ଅଙ୍ଗନବାଡ଼ି କର୍ମୀଙ୍କଠୁ ନେଉଥିଲେ ୮୦ ହଜାର... ସିଡ଼ିପିଓଙ୍କୁ ଧରିଲା ଭିଜିଲାନ୍ସ
Rasmita Behera
ଜୟପୁର/ଭୁବନେଶ୍ୱର: ଗରିବ ଡଙ୍ଗରିଆ କନ୍ଧ ଆଦିବାସୀ ମହିଳାଙ୍କ ଠାରୁ ଲାଞ୍ଚ ନେଉଥିବାବେଳେ ଭିଜିଲାନ୍ସ ଜଣେ ସିଡ଼ିପିଓ ଓ ଜଣେ କିରାଣୀଙ୍କୁ ଧରିବାରେ ସକ୍ଷମ ହୋଇଛି । ଘଟଣାଟି ଏମିତି, ଡଙ୍ଗରିଆ କନ୍ଧ ସମ୍ପ୍ରଦାୟର ଜଣେ ମହିଳା ଅଙ୍ଗନବାଡ଼ି କର୍ମୀଭାବେ ନିଯୁକ୍ତି ପାଇବାକୁ ଚୟନ ହୋଇଥିଲେ । ହେଲେ ନିଯୁକ୍ତି ପତ୍ର ଦେବା ପାଇଁ ତାଙ୍କ ଠାରୁ ଲକ୍ଷେ ଟଙ୍କା ଦାବି କରିଥିଲେ ବିଷମକଟକ ସିଡ଼ିପିଓ ସୁଶୀଳା ସବର । କିରାଣୀ ରାମଚନ୍ଦ୍ର ପାତ୍ରଙ୍କ ଜରିଆରେ ପ୍ରଥମେ ୨୦ ହଜାର ଟଙ୍କା ନେଇଥିବାବେଳେ ପରେ ଆଉ ୮୦ ହଜାର ଟଙ୍କା ଦେବାକୁ ଚାପ ପକାଇଥିଲେ । ଗାଏମୋଟ୍ କହିଲେ ଆଜି ୮୦ ହଜାର ଟଙ୍କା ନେବାକୁ କଥା ଛିଡ଼ିଥିଲା । ହେଲେ ଏନେଇ ସଂପୃକ୍ତ ଅଙ୍ଗନବାଡ଼ି କର୍ମୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ । ସେ ଜଣେ ଗରିବ ଆଦିବାସୀ ମହିଳା ହୋଇଥିବାବେଳେ ଏତେ ଟଙ୍କା ଦେବାକୁ ତାଙ୍କର ସାଧ୍ୟ ନଥିଲା । ଆଜି ଉଭୟ ସିଡ଼ିପିଓ ଓ କିରାଣୀ ତାଙ୍କ ଠାରୁ ଟଙ୍କା ନେଉଥିବାବେଳେ ଭିଜିଲାନ୍ସ ମାଡ଼ି ବସିଥିଲା । ସେମାନଙ୍କ ହାତରୁ କେମିକାଲ ଟଙ୍କା ବି ଜବତ କରାଯାଇଛି । ଭିଜିଲାନ୍ସ ଉଭୟଙ୍କ ନାମରେ ମାମଲା ରୁଜୁ କରିବା ସହ ସେମାନଙ୍କ ଘର ଓ ସମ୍ପତ୍ତି ଉପରେ ଚଢ଼ାଉ ଆରମ୍ଭ କରିଛି । ଉକ୍ତ କିରାଣୀ ଶ୍ରୀ ପାତ୍ର ପୂର୍ବରୁ ମଧ୍ୟ ଅନ୍ୟ ଏକ ଦୁର୍ନୀତିରେ ଜଡ଼ିତ ଥିଲେ । ରାୟଗଡ଼ା ତହସିଲଦାର ଅଫିସରେ ନାଜିର ଭାବେ କାମ କରୁଥିବାବେଳେ ଜାଲ୍ କାଗଜପତ୍ରରେ ସରକାରୀ ଟଙ୍କା ହଡ଼ପ କରିବା ଅଭିଯୋଗରେ ସେ ଗିରଫ ମଧ୍ୟ ହୋଇଥିଲେ । ଏବେବି ମାମଲା ବିଚାରାଧୀନ ରହିଛି ।
