ଫୁଟ୍ବଲ ଚାମ୍ପିୟନସିପ୍ ନେଇ ପ୍ରସ୍ତୁତି
Rasmita Behera
ବାଲେଶ୍ୱର: ଜିଲ୍ଲାରେ କ୍ରୀଡ଼ା ଓ କ୍ରୀଡ଼ାବିତ୍ମାନଙ୍କର ସାମଗ୍ରିକ ବିକାଶ ତଥା ତୃଣମୂଳସ୍ତରରେ କ୍ରୀଡ଼ାବିତ୍ମାନଙ୍କ ପ୍ରତିଭା ବିକାଶ ନିମନ୍ତେ ଭୀମପୁରା ସ୍ଥିତ କ୍ରୀଡ଼ା ହଷ୍ଟେଲ ପଡ଼ିଆ ଠାରେ ଆସନ୍ତା ଏପ୍ରିଲ ୨ ତାରିଖ ଠାରୁ ୯ ତାରିଖ ପର୍ଯ୍ୟନ୍ତ ହେବାକୁ ଥିବା ସିଏମ ଟ୍ରଫି ଫୁଟ୍ବଲ ଚାମ୍ପିୟନସିପ୍ ପ୍ରତିଯୋଗିତା ନିମନ୍ତେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛିି । ଏହି ପ୍ରତିଯୋଗିତା ୧୫ ବର୍ଷରୁ କମ୍ କ୍ରୀଡ଼ାବିତ୍ ବର୍ଗ ପାଇଁ ଆୟୋଜିତ କରାଯାଉଛି । ଆୟୋଜିତ ଏହି ବୈଠକରେ ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶ ଅଧ୍ୟକ୍ଷତା କରିଥିବା ବେଳେ ଜିଲ୍ଲା କ୍ରୀଡ଼ା ଅଧିକାରୀ ପୂର୍ଣ୍ଣଚନ୍ଦ୍ର ଜେନା, ଜିଲ୍ଲା ଶିକ୍ଷା ଅଧିକାରୀ ପ୍ରାଚୀ ତନୟା ଗିରି, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସୁଶ୍ରୀ ଐଶ୍ୱର୍ଯ୍ୟା ସାମନ୍ତଙ୍କ ସମେତ ବିଭିନ୍ନ କ୍ରୀଡ଼ା ଆସୋସିଏସନର ଅଧିକାରୀମାନେ ଉପସ୍ଥିତ ଥିଲେ । ସୂଚନାଅନୁସାରେ, ଜିଲ୍ଲାର ମୋଟ ୭ ଗୋଟି ଫୁଟବଲ କ୍ଲବ ଏହି ପ୍ରତିଯୋଗିତାରେ ଭାଗ ନେଉଥିବାବେଳେ ନିଉ ଏନଏସି ରେମୁଣା, ଟାଉନ କ୍ଲବ, ବିଏସକେ ଆରମଳା ଫୁଟବଲ କ୍ଲବ, ମାର୍କଣା ଫୁଟବଲ କ୍ଲବ, ବଣଭୁଇଁ ଫୁଟବଲ କ୍ଲବ, ଓଏସଏଲ ଫୁଟବଲ କ୍ଲବ ଏବଂ ବାଲେଶ୍ୱର ଫୁଟବଲ କ୍ଲବ ଏହି ପ୍ରତିଯୋଗିତାରେ ଅଂଶଗ୍ରହଣ କରିବେ ।
