ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ପୁଷ୍ଟି ଯୋଜନା ଦିଗହରା

  ରାଜନଗର: ରାଜନଗର ବ୍ଲକରେ ମୁଖ୍ୟମନ୍ତ୍ରୀ ସଂପୂର୍ଣ୍ଣ ପୁଷ୍ଟି ଯୋଜନା ଦିଗହରା ହୋଇଥିବା ଅଭିଯୋଗ ହୋଇଛି । ଏହି ବ୍ଲକ ସାତଭୟା ପଞ୍ଚାୟତରେ ମୁଖ୍ୟମନ୍ତ୍ରୀ ସଂପୂର୍ଣ୍ଣ ପୃଷ୍ଟି ଯୋଜନାରେ ପାଉଥିବା ଟିଏଚ୍ଆର ସାମଗ୍ରୀ ତିନିମାସ ହେବ ହିତାଧିକାରୀଙ୍କୁ ମିଳିନଥିବା ଅଭିଯୋଗ ହୋଇଛି । ଖାଲି ସେତିକି ନୁହେଁ, ମାର୍ଚ୍ଚ ୩୦ତାରିଖ ସନ୍ଧ୍ୟା ସୁଦ୍ଧା ମୁଢି, ଭଜା ଶୋଲା, ଖଜୁରୀ, ରାଶିଲଡୁ (ଟିଏଚଆର) ସାମଗ୍ରୀ ଦିଆଯାଇ ନଥିବା ଜଣାପଡିଛି । ଏପରିକି ଏହି ସାମଗ୍ରୀ ହିତାଧିକାରୀଙ୍କୁ ଜାନୁୟାରୀ, ଫେବୃୟାରୀ ଓ ମାର୍ଚ୍ଚ ମାସର ନଦେଇ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟରୁ ଠିକାସଂସ୍ଥା ଦୁଇମାସର ବିଲ୍ ହାତେଇ ନେଇଥିବା ମଧ୍ୟ ଅଭିଯୋଗ ହୋଇଛି । ସାତଭାୟା ପଞ୍ଚାୟତର ସାତଭାୟା, କାନପୁର, ବରାହିପୁର, ମଗରକନ୍ଦା, ବଗପାଟିଆ, ଚାରିଘରିଆ ଅଙ୍ଗନୱାଡି କେନ୍ଦ୍ରର ହିତାଧିକାରୀଙ୍କୁ ଦିଆଯାଇ ନଥିବା ନେଇ କବିତା ମାନ୍ନା, ଆରତୀ ପାଳ, ପୂର୍ଣ୍ଣିମା ସାମଲ, ଲକ୍ଷ୍ମୀପ୍ରିୟା ପରିଡା, ଗୁରୁବାରୀ ସାମଲ ପ୍ରମୁଖଙ୍କ ସହ ୱାର୍ଡ ସଭ୍ୟ ସୁକାନ୍ତ ସାମଲ ଓ ନିରଞ୍ଜନ ସେଠୀ ଅଭିଯୋଗ କରିଛନ୍ତି । ଏ ସମ୍ପର୍କରେ ରାଜନଗର ସିଡିପିଓ ଦାୟିତ୍ୱରେ ଥିବା ପଟ୍ଟାମୁଣ୍ଡାଇ ସିଡିପିଓ ଲକ୍ଷ୍ମୀମଣି ସିଂଙ୍କ ଦୃଷ୍ଟି ଆକର୍ଷଣ କରିବାରୁ ସେ ଏ ବିଷୟରେ ଜାଣିନାହିଁ କିମ୍ବା ସେକ୍ଟର ସୁପରଭାଇଜର ମୋତେ ଅବଗତ କରିନାହାନ୍ତି ବୋଲି କହିଥିଲେ ।ା ଘଟଣାକୁ ଅନୁଧ୍ୟାନ କରିବି ବୋଲି କହିଛନ୍ତି । ଜାନୁୟାରୀ ଓ ଫେବୃୟାରୀ ଦୁଇମାସର ବିଲ କିପରି ଜିଲ୍ଲା କାର୍ଯ୍ୟାଳୟକୁ ପଠାଇଯାଇଛି ପ୍ରଶ୍ନର ଉତରରେ ସେକ୍ଟର ସୁପରଭାଇଜରମାନେ କ୍ଲିୟରାନ୍ସ ଦେବା ପରେ ହିଁ ଅନୁମୋଦନ କରାଯାଇଛି ବୋଲି କହିଥିଲେ । ଏନେଇ ସେକ୍ଟର ସୁପରଭାଇଜର ବିଜୟାଲକ୍ଷ୍ମୀ ସ୍ୱାଇଁଙ୍କୁ ପଚାରିବାରୁ ମୁଁ ତିନିମାସର କୌଣସି କ୍ଲିୟରାନ୍ସ ଦେଇନାହିଁ । ବିଲ ଅନୁମୋଦନ ହୋଇଥିବା ମୁଁ ଜାଣିନାହିଁ । ତିନିମାସର ଏମଏସପି ଯୋଜନାରେ ଟିଏଚଆର ସାମଗ୍ରୀ ପାଇନଥିବା ଜାଣିଛି ଓ ଅଫିସରେ ସୂଚନା ଦେଇଛି ବୋଲି ସଫେଇ ଦେଇଥିଲେ । ଏଠାରେ ପ୍ରଶ୍ନ ଉଠୁଛି ଯେ, ସିଡିପିଓଙ୍କ କଥା ଠିକ ନାଁ ସେକ୍ଟର ସୁପରଭାଇଜରଙ୍କ କଥା ଠିକ୍ । ଦୁଇଜଣଙ୍କ କଥାରେ ତାଳମେଳ ନଥିବାରୁ ଜାଲ୍ ବିଲ୍ ହେଲା କିପରି? କାହା ନିଦେ୍ର୍ଦଶରେ ବିଲ୍ ଜିଲ୍ଲା ସମାଜ ମଙ୍ଗଳ ଅଧିକାରିଣୀଙ୍କ କାର୍ଯ୍ୟାଳୟକୁ ପଠାଯାଇଛି, ତାହା ତଦନ୍ତ ସାପେକ୍ଷ । ଏହି ଜାଲ୍ଲ ବିଲ୍ ଘଟଣାରେ ସଂପୃକ୍ତ ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠନ ଗ୍ରହଣ କରିବା ପାଇଁ ପଞ୍ଚାୟତବାସୀ ଦାବି କରିଛନ୍ତି ।