ବିଜେପି ଛାଡ଼ିଲେ ବିକ୍ରମ
Editor
ବିଭିନ୍ନ କାରଣକୁ ନେଇ ଅସନ୍ତୁଷ୍ଟ ଥିବା ବିଜେପି ନେତା-କାର୍ଯ୍ୟକର୍ତ୍ତା ଦଳ ଛାଡ଼ିବାରେ ଲାଗିଛନ୍ତି । ଦୁଇଦିନ ତଳେ ବିଶ୍ୱଜିତ ନାୟକ ବିଜେପି ଛାଡ଼ିଥିବା ବେଳେ ଗଲାକାଲି ଯାଜପୁର ଲୋକସଭା ନିର୍ବାଚନ ମଣ୍ଡଳୀ ସଂଯୋଜକ ବିକ୍ରମ ବିଶ୍ୱାଳ ବିଜେପିରୁ ଇସ୍ତଫା ଦେଇଛନ୍ତି । କୋରେଇ ବିଧାନସଭା କ୍ଷେତ୍ରର ବିକ୍ରମ ହେଉଛନ୍ତି ବିଶ୍ୱଜିତ ନାୟକଙ୍କ ଖାସ ଅନ୍ତରଙ୍ଗ । ବିଭିନ୍ନ ନିର୍ବାଚନ ମଣ୍ଡଳୀରେ ବିଶ୍ୱଜିତଙ୍କ ରଣନୀତିକାର ଭାବେ କାର୍ଯ୍ୟ କରିଥିବା ବିକ୍ରମ ଜଣେ ଯୁବ ସଂଗଠକ । ଚଳିତ ନିର୍ବାଚନରେ ଲୋକସଭା ପ୍ରାର୍ଥୀଙ୍କ ପାଇଁ ବିଭିନ୍ନ ନିର୍ବାଚନମଣ୍ଡଳୀକୁ ଯାଇ ଭୋଟ ପ୍ରଚାର କରିଛନ୍ତି । ତେବେ ଦଳ କୋରେଇ କ୍ଷେତ୍ରରେ ନେଇଥିବା ନିଷ୍ପତିକୁ ସେ ଗ୍ରହଣ କରିପାରି ନଥିଲେ । ବିଶ୍ୱଜିତଙ୍କୁ ପ୍ରାର୍ଥୀ କରିବା ବଦଳରେ ଦଳ ବିଜେଡ଼ିରୁ ଡ଼େଇଁ ଆସିଥିବା ଆକାଶ ଦାସନାୟକଙ୍କୁ ପ୍ରାର୍ଥୀ କରିବା ପରେ ଏକ ପ୍ରକାର ଅସନ୍ତୁଷ୍ଟ ରହିଥିଲେ । ଲୋକସଭା ନିର୍ବାଚନମଣ୍ଡଳୀ ସଂଯୋଜକ ପଦ ଦେଇ ବିକ୍ରମଙ୍କୁ ସନ୍ତୁଷ୍ଟ କରିବାକୁ ଚେଷ୍ଟା କରାଯାଇଥିଲେ ହେଁ ତାହା ତାଙ୍କ ଉପରେ କୌଣସି ପ୍ରଭାବ ପକାଇପାରିନି । ବିଶ୍ୱଜିତଙ୍କ ପଦାଙ୍କ ଅନୁକରଣ କରି ବିକ୍ରିମ ପଦ ଏବଂ ଦଳରୁ ଇସ୍ତଫା ଦେଇଥିବା ବେଳେ ଇସ୍ତଫା ପତ୍ର ରାଜ୍ୟ ସଭାପତି ମନମୋହନ ସାମଲଙ୍କ ପାଖକୁ ପଠାଇ ଦେଇଛନ୍ତି । ବିକ୍ରମ ବିଶ୍ୱଜିତଙ୍କ ସହ ବିଜେଡ଼ିରେ ମିଶିବେ ବୋଲି ସୂତ୍ରରୁ ଜଣାପଡ଼ିଛି ।
