ଚଳିତ ବର୍ଷର ରାଜ୍ୟ ବଜେଟ

ରାଜ୍ୟରେ ସରକାର ପରିବର୍ତ୍ତନ ପରେ ବିଜେପି ସରକାର ବିଧାନସଭାରେ ପ୍ରଥମ ପୂର୍ଣ୍ଣାଙ୍ଗ ବଜେଟ ଉପସ୍ଥାପିତ କରିଛନ୍ତି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜ ହାତରେ  ଅର୍ଥ ବିଭାଗର ରଖିଥିବାରୁ ନିଜେ ତାଙ୍କ ସରକାରର ୨୦୨୫-୨୬ ଆର୍ଥôକ ବର୍ଷ ପାଇଁ ୨.୯୦ ଲକ୍ଷ କୋଟି ଟଙ୍କାର ବଜେଟ ଉପସ୍ଥାପନ କରିଛନ୍ତି । ବଜେଟରେ ମଧ୍ୟ ରାଜ୍ୟରେ କୃଷି ଓ କୃଷକର ବିକାଶ ଲାଗି ୩୭ ହଜାର ୮୩୮ କୋଟି ଟଙ୍କାର ସ୍ୱତନ୍ତ୍ର ବଜେଟ ରହିଛି । ରାଜ୍ୟ ବଜେଟରେ ଶିକ୍ଷା, ସ୍ୱାସ୍ଥ୍ୟ, ଶିଳ୍ପ, ଗ୍ରାମୀଣ ବିକାଶ ଭିତ୍ତିଭୂମି ଯୁବବର୍ଗଙ୍କ  ପ୍ରତି ଗୁରୁତ୍ୱ ଦେବା ସହ ୧୬ଟି ନୂତନ  ଯୋଜନା ସମ୍ପର୍କରେ ଘୋଷଣା କରିଛନ୍ତି । ଯାହାକି ରାଜ୍ୟ ସରକାରଙ୍କ  ଭବିଷ୍ୟତ ଆଭିମୁଖ୍ୟ ବା କାର୍ଯ୍ୟକ୍ରମ ସମ୍ପର୍କରେ ସଂକେତ ପ୍ରଦାନ କରୁଛି ।  ସେହିପରି କୃଷି ବଜେଟରେ ଗତ ବର୍ଷ ତୁଳନାରେ ୧୨ପ୍ରତିଶତ ହୋଇଥିବାବେଳେ ଏଥିରେ କୃଷି ଓ କୃଷକର ବିକାଶ, ଜଳସେଚନ, ଶୀତଳ ଭଣ୍ଡାର ପ୍ରତିଷ୍ଠା ଏବଂ ଭିତ୍ତିଭୂମି ବିକାଶକୁ ସର୍ବାଧିକ ଗୁରୁତ୍ୱ ପ୍ରଦାନ କରିଛନ୍ତି । ଉଲ୍ଳେଖଯୋଗ୍ୟ ଯେ, ଶୀତଳ ଭଣ୍ଡାର ଅଭାବରୁ  ରାଜ୍ୟରେ ଆଳୁ, ଟମାଟୋ ଠାରୁ ଆରମ୍ଭ କରି ବିଭିନ୍ନ ପନିପରିବାର ଅଭାବୀ ବିକ୍ରି ଓ ଅଣ ଋତୁରେ ଦରବୃଦ୍ଧିରେ ଉଭୟ ଚାଷୀ ଓ ଖାଉଟି ଶିକାର ହେଉଛନ୍ତି ।  ପ୍ରତି ବ୍ଲକରେ ଗୋଟିଏ ଲେଖାଏଁ ଶୀତଳ ଭଣ୍ଡାର ପ୍ରତିଷ୍ଠା ଲକ୍ଷ୍ୟରେ ସରକାର ଯେଉଁ ବ୍ୟୟବରାଦ କରିଛନ୍ତି, ତାହା ମଧ୍ୟ କିଛି କମ୍ ନୁହେଁ, ତେବେ ଭବିଷ୍ୟତ ହିଁ ଏହାର ଫଳାଫଳ କହିବ । ଚଳିତ ବଜେଟରେ ରାଜ୍ୟ ସରକାର ୨୩,୬୧୫ କୋଟି ଟଙ୍କା ବ୍ୟୟବରାଦ କରିଛନ୍ତି  । ଯେଉଁଥିରେ ମାଗଣା ସ୍ୱାସ୍ଥ୍ୟ ସେବାଠାରୁ ଆରମ୍ଭ କରି ଡାକ୍ତର, ନର୍ସଙ୍କ ଅଭାବ ପୂରଣ, ହସ୍ପିଟାଲଗୁଡିକରେ ଆଧୁନିକୀକରଣ, ଉନ୍ନତ ବା କୌଶଳର ପ୍ରୟୋଗ, ଭିତ୍ତିଭୂମି ବିକାଶ, ନୂତନ ସ୍ୱାସ୍ଥ୍ୟ କେନ୍ଦ୍ର ଆଦି ପ୍ରତିଷ୍ଠା ପାଇଁ ବିନିଯୋଗ ହେବା ପ୍ରସ୍ତାବ ରହିଛି ।   ସରକାର ଶିକ୍ଷା କ୍ଷେତ୍ରକୁ ବଜେଟରେ ୪୧, ୨୭୩ କୋଟି ବ୍ୟୟ ଅଟକଳ କରାଯାଇଛି । ପ୍ରତିବର୍ଷ ବ୍ୟୟ ମଧ୍ୟ ବଢି ଚାଲିଛି । ନୂତନ, ସ୍କୁଲ, କଲେଜମାନ ଗଢି ଉଠୁଛି ।  ସେହିପରି ଉଚ୍ଚଶିକ୍ଷା କ୍ଷେତ୍ରରେ ମଧ୍ୟ ଅନୁରୂପ ଅବସ୍ଥା ।  ପୂର୍ବ ସରକାର ଷ୍ଟାର୍ଟ୍ ଅପ୍ ଜରିଆରେ ଲକ୍ଷଲକ୍ଷ କୋଟି ଟଙ୍କାର ପ୍ରସ୍ତାବ ପାଇଥିଲେ, ମାତ୍ର ଏହାର କାର୍ଯ୍ୟାନ୍ୱୟନ ଅତ୍ୟନ୍ତ ନୈରାଶ୍ୟଜନକ । ଏମଏସଏମଇ କ୍ଷେତ୍ର ମଧ୍ୟ ଅନୁରୂପ । ରାଜ୍ୟରେ ବହୁ ଶିଳ୍ପାଞ୍ଚଳ ଗଢି ଉଠିଥିଲେ ମଧ୍ୟ ଏବେ ସେଠାରେ ଆଉ ଶିଳ୍ପ ନାହିଁ, ଜନବସତି ଏବଂ ବ୍ୟବସାୟିକ ଅନୁଷ୍ଠାନରେ ପରିଣତ ହୋଇଛି ବୋଲି କହିଲେ ଅତୁ୍ୟକ୍ତି ହୋଇନପାରେ ।  ତେବେ ସବୁଠୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି, ବଜେଟରେ ନିଯୁକ୍ତି, ଲୋକଙ୍କ ଆୟବୃଦ୍ଧି, କୃଷକଙ୍କ ଆୟବୃଦ୍ଧି ନେଇ କିଛି ସୂଚନା ମିଳେ ନାହିଁ । ରାଜ୍ୟରେ ବେକାରୀ ବଢିଚାଲିଥିବାବେଳେ ଲୋକଙ୍କର କ୍ରୟ କମିବାର ସାମର୍ଥ୍ୟ କମିବାର ଲାଗିଛି । ଅନ୍ୟପକ୍ଷରେ ରାଜ୍ୟରେ କୃଷକଙ୍କ ଆୟ ଦେଶରେ ସବୁଠୁ ପଛରେ ରହିଛି । ସେହିପରି ପ୍ରତିବର୍ଷ ବଜେଟ ବ୍ୟୟବରାଦ ମଧ୍ୟ ବଢିବାରେ ଲାଗିଛି । କହିବା ବାହୁଲ୍ୟ ଯେ, ଗତ ବର୍ଷ ବଜେଟରେ ୨ଲକ୍ଷ ୬୫ହଜାର କୋଟି ବ୍ୟୟ ବରାଦ ହୋଇଥିଲା । ଗତ ଜାନୁୟାରୀ ସୁଦ୍ଧା ସେଥିରୁ ୧ଲକ୍ଷ କୋଟିରୁ ଅଧିକ ଅର୍ଥ ଖର୍ଚ୍ଚ ହୋଇପାରିନାହିଁ । ଆଉ ମାତ୍ର ୨ମାସ ୨୦୨୪-୨୫ ଆର୍ଥôକ ବର୍ଷ ଶେଷ ହେବାକୁ ଯାଉଛି । ବାକି ଅର୍ଥ ବ୍ୟୟ କରିବା ଆଦୌ ସମ୍ଭବ ନୁହେଁ । ତେବେ ଏତେ ପରିମାଣର ବଜେଟ ଆଗତ କରିବାର କାରଣ କ’ଣ ବୁଝାପଡୁନାହିଁ । ସେହିପରି ପ୍ରତିବର୍ଷ ରାଜ୍ୟ ଋଣଭାର ବଢିଚାଲିଛି  । ରାଜ୍ୟର ଋଣ ବୋଝ ଏବେ ୧,୩୪,୯୧୪ କୋଟିରେ ପହଁଚିଗଲାଣି । ଯାହାକି ମୋଟ ଋଣଭାର ଓ ସକଳ ଘରୋଇ ଉତ୍ପାଦର ଅନୁପାତ ୧୨.୭ ପ୍ରତିଶତ । ୨୦୨୫-୨୬ରେ ରାଜ୍ୟ ସରକାର ପ୍ରାୟ ୪୭,୪୦୦କୋଟି ଋଣ କରିବେ ବୋଲି ବଜେଟରେ ମୁଖ୍ୟମନ୍ତ୍ରୀ କହିଛନ୍ତି । ରାଜ୍ୟରେ ମୁଣ୍ଡପିଛା  ଋଣ ଭାର ୨୮,୭୦୫ ଟଙ୍କାରେ ପହଁଚିବା ନେଇ ଆକଳନ କରାଯାଇଛି । କ୍ଷମତା ଓ ଭୋଟ ବ୍ୟାଙ୍କ ପାଇଁ ମାଗଣା ଯୋଜନା ଏବ ରାଜନୈତିକି ଦଳଗୁଡିକର ମୁଖ୍ୟ ଅସ୍ତ୍ରରେ ପରିଣତ ହୋଇଛି । ଯେଉଁଥିପାଇଁ କି ସରକାରଙ୍କୁ ଋଣ କରିବାକୁ ପଡୁଛି ଏବଂ ଋଣ ବୋଝ ବଢିବାରେ ଲାଗିଛି ।  ବଜେଟ ହେଉଛି ବର୍ଷକ ପାଇଁ ରାଜ୍ୟର ଆୟ-ବ୍ୟୟର ହିସାବ । ବଜେଟ ଗତାନୁଗତିକ ନହୋଇ କାର୍ଯ୍ୟାନ୍ୱୟନରେ ପରିଣତ କରାଯିବା ଉଚିତ୍ । ଏଥିଲାଗି ରାଜନୈତିକ ନେତାଙ୍କ ଠାରୁ ଆରମ୍ଭ କରି ଅମଲାତନ୍ତ୍ର ଯାଏ ଇଚ୍ଛାଶକ୍ତି ଦରକାର । ଅନ୍ୟଥା ୨୦୩୬ ସୁଦ୍ଧା ‘ସମୃଦ୍ଧ ଓଡିଶା’ ଗଠନ ସ୍ୱପ୍ନ ହୋଇଯିବ । 
ସୌଭାଗ୍ୟ ରଂଜନ ମହାନ୍ତି
ମୋ:୭୯୭୮୬୬୬୪୦୩