ପ୍ରଧାନମନ୍ତ୍ରୀ ଫସଲ ବୀମା ରାଶି ପ୍ରଦାନ: ୩୫ ଲକ୍ଷ କୃଷକ ପାଇଲେ ୩୯୦୦ କୋଟି

 ଭୁବନେଶ୍ୱର: କୃଷକ କଲ୍ୟାଣ ପ୍ରତି ସରକାରଙ୍କ ପ୍ରତିବଦ୍ଧତାକୁ ଦର୍ଶାଇ କେନ୍ଦ୍ର କୃଷି ଓ କୃଷକ କଲ୍ୟାଣ ଏବଂ ଗ୍ରାମୀଣ ବିକାଶ ମନ୍ତ୍ରୀ  ଶିବରାଜ ସିଂ ଚୌହାନ ଆଜି ରାଜସ୍ଥାନର ଝୁନଝୁନୁରୁ ସିଧାସଳଖ କୃଷକଙ୍କ ବ୍ୟାଙ୍କ ଆକାଉଣ୍ଟକୁ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅଧୀନରେ ଫସଲ ବୀମା ଦେୟ ରାଶିକୁ ଡିଜିଟାଲ୍ ମାଧ୍ୟମରେ ସ୍ଥାନାନ୍ତର କରିଛନ୍ତି । ପାଖାପାଖି ୩୫ ଲକ୍ଷ କୃଷକଙ୍କ ଆକାଉଣ୍ଟକୁ ପ୍ରାୟ ୩୯୦୦ କୋଟି ଟଙ୍କା ପ୍ରଦାନ କରାଯାଇଛି ।  
ଏହି ଅବସରରେ କୃଷି ଓ କୃଷକ କଲ୍ୟାଣ ରାଷ୍ଟ୍ରମନ୍ତ୍ରୀଭଗିରଥ ଚୌଧୁରୀ, ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମା ଓ ରାଜସ୍ଥାନ କୃଷି ମନ୍ତ୍ରୀ ଡକ୍ଟର କିରୋଡି ଲାଲ ମୀନାଙ୍କ ସମେତ ବହୁ ସଂଖ୍ୟକ କୃଷକ ଉପସ୍ଥିତ ଥିଲେ । ବିଭିନ୍ନ ରାଜ୍ୟରୁ ଲକ୍ଷ ଲକ୍ଷ କୃଷକ ଓ ହିତାଧିକାରୀ ମଧ୍ୟ ଭର୍ଚୁଆଲ ମାଧ୍ୟମରେ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ ।  ସମାବେଶକୁ ସମ୍ବୋଧିତ କରି ଶ୍ରୀ ଚୌହାନ କହିଥିଲେ ଯେ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦିଙ୍କ ନେତୃତ୍ୱରେ ଆମେ ଏକ ଉଲ୍ଲେଖନୀୟ ଭାରତ ଗଠନର ସାକ୍ଷୀ ହେଉଛୁ । ରାଜସ୍ଥାନ ଖୁବ୍ ଶୀଘ୍ର ଯମୁନା, ଚମ୍ବଲ ଏବଂ ସିନ୍ଧୁ ନଦୀରୁ ଜଳ ଗ୍ରହଣ କରିବ । ପୂର୍ବ ସରକାରଙ୍କ ସମୟରେ ଫସଲ ବୀମା କ୍ଷତିପୂରଣ କେବଳ ସେତେବେଳେ ପ୍ରଦାନ କରାଯାଉଥିଲା ଯେତେବେଳେ ଏକ ସମ୍ପୂର୍ଣ୍ଣ ତହସିଲ କିମ୍ବା ବ୍ଲକର ଫସଲ ନଷ୍ଟ ହେଉଥିଲା, କିନ୍ତୁ ପ୍ରଧାନମନ୍ତ୍ରୀ ପୁରୁଣା ଯୋଜନାଗୁଡ଼ିକୁ ରଦ୍ଦ କରି ଏକ ବୀମା ଯୋଜନା ପ୍ରବର୍ତ୍ତନ କରିଥିଲେ ଯାହା ଅଧୀନରେ ଗୋଟିଏ ଗ୍ରାମରେ ଜଣେ କୃଷକଙ୍କ ଫସଲ ନଷ୍ଟ ହେଲେ ବି କ୍ଷତିପୂରଣ ପ୍ରଦାନ କରାଯାଉଛି । 
 ପିଏମ-କିଷାନ ସମ୍ମାନ ନିଧି ଯୋଜନା ଅଧୀନରେ ୩.୭୫ ଲକ୍ଷ କୋଟି ଟଙ୍କା ସିଧାସଳଖ କୃଷକମାନଙ୍କ ଆକାଉଣ୍ଟକୁ ହସ୍ତାନ୍ତର କରାଯାଇଛି । ୨୦୧୬ ରେ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଆରମ୍ଭ ହେବା ପରଠାରୁ କୃଷକମାନଙ୍କୁ ୨ ଲକ୍ଷ ୧୨ ହଜାର କୋଟି ଟଙ୍କା ପ୍ରଦାନ କରାଯାଇଛି । ସେ ସାର ସବସିଡି ଉପରେ ମଧ୍ୟ ଗୁରୁତ୍ୱାରୋପ କରିଥିଲେ, ଉଲ୍ଲେଖ କରିଥିଲେ ଯେ ଏକ ୪୫ କିଲୋଗ୍ରାମ ୟୁରିଆ ବ୍ୟାଗର ମୂଲ୍ୟ କୃଷକମାନଙ୍କ ପାଇଁ ୨୬୬ ଟଙ୍କା, ଏହାର ପ୍ରକୃତ ମୂଲ୍ୟ ୧୬୩୩.୨୪ଟଙ୍କା ଏବଂ ଏହି ପାର୍ଥକ୍ୟ ରାଶି ସରକାରଙ୍କ ଦ୍ୱାରା ବହନ କରାଯାଉଛି  । ସେହିଭଳି ଡିଏପିର ଏକ ୫୦ କିଲୋଗ୍ରାମ ବ୍ୟାଗର ମୂଲ୍ୟ ଏହାର ପ୍ରକୃତ ମୂଲ୍ୟ ୩୧୦୦ ଟଙ୍କା ତୁଳନାରେ ୧୩୫୦ ଟଙ୍କା ।