ପାହାଡରୁ ପଥର ଖସି ଯାତାୟାତ ବାଧାପ୍ରାପ୍ତ
Rasmita Behera
ାା ପ୍ରଭାନୁ୍ୟଜ୍ ।ା ମାଲକାନଗିରି: ଚିତ୍ରକୋଣ୍ଡା ବ୍ଲକ ସ୍ୱାଭିମାନ ଅଞ୍ଚଳ ଯନ୍ତ୍ରୀ ପଞ୍ଚାୟତ ମାରିୱାଡା ଠାରୁ ଯନ୍ତ୍ରୀ ପଞ୍ଚାୟତକୁ ଯୋଗା ଯୋଗ ବିଛିନ୍ନ ହୋଇଛି । ପାହାଡରୁ ପଥର ଖଣ୍ଡ ଖସି ରାସ୍ତାରେ ପଡ଼ିଛି ଯାହାଫଳରେ ଯାତାୟାତ ବାଧାପ୍ରାପ୍ତ ହୋଇଛି । ଯାହାଫଳରେ ୧୩ ଟି ଗ୍ରାମର ଶତାଧୀକ ଲୋକ ବାହ୍ୟଜଗତରୁ ବିଚ୍ଛିନ୍ନ ହୋଇ ଯାଇଛନ୍ତି । କିଛି ଦିନ ହେବ ମାଲକାନଗିରି ଜିଲ୍ଲାରେ ଲାଗି ରହିଥିବା ବର୍ଷା ହେତୁ ପାହାଡରୁ ବଡ ବଡ ପଥର ଖଣ୍ଡ ଖସି ରାସ୍ତାରେ ପଡି ରହିଛି । ଯନ୍ତ୍ରୀ ପଞ୍ଚାୟତର ୧୩ଟି ଗ୍ରାମର ଲୋକେ ଯାତାୟାତ ପାଇଁ ଏହି ରାସ୍ତା ଉପରେ ନିର୍ଭର କରିଥାନ୍ତି । ପୂର୍ବରୁ ଯନ୍ତ୍ରୀ ପଞ୍ଚାୟତକୁ ଯିବାକୁ ହେଲେ ଚିତ୍ରକୋଣ୍ଡା ଲଞ୍ଚ ଘାଟଠାରୁ ଲଞ୍ଚ ଯୋଗେ ଆଠ ଘଣ୍ଟା ଯାତ୍ରା କରିବାକୁ ପଡିଥାଏ । ନଚେତ କୋଡିଗନ୍ଧୀଠାରୁ ସନ୍ୟାସୀ ଗୁଡା ଓ ଭାଜାଗୁଡା ଦେଇ ଯନ୍ତ୍ରୀ ପଞ୍ଚାୟତକୁ ଯିବାକୁ ପଡିଥାଏ । କିନ୍ତୁ ପ୍ରତିବର୍ଷ ବର୍ଷା ଦିନେ ବାଲିମେଳା ଜଳଭଣ୍ଡାରର ଜଳସ୍ତର ବଢିବା ଯୋଗୁଁ ଏହି ରାସ୍ତା ମଧ୍ୟ ସମ୍ପୂର୍ଣ ପାଣିରେ ବୁଡ଼ିଯାଇଛି । ଏହି ସବୁ ଅସୁବିଧା ଯୋଗୁଁ ସ୍ଥାନୀୟ ଲୋକଙ୍କ ଦୀର୍ଘ ଦିନର ଦାବି ପରେ ମାରିୱାଡାଠାରୁ ଯନ୍ତ୍ରୀ ପର୍ଯ୍ୟନ୍ତ ଏକ ନୂତନ ରାସ୍ତା ନିର୍ମାଣ କରାଯାଇଥିଲା ମାତ୍ର ଗତ କିଛିଦିନ ହେଲା ଜିଲ୍ଲାରେ ଲାଗିରହିଥିବା ଲଗାଣ ବର୍ଷା ଯୋଗୁଁ ପାହାଡରୁ ପଥର ଖଣ୍ଡ ଖସି ଗତକାଲିଠାରୁ ରାସ୍ତାଟି ସମ୍ପୂର୍ଣ ରୂପେ ବନ୍ଦ ହୋଇଯାଇଛି । ଏଥିଯୋଗୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏପରିକି ଅତ୍ୟାବଶ୍ୟକ ସ୍ଥଳେ ମେଡିକାଲ ବି ଯାଇ ପାରୁ ନାହାନ୍ତି । ତେଣୁ ତୁରନ୍ତ ମାଲକାନଗିରି ଜିଲ୍ଲା ପ୍ରଶାସନ ପଦକ୍ଷେପ ଗ୍ରହଣ କରି ରାସ୍ତାରୁ ପଥର ଖଣ୍ଡ ହଟାଇବାକୁ ଯନ୍ତ୍ରୀ ପଞ୍ଚାୟତବାସୀ ଦାବି କରିଛନ୍ତି ।
