ସଫଳ କ୍ରୀଡ଼ାବିତଙ୍କୁ ସମ୍ବର୍ଦ୍ଧିତ କ୍ରୀଡ଼ାବିତ୍ମାନେ ଆମ ଗର୍ବ ଓ ଗୌରବ
Rasmita Behera
ଭୁବନେଶ୍ୱର : ଆଜି ଓଡ଼ିଶା କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ବିଭିନ୍ନ କ୍ରୀଡ଼ା ପ୍ରତିଯୋଗିତାମାନଙ୍କରେ ପଦକ ହାସଲ କରିଥିବା ସଫଳ କ୍ରୀଡ଼ାବିତମାନଙ୍କୁ ସମ୍ବର୍ଦ୍ଧିତ କରାଯାଇଛି । ଆଜିର କାର୍ଯ୍ୟକ୍ରମରେ ୨୪ଟି କ୍ରୀଡା ବର୍ଗରେ ପ୍ରାୟ ୧୬୫ କ୍ରୀଡ଼ାବିତମାନଙ୍କୁ ୬୬ ଲକ୍ଷରୁ ଉର୍ଦ୍ଧ୍ୱ ପୁରସ୍କାର ରାଶି ପ୍ରଦାନ କରାଯାଇଛି । ଆଥଲେଟିକ୍ସ, ଚେସ୍, ସାଇକ୍ଲିଙ୍ଗ, ହକି, କରାଟେ, ଖୋଖୋ, ରୋଲ ବଲ୍, ରଗବୀ, ଶୁଟିଙ୍ଗ, ସଫ୍ଟ ବଲ୍, ସନ୍ତରଣ, ଟାଇକ୍ୱାଣ୍ଡୋ, ଟେନିସ, ପେଣ୍ଟାଥଲନ, ଭାରତ୍ତୋଳନ, ଉସୁ, ଟ୍ରାଇଥଲନ୍, ପାରା-ଜୁଡୋ, ପାରା-ସନ୍ତରଣ ଆଦି ସର୍ବମୋଟ ୨୪ଟି କ୍ରୀଡ଼ାବର୍ଗର କ୍ରୀଡ଼ାବିତମାନଙ୍କୁ ପୁରସ୍କାର ରାଶି ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଛି । ଏଥିସହିତ ୮ଜଣ ପର୍ବତାରୋହୀ (ପ୍ରତ୍ୟେକ ପର୍ବତାରୋହୀଙ୍କୁ ୨ ଲକ୍ଷ ଟଙ୍କା ଲେଖାଏଁ) ସମ୍ବର୍ଦ୍ଧନା ପୁରସ୍କାର ରାଶି ମଧ୍ୟ ପ୍ରଦାନ କରାଯାଇଛି ।
ଏହି ଅବସରରେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି କି, ଆମ କ୍ରୀଡ଼ାବିତମାନେ ହେଉଛନ୍ତି ଆମ ଗର୍ବ ଓ ଗୌରବ । ଓଡ଼ିଶାର କ୍ରୀଡ଼ାବିତମାନେ ବିଭିନ୍ନ କ୍ରୀଡ଼ା ପ୍ରତିଯୋଗିତାମାନଙ୍କରେ ନିଜର ଉଲ୍ଲେଖନୀୟ ପ୍ରଦର୍ଶନ ମାଧ୍ୟମରେ ଆମକୁ ଗୌରବାନିତ୍ୱ କରିଛନ୍ତି । ଆମ କ୍ରୀଡ଼ାବିତମାନଙ୍କ ପାଇଁ ଓଡ଼ିଶା ଆଜି ବିଶ୍ୱ ସ୍ତରରେ କ୍ରୀଡ଼ାକ୍ଷେତ୍ରରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ଆଜିର କାର୍ଯ୍ୟକ୍ରମରେ ସମ୍ବର୍ଦ୍ଧିତ ହୋଇଥିବା କ୍ରୀଡ଼ାବିତମାନେ ମଧ୍ୟ କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ପ୍ରଦାନ କରାଯାଇଥିବା ସମ୍ବର୍ଦ୍ଧନା ପୁରସ୍କାର ରାଶି ପାଇ ନିଜର ଖୁସିବ୍ୟକ୍ତ କରିବା ସହିତ ଏହା ଆଗାମୀ ଦିନରେ ସେମାନଙ୍କୁ ଆହୁରି ଭଲ ପ୍ରଦର୍ଶନ କରିବା ପାଇଁ ପ୍ରେରଣା ଯୋଗାଇବ ବୋଲି ମତପ୍ରକାଶ କରିଛନ୍ତି ।
