ବାପା ନାଁରେ କଥା ହେବାରୁ ଯୁବକଙ୍କୁ ଆକ୍ରମଣ ; ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୨୭ା୫ : ପୋଖରୀ ନିକଟରେ ବସି ଅଭିଯୁକ୍ତର ବାପା ନାଁରେ କଥା ହେଉଥିବାକୁ ନେଇ ଅଭିଯୋଗକାରୀଙ୍କୁ ମରଣାନ୍ତକ ଆକ୍ରମଣ । ଏନେଇ ଥାନାରେ ଅଭିଯୋଗ ପରେ ଜଣେ ଅଭିଯୁକ୍ତକୁ ଗିରଫ କରିଛି ନୟାପଲ୍ଲୀ ଥାନା ପୁଲିସ । ଗିରଫ ଅଭିଯୁକ୍ତ ହେଲା, ନୟାପଲ୍ଲୀ ଗଦାସାହିର ଶିବ ପ୍ରସାଦ ଜେନା ।
ସୂଚନାଯୋଗ୍ୟଯେ, ରବିବାର ସନ୍ଧ୍ୟାରେ ଅଭିଯୋଗକାରୀ ଦେବାଶିଷ ରାଉତ ତାଙ୍କର ଅନ୍ୟ ୨ଜଣ ବନ୍ଧୁଙ୍କ ସହିତ ବାଲୁଙ୍କେଶ୍ୱର ପୋଖରୀ ବନ୍ଧରେ ବସି ବାର୍ତ୍ତାଲାପ କରୁଥିଲେ । ସେହି ସମୟରେ ଅଭିଯୁକ୍ତ ଶିବ ସେଠାକୁ ଆସିଥିଲେ ଓ ଅଭିଯୋଗକାରୀଙ୍କୁ ତାଙ୍କ ବାପା ଙ୍କ ବିଷୟରେ କାହିଁକି ଆଲୋଚନା କରୁଥିବା ନେଇ ପଚାରିଥିଲେ । ଏହାର ପ୍ରତିଉତ୍ତରରେ ଅଭିଯୋଗକାରୀ କହିଥିଲେ ଯେ, ତାଙ୍କ ବାପା ତାଙ୍କର ବନ୍ଧୁ ଆମେ କାହିଁକି ତାଙ୍କ ବିଷୟରେ କଥା ହେବୁ । ଏହି କଥା ସୁଣି ଅଭିଯୁକ୍ତ ରାଗିଯାଇ ତାର କିଛି ସହଯୋଗୀଙ୍କୁ ଫୋନ୍ ଯୋଗେ ଡାକି ଅଭିଯୋଗକାରୀଙ୍କୁ ହତ୍ୟା କରିବା ଉଦେଶ୍ୟରେ ମରଣାନ୍ତକ ଆକ୍ରମଣ କରିଥିଲେ । ପରେ ଘଟଣା ସ୍ଥଳରୁ ଫେରାର ହୋଇଯାଇଥିଲେ । ଖବର ପାଇ ଅଭିଯୋଗକାରୀଙ୍କ ପରିବାର ଘଟଣା ସ୍ଥଳରେ ପହଞ୍ଚି ପୁଅକୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନେଇଥିଲେ । ହସ୍ପିଟାଲରୁ ଚିକିତ୍ସା ହୋଇ ଫେରିବା ପରେ ଅଭିଯୋଗକାରୀ ନୟାପଲ୍ଲୀ ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତକୁ ଗିରଫ କରିଛି ।
