରି ହେଉଛି । ପାଣି ଜାରକିନ୍ ଓ ପାଣି ବଟଲ କିଣୁଥିବା ଗ୍ରାହକମାନଙ୍କ ମଧ୍ୟରେ ସଚେତନତାର ଅଭାବ ଯୋଗୁଁ କେତେକ ଚତୁର ବ୍ୟବସାୟୀ ପାଣିରେ ଭେଜାଲ କରିବା ଆରମ୍ଭ କରି ଦେଇଛନ୍ତି । ବ୍ୟବସାୟୀମାନେ ପାଣିର ମାନ ଓ କମ୍ପାନୀ ସମ୍ପର୍କରେ ସଚେତନ ନ ହୋଇ ଯେଉଁ ପାଣି ବଟଲ ଓ ଜାରକିନରେ ଅଧିକା ମୁନାଫା ମିଳୁଛି ତାହା ଗଚ୍ଛିତ ରଖୁଛନ୍ତି ଓ ଗ୍ରାହକମାନଙ୍କୁ ବିକ୍ରି କରୁଛନ୍ତି । ବିଭିନ୍ନ ସମୟରେ ଦେଖାଯାଉଛି ଗାଁ ଗଣ୍ଡା ଠାରୁ ସହର ବଜାର ପର୍ଯ୍ୟନ୍ତ ଭୋଜି ଭାତରେ ମଧ୍ୟ ଶସ୍ତା ପାଣି ବଟଲ ଓ ଜାରକିନ ବ୍ୟବହାର କରାଯାଉଛି । ଏପରିକି ପାଣି ବଟଲରେ କମ୍ପାନୀର ନାଁ ନ ଥିବା ଏବଂ ପାଣି ପାଉଚରୁ ଦୁର୍ଗନ୍ଧ ହେଉଥିବା ପାଣି ବାହାରୁଥିବା ଦେଖିବାକୁ ମିଳୁଛି । କିନ୍ତୁ ଅଭିଯୋଗ ଶୁଣିବାକୁ କେହି ନାହାନ୍ତି । ଏଭଳି ସ୍ଥିତିରେ ଦୂଷିତ ପାଣି ପିଇ ଜନସାଧାରଣ ବିଭିନ୍ନ ରୋଗରେ ପଡୁଛନ୍ତି । ନିମ୍ନମାନର ପାଣି ବଟଲ ଓ ପାଣି ଜାରକିନକୁ ଯାଞ୍ଚ କରି ବିହିତ ପଦକ୍ଷେପ ନେବା ପାଇଁ ସାଧାରଣରେ ଦାବି ହେଉଛି ।
