ରାଜ୍ୟସଭା ନିର୍ବାଚନରେ ପୁଣି ବିଜେପି-ବିଜେଡ଼ି ମେଣ୍ଟ! ଦିଲ୍ଲୀପ ଯଦି ଚତୁର୍ଥ ପ୍ରାର୍ଥୀ ହୁଅନ୍ତି...

ଭୁବନେଶ୍ୱର:  ୨୦୨୬ ଅପ୍ରେଲ  । ଅବଶ୍ୟ ଆଉ ୮ ମାସ ଅଛି  । ହେଲେ  ରାଜନୀତିରେ ବହୁ ପୂର୍ବରୁ ଯୋଜନା ପ୍ରସ୍ତୁତ ହୁଏ  । ଆଗାମୀ ଅପ୍ରେଲ ମାସରେ ରାଜ୍ୟ ରାଜନୀତିରେ ନୂଆ ସମୀକରଣ ସୃଷ୍ଟିହେବାର ସମ୍ଭାବନା ରହିଛି  । କାହିଁକିନା ସେତେବେଳେ ରାଜ୍ୟସଭା ନିର୍ବାଚନ ହେବ  । ଏକାଥରେ ୪ ରାଜ୍ୟସଭା ସାଂସଦଙ୍କ କାର୍ଯ୍ୟକାଳ ସରୁଥିବାରୁ ବିଜେପି ଓ ବିଜେଡ଼ି କାହାକୁ ପଠାଇବେ ତାହାକୁ ନେଇ ଏବେଠୁ ଚର୍ଚ୍ଚା ଆରମ୍ଭ ହୋଇଗଲାଣି  । 
୨୦୨୬ ଅପ୍ରେଲରେ ମୁନ୍ନା ଖାଁ, ନିରଞ୍ଜନ ବିଶି, ସୁଜିତ କୁମାର ଓ ମମତା ମହନ୍ତଙ୍କର କାର୍ଯ୍ୟକାଳ ଶେଷ ହେଉଛି  । ଏମାନଙ୍କ ମଧ୍ୟରୁ କେହିବି ରିପିଟ୍ ହେବେନାହିଁ  । ବିଧାନସଭାରେ ବିଜେପିର ୭୮ ବିଧାୟକ ଅଛନ୍ତି  । ୩ ସ୍ୱାଧୀନ ବିଧାୟକଙ୍କୁ ମିଶାଇଲେ ତାହା ୮୧  । ସେହିପରି ବିଜେଡ଼ି ପାଖରେ  ୫୧ ବିଧାୟକ ଥିବାବେଳେ କଂଗ୍ରେସର ୧୪ ଓ ସିପିଏମର ଜଣେ ବିଧାୟକ ଅଛନ୍ତି  । ରାଜ୍ୟସଭା ସାଂସଦ ହେବା ପାଇଁ ୩୦ ଭୋଟର ଆବଶ୍ୟକତା ରହିଛି  । ଅର୍ଥାତ୍ ବିଜେପି ନିଜ ଦମ୍ରେ ୨ ଜଣଙ୍କୁ ରାଜ୍ୟସଭା ସାଂସଦ ଭାବେ ଜିତାଇପାରିବ  । ତେବେ ୬୦ ଭୋଟ୍ ଯିବା ପରେ ବିଜେପି ପାଖରେ ଆଉ ୨୧ ଭୋଟ ବଳିବ  । ସେହିପରି ବିଜେଡ଼ି ନିଜ ଦମ୍ରେ ଜଣଙ୍କୁ ରାଜ୍ୟସଭାକୁ ପଠାଇପାରିବ  । ୫୧ ଭୋଟରୁ ୩୦ ଗଲେ ବିଜେଡ଼ି ପାଖରେ ବି ଆଉ ୨୧ ଭୋଟ୍ ବଳିବ  । ନା ବିଜେପି ନା ବିଜେଡ଼ି କାହା ପାଖରେ ବି ରାଜ୍ୟସଭା ସାଂସଦ ଜିତାଇବାକୁ ଶକ୍ତି ନାହିଁ  । ଏଭଳି କ୍ଷେତ୍ରରେ କଂଗ୍ରେସ ପାଖରେ ହିଁ ଚାବିକାଠି  । ଯଦି ବିଜେଡ଼ି ଓ କଂଗ୍ରେସ ଜଣେ ଅଣରାଜନୈତିକ ବ୍ୟକ୍ତିଙ୍କୁ ପ୍ରାର୍ଥୀ କରନ୍ତି ତେବେ ଜିତାଇପାରିବେ  ।  ତେବେ ଜଣେ ଅଣ ରାଜନୈତିକ ବ୍ୟକ୍ତିଙ୍କୁ ପ୍ରାର୍ଥୀ କରି ଯଦି ବିଜେଡ଼ି ଓ କଂଗ୍ରେସ ମିଳିତ ଭାବେ ଜିତାନ୍ତି ତେବେ ବିଜେଡ଼ିର କ୍ଷତି ହେବ  । କାହିଁକିନା ବିଜେଡ଼ି-କଂଗ୍ରେସ ମେଣ୍ଟ ନେଇ ବି ଚର୍ଚ୍ଚା ଜୋର ଧରିପାରେ  । ସେହିପରି ଅତୀତରେ ବିଜେପି ପ୍ରାର୍ଥୀଙ୍କୁ ବିଜେଡ଼ି ସମର୍ଥନ କରିବାର ନଜିର ରହିଛି  । ଯାହାକୁ ନେଇ ଦଳ ଘାଟାରେ ପଡ଼ିଛି ବୋଲି ଅନେକ ବରିଷ୍ଠ ବିଜେଡ଼ି ନେତା ଖୋଲାଖୋଲି ମତ ଦେଉଛନ୍ତି  । ବିଜେପି-ବିଜେଡ଼ି ମେଣ୍ଟ ଚର୍ଚ୍ଚା ଯୋଗୁଁ ଗତ ନିର୍ବାଚନରେ ଅବଶ୍ୟ ବିଜେଡ଼ିକୁ ବହୁମୂଲ୍ୟ ଦେବାକୁ ପଡ଼ିଛି  ।
ଏଭଳି ରାଜନୀତିକ ସମୀକରଣକୁ ଲକ୍ଷ୍ୟ କଲେ ଅନେକ ଦିଲ୍ଲୀପ ରାୟଙ୍କ ନାମକୁ ନେଇ ଚର୍ଚ୍ଚା ଆରମ୍ଭ କରିଦେଇଛନ୍ତି  । ରାଜନୀତିକ ମହଲରେ ହେଉଥିବା ଆଲୋଚନା ଅନୁଯାୟୀ, ଏବେ ବିଜେପିରେ ଅଛନ୍ତି ଦିଲ୍ଲୀପ ରାୟ  । ଗୋଟିଏ ରାଜ୍ୟସଭା ଆସନ  ବିଜେଡ଼ି-କଂଗ୍ରେସ କାହିଁକି ନେଇଯିବେ, ଆମେ କାହିଁ ନେବୁନି ଏକଥା ବି ବିଜେପିର କେନ୍ଦ୍ରୀୟ ନେତାମାନେ ଚିନ୍ତା କରିପାରନ୍ତି  । ଯଦି ବିଜେପି ଦିଲ୍ଲୀପ ରାୟଙ୍କୁ ପ୍ରାର୍ଥୀ କରେ ତେବେ ସେ ନିଶ୍ଚିତ ବିଜୟୀ ହୋଇପାରିବେ  । ଏମିତିବି ନବୀନଙ୍କ ସହ ତାଙ୍କର ଘନିଷ୍ଠ ସମ୍ପର୍କ ରହିଛି  । ବିଜେଡ଼ି ରାଜନୀତି ଠାରୁ ଦୂରେଇ ରହିଥିଲେବି ନବୀନଙ୍କ ମନରୁ କିନ୍ତୁ ଦିଲ୍ଲୀପ ଦୂରେଇ ନାହାନ୍ତି  । ଅନେକବାର ଉଭୟ ନେତା ଆଲୋଚନା କରିବାର ନଜିର ବି ରହିଛି  । ବିଜେପି ଯଦି ଦିଲ୍ଲୀପଙ୍କୁ ପ୍ରାର୍ଥୀ କରେ ଓ ବିଜେଡ଼ି ସମର୍ଥନ କରେ ତେବେ ବିଜେଡ଼ିର ବରିଷ୍ଠ ନେତାମାନେ ବି ଅସନ୍ତୋଷ ପ୍ରକାଶ କରିବେ ନାହିଁ  । କାହିଁକିନା ଜନତା ଦଳ ଅମଳରୁ ସେମାନଙ୍କ ସହ ଦିଲ୍ଲୀପଙ୍କର ଭଲ ସମ୍ପର୍କ ରହିଛି  । ଫଳରେ ଉଭୟ ବିଜେପି ଓ ବିଜେଡ଼ି ଫାଇଦାରେ ରହିପାରିବେ  ।