ଡ୍ରେନେଜ ଡିଭିଜନର ମନମୁଖୀ କାର୍ଯ୍ୟ : ପଙ୍କୋଦ୍ଧାର ନାଁରେ ଟଙ୍କା ଲୁଟ୍ ଉଦ୍ୟମ

 ରାଜନଗର : ରାଜନଗର ବ୍ଲକ୍ ଚାନ୍ଦିବାଉଁଶମୂଳ-ଗୁପ୍ତି ପାଟ୍ଟନାଳୀର ଡ୍ରେନେଜ ଡିଭିଜନ ପଙ୍କୋଦ୍ଧାର କାର୍ଯ୍ୟ ଆରମ୍ଭ କରାଯାଉଥିଲା । ପଙ୍କୋଦ୍ଧାର ନାଁରେ ଠିକାସଂସ୍ଥା ଜେସିବି ସାହାର୍ଯ୍ୟରେ କେବଳ ଦଳ ସଫା କରୁଥିବା ଦେଖି ଚାଷୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏହି କାମକୁ ଚାଷୀମାନେ ବନ୍ଦ କରିଦେଇଥିଲେ । ମାତ୍ର ଠିକାସଂସ୍ଥାର ଜେସିବି ଡ୍ରାଇଭର ଚାଷୀଙ୍କୁ ନାଲିଆଖି ଦେଖାଇ ଜେସିବିରେ ମାରିଦେବାକୁ ଧମକ ଦେଇଥିବା ଅଭିଯୋଗ ହୋଇଛି । ୨କୋଟି ୬୦ ଲକ୍ଷ ୪୯ହଜାର ଟଙ୍କା ବ୍ୟୟ ଅଟକଳରେ କରାଯାଉଥିବା ପଙ୍କୋଦ୍ଧାର କାର୍ଯ୍ୟ ଠିକ ଭାବରେ ହୋଇପାରିବ କି ନାହିଁ ଚାଷୀମାନଙ୍କ ମଧ୍ୟରେ ସନେ୍ଦହ ପ୍ରକାଶ ପାଇଛି । କେବଳ ଦଳ ସଫା କରି ଠିକାସଂସ୍ଥା କୋଟିକୋଟି ଟଙ୍କା ହରିଲୁଟ୍ କରିବାକୁ ମସୁଧା ଚଳାଇଥିବା ନେଇ ଚାଷୀମାନେ ଅଭିଯୋଗ କରିଛନ୍ତି । ୨୦୨୨ ମସିହାରେ ମଧ୍ୟ ଅଢେଇ କୋଟିରୁ ଊଦ୍ଧ୍ୱର୍ ଟଙ୍କା ବ୍ୟୟ ଅଟକଳରେ ଏହି ପାଟ୍ଟନାଳୀର ପଙ୍କୋଦ୍ଧାର କରାଯାଇଥିଲା । ଠିକାସଂସ୍ଥା କାଁଭାଁ କାମ କରି କୋଟିକୋଟି ଟଙ୍କା ଲୁଟି ନେଇଥିବାରୁ ଚାଷୀମାନେ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିଲେ । ଚାଷକାର୍ଯ୍ୟ ପ୍ରଭାବିତ ହେବାରୁ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏହି ପାଟ୍ଟନାଳୀ ଉପରେ ଚାନ୍ଦିବାଉଁଶମୂଳ, ଭିତରଗଡ, କଣ୍ଡିରା, କୁରୁଂଟି, ହାତିନା, ଡେରା ଓ ଗୁପ୍ତି ପଞ୍ଚାୟତର ହଜାର ହଜାର ଚାଷୀ ଚାଷକାର୍ଯ୍ୟ ପାଇଁ ନିର୍ଭର କରିଥାନ୍ତି । ବ୍ରାହ୍ମଣୀ ନଦୀର ମଧୁରଜଳ ବାଉଁଶମୂଳ ନିକଟରେ ଏହି ପାଟ୍ଟନାଳୀକୁ ପ୍ରବେଶ କରିଥାଏ । ଯାହା ମାଧ୍ୟମରେ ଏହି ୭ଟି ପଞ୍ଚାୟତର ହଜାର ହଜାର ଚାଷୀ ସୁରୁଖୁରୁରେ ଚାଷ କାର୍ଯ୍ୟ କରିଥାନ୍ତି । ଉଦ୍ବୃତ ବର୍ଷାଜଳ ମଧ୍ୟ ଏହି ପାଟ୍ଟନାଳୀ ମାଧ୍ୟମରେ ପାଟ୍ଟଶାଳା ନଦୀକୁ ନିଷ୍କାସିତ ହୋଇଥାଏ । ଏଭଳି ଏକ ଗୁରୁତ୍ୱପୂର୍ଣ୍ଣ ପାଟ୍ଟନାଳୀର ପଙ୍କୋଦ୍ଧାର ନକରି ଠିକାସଂସ୍ଥା ଦଳସଫା କରୁଥିବାରୁ ସୁନିଲ ପ୍ରଧାନ, ପ୍ରଫୁଲ୍ଲ ସିଂ, ଭୂବନ ବାରିକ, ରାଜେନ୍ଦ୍ର ପ୍ରଧାନ, ଜାମିନୀକାନ୍ତ ବାରିକ, ଅମୂଲ୍ୟ ବିଶ୍ୱାଳ, ବାବୁଲି ମଳିକ, ଶିବାନନ୍ଦ ସେଠୀ, ଦେବେନ୍ଦ୍ର ରାଉଳ ପ୍ରମୁଖଙ୍କ ସହ ବହୁ ଚାଷୀ କାମକୁ ବିରୋଧ କରିଥିଲେ । ଏନେଇ ବିଭାଗୀୟ ସହକାରୀ ଯନ୍ତ୍ରୀ ଧିରେନ୍ଦ୍ର ଜେଠୀଙ୍କ ଦୃଷ୍ଟି ଆକର୍ଷଣ କରିବାରୁ ଛୋଟ ଜେସିବି କାମ କରୁଥିବାରୁ ଚାଷୀଙ୍କ ମଧ୍ୟରେ ପ୍ରତିକ୍ରିୟା ସୃଷ୍ଟି ହୋଇଛି । ବଡ ଜେସିବି ସାହାଯ୍ୟରେ ପଙ୍କୋଦ୍ଧାର କରାଯିବ ବୋଲି କହିଛନ୍ତି ।