ଜୀବନ ପର୍ଯ୍ୟାୟ

ଆଜ୍ଞା ନମସ୍କାର,
ଛୋଟ କଥାର ବଡ ବିଚାର ‘ଅମୃତ ବିନ୍ଦୁ  ।' 'ଅମୃତ ବିନ୍ଦୁ'ର ଆଜିର ଅଧ୍ୟାୟରେ ଆମେ ଅନୁଶୀଳନ ଓ ଅନୁଭବ କରିବା ଜୀବନ ପର୍ଯ୍ୟାୟ ବାବଦରେ କିଛି କଥା  । ଆଜିର କଥାକୁ ଆପଣ ଗ୍ରହଣ କରିବେ, ବିଚାରିବେ ବୋଲି ଆଶା  ।
ଜୀବନରେ ଜଣେ ଯେତେ ସଫଳ ହେଇଥାଉନା ପଛେ, ତା'ର ବି ରହିଛି ଅନେକ ଅଦେଖା ଅସଫଳତାର କାହାଣୀ  । ମଣିଷର ଜୀବନ ହେଉଛି ସଂଘର୍ଷର ଏକ ଲମ୍ବା କାହାଣୀ  । ଯେଉଁ କାହାଣୀ ଆରମ୍ଭରୁ ଶେଷ ଯାଏଁ କେବଳ ସଂଘର୍ଷ ହିଁ ସଂଘର୍ଷ ! ସଂଘର୍ଷର ଶେଷରେ କିନ୍ତୁ ଥାଏ ଜୟ ଓ ପରାଜୟ, ଉଭୟ  । ସବୁ ସଙ୍ଘର୍ଷ ପରେ ଉଭୟଟି ମଧ୍ୟରୁ କୌଣସି ଗୋଟାଏ ରହିଛି  । ସବୁ ସଂଘର୍ଷ ସବୁବେଳେ ବିଜୟ ଆଣି ଦେବ ବୋଲି ଆଶା କରିବା ମଧ୍ୟ ନୁହେଁ  । ସଫଳତା ଏବଂ ବିଫଳତା ଜୀବନର ଦୁଇଟି ପର୍ଯ୍ୟାୟବାଚୀ ଶବ୍ଦ  । ଗୋଟିଏ ପରିସ୍ଥିତି ପାଇଁ କୌଣସି ଏକ ଘଟଣା ସଫଳତା ହୋଇଥିବା ବେଳେ ପରିବର୍ତ୍ତିତ ପରିସ୍ଥିତିରେ ତାହା ହୁଏତ ବିଫଳତା ପ୍ରମାଣିତ ହୋଇପାରେ  । ତେଣୁ କୌଣସି ଏକ ନିର୍ଦ୍ଦିଷ୍ଟ ସଫଳତା ପାଇଁ ଉଲ୍ଲସିତ ହେବା ଉଚିତ୍ ନୁହେଁ କିମ୍ବା କୌଣସି ବି ବିଫଳତାରେ ଦୁଃଖରେ ଭାଙ୍ଗି ପଡିବା ବି ଠିକ୍ ନୁହେଁ  । ସଙ୍ଘର୍ଷ ହେଉଛି କେବଳ ପରିସ୍ଥିତିର ଗୋଟିଏ ଗୋଟିଏ ରୂପ  ।
ସେହି ନିର୍ଦ୍ଦିଷ୍ଟ ପରିସ୍ଥିତି ପାଇଁ ଆମେ ଯାହାକୁ ସଫଳତା ବୋଲି କହୁଛୁ, ପରିବର୍ତ୍ତିତ ଅବସ୍ଥାରେ ତାହା ସହିତ ବିଫଳତା ବି ହୋଇପାରେ  । ବନ୍ୟା ବେଳେ ଭାସି ଯାଉଥିବା କାଠ ଗଣ୍ଡିଟିକୁ ଧରି ପକାଇବା ସେହି ପରିସ୍ଥିତି ପାଇଁ ହୁଏତ ସଫଳତା  । କିନ୍ତୁ ପରିବର୍ତ୍ତିତ ପରିସ୍ଥିତିରେ ଏହି କାଠଗଣ୍ଡିକୁ ଆଶ୍ରୟ କରି ଭାସି ଯାଉଥିବା ସାପଟି ଆମ ସମ୍ମୁଖକୁ ଆସି ଯାଇପାରେ  । ସେତିକି ବେଳକୁ କାଠ ଗଣ୍ଡିଟିକୁ ଧରି ପକାଇବାକୁ ଆମେ ସଫଳତା ବୋଲି କହିପାରିବା କି?
ସଂଘର୍ଷମୟ ଜୀବନରେ ସଫଳତା ବା ବିଫଳତାର କୌଣସି ସର୍ବକାଳୀନ ମୂଲ୍ୟ ନଥାଏ  । ଆମେ ଯାହାକୁ ତକôାଳିକ ପରିସ୍ଥିତିରେ ବନ୍ଧୁ ବୋଲି ଭାବି ସାମୟିକ ସାହାଯ୍ୟ ପାଇଥାଉ, ହୁଏତ ପରବର୍ତ୍ତୀ ସମୟରେ ସେହି ବ୍ୟକ୍ତିଟିକୁ ଆମ ପାଇଁ ଛଳନାକାରୀ ଭାବେ ଉଭା ହେଇପାରେ  ।

ପଢିଥିବା ହେତୁ ଆପଣଂକ ନିକଟରେ କୃତଜ୍ଞ  । ଆସନ୍ତୁ ପ୍ରତ୍ୟେକ ଦିନ ଆମେ ‘ଅମୃତ ବିନ୍ଦୁ' ମାଧ୍ୟମରେ ଜୀବନର କେତେ କଥା ବାବଦରେ ଜାଣିବା  । ନମସ୍କାର ।