କିନ୍ନରଙ୍କୁ ପରିଚୟ ପତ୍ର ପ୍ରଦାନ
Rasmita Behera
ନବରଙ୍ଗପୁର : ସାଇ କଲ୍ୟାଣ ମଣ୍ଡପରେ ଅନୁଷ୍ଠିତ ସାମାଜିକ ସୁରକ୍ଷା ସାହାଯ୍ୟ କାର୍ଯ୍ୟକ୍ରମରେ ପଞ୍ଚାୟତ ରାଜ୍ୟ ମନ୍ତ୍ରୀ ରବି ନାରାୟଣ ନାୟକ, ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ କରକମଳରେ ନବରଙ୍ଗପୁର ଜିଲ୍ଲାର କିନ୍ନର ସଙ୍ଘରେ ଯୋଗଦାନ କରିଥିବା ଦୁଇଜଣ ନୂତନ କିନ୍ନର ଶିବାନୀ କିନ୍ନର ଏବଂ ରାଧିକା କିନ୍ନରଙ୍କୁ ସରକାରଙ୍କ ଦ୍ୱାରା କିନ୍ନର ପରିଚୟ ପତ୍ର ପ୍ରଦାନ କରାଯାଇଥିଲା । କାର୍ଯ୍ୟକ୍ରମରେ ବିଧାୟକ ଗୌରୀ ଶଙ୍କର ମାଝୀ, ଝରିଗାଁ ବିଧାୟକ ନରସିଂହ ଭତରା, ନବରଙ୍ଗପୁର ପୌର ପରିଷଦ ଅଧ୍ୟକ୍ଷ କୁନୁ ନାୟକ, ଜିଲ୍ଲାପାଳ ଡ. ଶୁଭଙ୍କର ମହାପାତ୍ର, ଉନ୍ନୟନ ଅଧିକାରୀ ବିରଞ୍ଚô ନାରାୟଣ ଦରୱାନ, ସାମାଜିକ ସୁରକ୍ଷା ଅଧିକାରୀ ସୁଧାଂଶୁ ପାତ୍ର, କିନ୍ନର ସଙ୍ଘ ଅଧ୍ୟକ୍ଷ ମନୋଜ ପଟ୍ଟନାୟକ, ଉମରକୋଟ ପ୍ରତିନିଧି ଇଂ. ଚନ୍ଦନା ମଲ୍ଲିକ ଏବଂ ସମ୍ପାଦକ ଚୁମୁକୀ କିନ୍ନର ପ୍ରମୁଖ ଉପସ୍ଥିତ ଥିଲେ । ସୂଚନା ଯୋଗ୍ୟ ଯେ ଜିଲ୍ଲା କିନ୍ନର ସଂଘ ଗଠନ ହେବା ପରେ ସମାଜ ରେ କିନ୍ନର ମାନେ ରକ୍ତ ଦାନ କରି ଏବଂ ଗରିବ ଅସହାୟଙ୍କୁ ସାହାଯ୍ୟ ସହଯୋଗ କରି ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ସେହିପରି ସଂଘ ହେବା ପରେ କିନ୍ନର ମାନଙ୍କୁ ଚାଉଳ, ଶ୍ରମିକ ପରିଚୟ ପତ୍ର, ବସ୍ ପାସ, ଗ୍ୟାସ ଚୁଲ୍ଲା ପ୍ରଭୃତି ପ୍ରଦାନ କରାଯାଇଛି । ଏଇ ଅଳ୍ପ ଦିନ ତଳେ ଜିଲ୍ଲା ଇତିହାସରେ ପ୍ରଥମ ଥର ପାଇଁ ସଂଘର ଜଣେ କିନ୍ନର ସଦସ୍ୟଙ୍କୁ ସରକାରଙ୍କ ଦ୍ୱାରା ଘରବାରି ଭୂମି ପଟ୍ଟା ପ୍ରଦାନ କରାଯାଇଥିଲା । କିନ୍ନର ମାନେ ସରକାରଙ୍କ ଯୋଜନା ମୁତାବକ ସୟଂ ସହାୟକ ଗୋଷ୍ଟୀ ଗଠନ କରିଛନ୍ତି । ନବରଙ୍ଗପୁର ଜିଲ୍ଲାରେ କିନ୍ନରମାନେ ଲୋକ ଲଜ୍ଜ୍ୟା ଆଳରେ ନିଜ ପରିଚୟ ଲୁଚାଇବାର ବର୍ତ୍ତମାନ କୌଣସି ଆବଶ୍ୟକ ନାହିଁ ବୋଲି କିନ୍ନର ସଂଘ ଅଧ୍ୟକ୍ଷ ମନୋଜ ପଟ୍ଟନାୟକ କହିଛନ୍ତି । ବର୍ତମାନ ସମୟ ଓ ପରିସ୍ଥିତି ବଦଳି ଯାଇଛି, ତେଣୁ ଅନାୟସରେ ଜିଲ୍ଲାରେ କିନ୍ନର ମାନେ ଆଗେଇ ଆସି ସଂଘ ସହିତ ଜଡିତ ହୋଇ ସରକାରଙ୍କ ବିଭିନ୍ନ ଯୋଜନାରେ ସାମିଲ ହେବାକୁ ଅନୁରୋଧ କରିଛନ୍ତି ।
