ବର୍ଷାରେ ଭାସିଗଲା କାଠପୋଲ

 କନ୍ଧମାଳ /ଫିରିଙ୍ଗିଆ : କନ୍ଧମାଳ ଜିଲ୍ଲାରେ ଗତ କିଛି ଦିନ ହେବ ଅଧକାଂଶ ସ୍ଥାନରେ ବର୍ଷା ସାଙ୍ଗକୁ ଘଡଘଡି ଏବଂ ପ୍ରବଳ ପବନ ବହୁଛି । ତେବେ ଏହି ଲଗାଣ ବର୍ଷାରେ ଫିରିଙ୍ଗିଆ ବ୍ଲକ ଲୁଇସିଂ ପଞ୍ଚାୟତର ଡାଙ୍ଗାଣାମ ଗାଁ ନିକଟରେ ଥିବା କୁଚେଣ୍ଡି ନାଳର କାଠ ପୋଲ ଧୋଇ ହୋଇଯାଇଛି । ଯାହାଫଳରେ ଯାତାୟତ ବାଧାପ୍ରାପ୍ତ ହୋଇଥିବାବେଳେ ୨ଟି ୱାର୍ଡର ୮ରୁ ଊଦ୍ଧ୍ୱର୍ ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇଛି । ଏହି ସମୂହ ୮ ଖଣ୍ଡ ଗ୍ରାମବାସୀ ଚାନ୍ଦା କରି ଏବଂ ଶ୍ରମଦାନ କରି ପ୍ରତିବର୍ଷ ଏହି ନାଳରେ କାଠ ପୋଲ ନିର୍ମାଣ କରୁଛନ୍ତି, କିନ୍ତୁ ପ୍ରତିବର୍ଷ ବର୍ଷା ଦିନ ଆସିଲେ କାଠ ପୋଲ ଧୋଇ ଯିବା ଦ୍ୱାରା ଯୋଗାଯୋଗ ବିଚ୍ଛିନ୍ନ ହୋଇ ଯାଉଛି । ଫଳରେ ଜରୁରୀ ପରିସ୍ଥିତିରେ ମେଡିକାଲ କିମ୍ବା ଅନ୍ୟ ସମସ୍ୟାରେ ଅସୁବିଧା ହେଉଥିବାବେଳେ ପୂର୍ବରୁ ସ୍ୱାସ୍ଥ୍ୟ ସେବା ନ ପାଇ ଅସହାୟ ଜନସାଧାରଣ ମୃତୁ୍ୟ ମୁଖରେ ପଡ଼ିଥିବା ଭଳି ନଜିର ରହିଛି ।
 ଏହି କେଡିଯୋଡ଼ି ନାଳରେ ପୋଲ ନିର୍ମାଣ ପାଇଁ ଦୀର୍ଘ ବର୍ଷ ହେଲା ଅଞ୍ଚଳବାସୀ ପ୍ରଶାସନକୁ ଗୁହାରି କରିବା ସହ ପଞ୍ଚାୟତ କାର୍ଯ୍ୟାଳୟ ଠାରୁ ଆରମ୍ଭ କରି ଗୋଷ୍ଠୀ ଉନ୍ନୟନ ଅଧିକାରୀ, କନ୍ଧମାଳ ଜିଲ୍ଲାପାଳ ଏବଂ ଏମିତିକି ମୁଖ୍ୟମନ୍ତ୍ରୀଙ୍କ ନିକଟରେ ମଧ୍ୟ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ପାରିନାହିଁ । ବର୍ତ୍ତମାନ ଲୁଇସିଂ ପଞ୍ଚାୟତର ୨ଟି ୱାର୍ଡର ଉପର ଡାଙ୍ଗାଣାମ, ତଳ ଡାଙ୍ଗାଣାମ, ଲାକାଶ୍ରୀ, ବୁଗେରୀ ମାସ୍କା, ମାନ ପଦର, କଟଡି ସିଲା, ଟୁକୁ ପଦର, ଭଳି ଆଠଟି ଗାଁର ଲୋକଙ୍କ ଯୋଗାଯୋଗ ବିଚ୍ଛିନ୍ନ ହେବା ସହ ଯାତାୟତରେ ବାଧାପ୍ରାପ୍ତ ହୋଇଛି ।  ଏହି ଘଟଣାକୁ ନେଇ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀ ଅନୁପ ଅଭିଷେକ ବେହେରାଙ୍କୁ ଯୋଗାଯୋଗ କରିବାରୁ ପୂର୍ବରୁ ପୋଲ ନିର୍ମାଣ ପାଇଁ ଅଭିଯୋଗ କରିଛନ୍ତି । ଆମ ପକ୍ଷରୁ ଲିଖିତ ଭାବରେ ଆମେ ଜିଲ୍ଲାପାଳଙ୍କୁ ଜଣାଇଛୁ । ସେହି ନାଳରେ ଅଧିକ ଟଙ୍କା ଖର୍ଚ୍ଚର ଆବଶ୍ୟକତା ରହିଛି । ଯାହାକି ବ୍ଲକ ତରଫରୁ ଦେବା ଅସମ୍ଭବ, ତେଣୁ ଅନ୍ୟ ବିଭାଗ ଦ୍ୱାରା ମଞ୍ଜୁର କରାଯାଇ କିଭଳି ପୋଲ ନିର୍ମାଣ ହୋଇ ପାରିବ ସେ ନେଇ ବ୍ୟବସ୍ଥା କରାଯିବ ବୋଲି କହିଛନ୍ତି । ତେବେ ତୁରନ୍ତ ଏହି କୁଚେଣ୍ଡି ନାଳରେ ପୋଲ ନିର୍ମାଣ କରିବାକୁ ୮ଖଣ୍ଡ ଗ୍ରାମବାସୀଙ୍କ ସହ ଅଞ୍ଚଳବାସୀ ଦାବି କରିଛନ୍ତି ।