ପଡୋଶୀ ମହିଳାଙ୍କୁ ମରଣାନ୍ତକ ଆକ୍ରମଣ; ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୨୬ ।୧୧ : ପୂର୍ବ ଶତ୍ରୁତାକୁ କେନ୍ଦ୍ର କରି ପଡୋଶୀ ମହିଳା ଓ ତାଙ୍କ ଶାଶୁଙ୍କୁ ଲୁହାରଡ଼ରେ ମରଣାନ୍ତକ ଆକ୍ରମଣ । ଏନେଇ ଖଣ୍ଡଗିରି ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ହେଲେ, ନୟାଗଡ଼ ଜିଲ୍ଲାର ପ୍ରଫୁଲ ପ୍ରଧାନ । ଏଠାରେ ସେ ଖଣ୍ଡଗିରି ଥାନା ଅଧିନ ସୁବାସ ନଗର ବସ୍ତିରେ ରହି ଆସୁଥିଲେ ।
ସୂଚନା ଯୋଗ୍ୟଯେ, ଅଭିଯୋଗକାରିଣୀ ଓ ଅଭିଯୁକ୍ତଙ୍କ ପରିବାର ସଦସ୍ୟଙ୍କ ସହିତ ପୂର୍ବରୁ ଶତ୍ରୁତା ଲାଗିରହିଥିଲା । ଏନେଇ ଦୁଇ ପରିବାରଙ୍କ ମଧ୍ୟରେ ଅନେକ ସମୟରେ ଝଗଡା ଲାଗିରହିଥିଲା । ସବୁଦିନ ପରି ଗତ ୨୫ ତାରିଖ ରାତିରେ ଅଭିଯୁକ୍ତଙ୍କର ସ୍ତ୍ରୀ ଓ ଅଭିଯୋଗକାରିଣୀଙ୍କ ମଧ୍ୟରେ ଝଗଡା ଆରମ୍ଭ ହୋଇଥିଲା । ଏଥିରେ ଅଭିଯୁକ୍ତ ଜଣଙ୍କ ରାଗିଯାଇ ଏକ ଲୁହା ରଡ ପାଇପରେ ଅଭିଯୋଗକାରିଣୀଙ୍କୁ ହତ୍ୟା ଉଦେଶ୍ୟରେ ଆକ୍ରମଣ କରିଥିଲେ । ସେହି ସମୟରେ ଅଭିଯୋଗକାରିଣୀଙ୍କ ଶାଶୁ ଅଭିଯୁକ୍ତଙ୍କ କବଳରୁ ଅଭିଯୋଗକାରିଣୀଙ୍କୁ ଉଦ୍ଧାର କରିବା ପାଇଁ ଆଗକୁ ଆସିଥିବାରୁ ଅଭିଯୁକ୍ତ ତାଙ୍କୁ ମଧ୍ୟ ଲୁହା ପାଇପରେ ଆକ୍ରମଣ କରିଥିଲେ ଏବଂ ଉଭୟେ ଅଭିଯୁକ୍ତ ଓ ତାଙ୍କ ସ୍ତ୍ରୀ ମିଶି ଅଭିଯୋଗକାରିଣୀ ଓ ତାଙ୍କ ଶାଶୁଙ୍କୁ ହତ୍ୟା ଧମକ ଦେଇଥିଲେ । ଫଳରେ ଅଭିଯୁକ୍ତଙ୍କ ଆକ୍ରମଣରେ ଦୁଇଜଣ ଆହତ ହୋଇଥିବା ସହିତ ଦୁହିଁଙ୍କ ମୁଣ୍ଡରେ ଗଭୀର ଆଘାତ ଲାଗି ରକ୍ତ ସ୍ରାବ ହୋଇଥିଲା । ଉଭୟଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲକୁ ପଠାଯାଇ ଚିକିତ୍ସା କରାଯାଇଥିଲା । ପରେ ଏନେଇ ଖଣ୍ଡଗିରି ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
