ଶୌଚ ହେବାକୁ ଯାଇ ରିଟେଲର ନିଖୋଜ: କୁମ୍ଭୀର ଟାଣି ନେଇଥିବା ସନେ୍ଦହ
Rasmita Behera
ରାଜନଗର : ରାଜନଗର ବ୍ଲକ ରାଜପୁର ଗ୍ରାମର ରିଟେଲର ଚନ୍ଦ୍ରଭାନୁ ରଥ(୫୫) ଗୁରୁବାର ସକାଳେ ବ୍ରାହ୍ମଣୀ ନଦୀକୁ ଶୌଚ ହେବା ଯାଇ ନିଖୋଜ ହୋଇଯାଇଥିଲେ । ଦୀର୍ଘ ସମୟ ଧରି ସେ ଘରକୁ ନଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ । ନଦୀକୂଳରେ ଥିବା ପଥର ସ୍ପର ଉପରେ ତାଙ୍କର ଚପଲ ରହିଥିବା ଦେଖିବାକୁ ପାଇଥିଲେ । ଏହାପରେ ଚନ୍ଦ୍ରଭାନୁ ନଦୀରେ ବୁଡି ଯାଇଛନ୍ତି ନା କୁମ୍ଭୀର ଟାଣି ନେଇଛି ସନେ୍ଦହ ପ୍ରକାଶ ପାଇଥିଲା । ସ୍ଥାନୀୟ ଲୋକେ ରାଜନଗର ଥାନା, ଅଗ୍ନିଶମ ବାହିନୀ ଓ ବନବିଭାଗକୁ ଖବର ଦେଇଥିଲେ । ଫରେଷ୍ଟର ବିଜୟକୁମାର ପାତ୍ରଙ୍କ ନେତୃତ୍ୱରେ କର୍ମଚାରୀ ସୁବାଷ ମାଝି, ବିଶ୍ୱରଞ୍ଜନ ତରାଇ, ଚନ୍ଦନ ମଳିକ, ମନୋରଞ୍ଜନ ସାହୁ ନଦୀର ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ । ରାତି ପର୍ଯ୍ୟନ୍ତ ପାଇନଥିବା ନେଇ ଫରେଷ୍ଟର ଶ୍ରୀ ପାତ୍ର ସୂଚନା ଦେଇଛନ୍ତି ।
ଅପରପକ୍ଷରେ ଅଗ୍ନିଶମ ବାହିନୀ ପହଞ୍ଚô ନଦୀରେ ଖୋଜାଖୋଜି କରିଥିଲେ ମଧ୍ୟ ନପାଇ ଫେରି ଆସିଥିଲେ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଆଶଙ୍କା ପ୍ରକାଶ ପାଇଛି । ଏନେଇ ରାଜନଗର ଥାନାରେ ତାଙ୍କ ପୁଅ ଚିରଞ୍ଜୀବୀ ରଥ ପିତା ଚନ୍ଦ୍ରଭାନୁ ସକାଳୁ ଶୌଚ ହେବାକୁ ଯାଇ ନଫେରିବାରୁ ଆମେ ତାଙ୍କୁ ଖୋଜୁଥିବା ବେଳେ ନଦୀକୂଳରେ ତାଙ୍କର ଚପଲ ପାଇଥିଲୁ । ସେ ନଦୀରେ ବୁଡି ଯାଇଛନ୍ତି କିମ୍ବା କୁମ୍ଭୀର ଟାଣି ନେଇଛି ବୋଲି ସନେ୍ଦହ କରୁଥିବା ଦର୍ଶାଇଛନ୍ତି ।
