ଜୁନିଅର ରେଡ୍କ୍ରସ୍ ପରାମର୍ଶଦାତାଙ୍କ ତାଲିମ
Rasmita Behera
ଢେଙ୍କାନାଳ: ଢେଙ୍କାନାଳ ଜିଲ୍ଲା ଶିକ୍ଷା କାର୍ଯ୍ୟାଳୟ ଓ ଓଡିଶା ରାଜ୍ୟ ଜୁନିୟର ରେଡ୍କ୍ରସ୍ ମିଳିତ ସହଯୋଗରେ ସଦର ବ୍ଲକ୍ ଅନ୍ତର୍ଗତ କାଇମାଟି ସରକାରୀ ଉଚ୍ଚ ବିଦ୍ୟାଳୟ ଠାରେ ଢେଙ୍କାନାଳ ଜିଲ୍ଲାର ଅଣ ତାଲିମ୍ପ୍ରାପ୍ତ ଜୁନିୟର ରେଡ୍କ୍ରସ ପରାମର୍ଶଦାତାମାନଙ୍କର ଏକ ରାଜ୍ୟସ୍ତରୀୟ ତାଲିମ କାର୍ଯ୍ୟକ୍ରମର ଉଦ୍ୟାପିତ ହୋଇଯାଇଛି । ଏହି କାର୍ଯ୍ୟକ୍ରମରେ ଜିଲ୍ଲା ଶିକ୍ଷା ଅଧିକାରୀ ତଥା ଜୁନିୟର ରେଡ୍କ୍ରସ ସଭାପତି ଶ୍ରୀମତୀ ବିନିତା ସେନାପତି ମୁଖ୍ୟ ଅତିଥି ଭାବେ ଯୋଗ ଦେଇ ପରାମର୍ଶଦାତାମାନଙ୍କୁ ସ୍ୱାସ୍ଥ୍ୟ, ସେବା ଓ ବନ୍ଧୁତା ଉପରେ କାର୍ଯ୍ୟକରିବା ପାଇଁ ପରାମର୍ଶ ଦେଇଥିଲେ । ସମ୍ମାନିତ ଅତିଥି ଭାବେ ଜିଲ୍ଲା ରେଡ୍କ୍ରସ୍ର ଉପସଭାପତି ବିରଂଚି ନାରାୟଣ ପାଣି, ସଦର ବ୍ଲକ୍ର ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ଶତୃଘ୍ନ ଖଣ୍ଡା ଓ ଦେବେନ୍ଦ୍ର ନାଥ, ଅବସରପ୍ରାପ୍ତ ପ୍ରଧାନଶିକ୍ଷକ ବ୍ରଜକିଶୋର ବେହେରା, ଜିଲ୍ଲା ଡେପୁଟି ସୁପରିଟେଣ୍ଡେଂଟ୍ ପୋଲିସ୍ (କ୍ରାଇମ୍) ଶ୍ରୀମତୀ ନଳିତା ମୋଦୀ ପ୍ରମୁଖ ଯୋଗ ଦେଇଥିଲେ । ସାଧନକର୍ମୀ ଲେଲିନା ପ୍ରିୟଦର୍ଶିନୀ ଦାସ ଏଚ୍ଆଇଭି ଏଡ୍ସ, ସେହିପରି ବରୁଣ କୁମାର ମାଝୀ ଓ ଶ୍ରୀ ସୁବ୍ରତ କୁମାର ମିଶ୍ର ପ୍ରାଥମିକ ଚିକିତ୍ସାର ବିଭିନ୍ନ ଦିଗ ଉପରେ ଆଲୋକପାତ କରିଥିଲେ । ଏହି ତାଲିମ୍ର ଶେଷ ଦିବସରେ ଜିଲ୍ଲା ଜୁନିୟର ରେଡ୍କ୍ରସ ତରଫରୁ ଢେଙ୍କାନାଳ ମୁଖ୍ୟ ରକ୍ତଭଣ୍ଡାର ଠାରେ ଏକ ରକ୍ତଦାନ ଶିବିରର ଆୟୋଜନ କରାଯାଇଥିଲା । ଏଥିରେ ୧୧ଜଣ ପରାମର୍ଶଦାତା ସ୍ୱେଚ୍ଛାକୃତ ଭାବେ ରକ୍ତଦାନ କରି ଅତିଥିମାନଙ୍କ ଠାରୁ ମାନପତ୍ର ଓ ପରିଚୟ ପତ୍ର ଗ୍ରହଣ କରିଥିଲେ । ଏହି ସମସ୍ତ କାର୍ଯ୍ୟକ୍ରମ ଜିଲ୍ଲା ଶାରୀରିକ ଶିକ୍ଷା ଅଧିକାରୀ ତଥା ଜୁନିଅର ରେଡ୍କ୍ରସ୍ର ସମ୍ପାଦକ ପ୍ରକାଶ ଚନ୍ଦ୍ର ବେହେରାଙ୍କ ତତ୍ତ୍ୱାବଧାନରେ ପରିଚାଳିତ ହୋଇଥିଲା । ସଂଯୋଜକ ତଥା ଜିଲ୍ଲା ଜୁନିୟର ରେଡ୍କ୍ରସ୍ ଅଧିକାରୀ ସୁବ୍ରତ କୁମାର ମିଶ୍ର, ସାଧନକର୍ମୀ ନରେଶ କୁମାର ମହାରଣା, ବିଦ୍ୟାଳୟର ପ୍ରଧାନଶିକ୍ଷକ ସତ୍ୟବ୍ରତ ପାତ୍ର ପ୍ରମୁଖଙ୍କ ସାହାଯ୍ୟ ଓ ସହଯୋଗରେ ଏହି ତାଲିମ୍ କାର୍ଯ୍ୟକ୍ରମଟି ସୂଚାରୁ ରୂପେ ସମ୍ପାଦିତ ହୋଇଥିଲା ।
