ଦୁର୍ଘଟଣାରେ ଆଖି ବୁଝିଲେ ଚୈତନ୍ୟ
Rasmita Behera
ଟମକା: ସ୍ଥାନୀୟ ଥାନା ଅନ୍ତର୍ଗତ ତାରିଣୀ ଶାଳ ନିକଟସ୍ଥ ଗଡାଣିରେ ଗୁରୁବାର ଏକ ଦୁର୍ଘଟଣାରେ ଜଣେ ବ୍ୟକ୍ତିଙ୍କର ଅକାଳ ମୃତୁ୍ୟ ଘଟିଛି । ମୃତ ଶ୍ରମିକ ଜଣଙ୍କ ଟମକା ନିବାସି କିଆଝର ପଂଚାୟତର ପ୍ରାକ୍ତନ ସରପଂଚ ଦ୍ୱାରିକାନାଥ ଦାସଙ୍କ ବଡଭାଇ ତଥା ସ୍ୱର୍ଗତ ବାଉରୀ ଦାସଙ୍କ ପୁଅ ଚୈତନ୍ୟ (୪୪) । ମିଳିଥିବା ଖବର ମୁତାବକ ଚୈତନ୍ୟ ସନ୍ଧ୍ୟା ପ୍ରାୟ ୬ ଘଟିକା ସମୟରେ ଘର ସଉଦା ପାଇଁ ଚାଲି ଚାଲି ଯାଉଥିବା ବେଳେ ଉକ୍ତ ଗଡାଣି ନିକଟରେ ଏକ ଛଅ ଚକିଆ ଟ୍ରକ୍(ଓଆର୍୦୪ଏଲ-୨୭୧୫ ) ଏବଂ ଅନ୍ୟ ଏକ ଅଜଣା ଟ୍ରକ ପରସ୍ପରକୁ ସାଇଡ୍ ମାରିଥିଲେ । ଫଳରେ ଅଜଣାଟ୍ରକଟି ଚୈତନ୍ୟକୁ ଧକ୍କା ଦେଇ ପଳାଇଥିଲା । ଚୈତନ୍ୟ ଛିଟକି ପଡ଼ି କ୍ଷତାକ୍ତ ହୋଇ ଗୁରୁତର ଆହାତ ହୋଇଥିବା ବେଳେ ପରିବାର ଲୋକ ତାଙ୍କୁ ଉଦ୍ଧାର କରି କଳିଙ୍ଗନଗର ସ୍ଥିତ ଟାଟା ମେଡିକା ଡାକ୍ତରଖାନା ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ସ୍ଥାନୀୟ ପୁଲିସ ଘଟଣା ସ୍ଥଳରେ ପହଁଚି ଦୁର୍ଘଟଣା ଗ୍ରସ୍ଥ ଟ୍ରକକୁ ଜବତ କରିଛି । ଏନେଇ ମୃତକଙ୍କ ପୁଅ ରାଜେଶଙ୍କ ଏତଲାକୁ ଆଧାର କରି ପୁଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଜାରି ରଖିଛି ।
