ଭାରତ ଅର୍ଥନୀତି ପାଇଁ ପରୀକ୍ଷାର ବେଳ

ବଳରାମ ରଣସିଂହ : ଏଇ ନିକଟରେ ଭାରତର ଜିଡ଼ିପି ୪.୧୯ ଲକ୍ଷ କୋଟି ଡଲାରରେ ପହଁଚିଛି  । ଜାପାନ ଭଳି ବିକଶିତ ରାଷ୍ଟ୍ରକୁ ପଛରେ ପକାଇ ଭାରତ ବିଶ୍ୱର ଚତୁର୍ଥ ବୃହତ୍ ଅର୍ଥନୀତିକ ଶକ୍ତିର ମାନ୍ୟତା ପାଇଛି  । ଯାହାକୁ ନେଇ ଶାସକ ବିଜେପି ଉତ୍ସବର ମାହୋଲ କରିବା ସ୍ୱାଭାବିକ କଥା  । ସେପଟେ ନିନ୍ଦୁକ ଏଭଳି ସଫଳତା ସତ୍ତ୍ୱେ ନକରାତ୍ମକ ବାର୍ତ୍ତା ଦେବାରେ ହେଳା କରିନାହାନ୍ତି  । ସେମାନଙ୍କ ଯୁକ୍ତି ହେଉଛି, ଆମ ଦେଶର ଜନସଂଖ୍ୟା ୧୪୦ କୋଟି  । କିନ୍ତୁ ଆର୍ଥିକ କ୍ଷେତ୍ରରେ ଆମେ ଚାରି ନମ୍ବରରେ ରହିବା କେଉଁ ବଡ଼ କଥା ?
ମୋଦି ବିରୋଧୀଙ୍କ ଏଭଳି ପ୍ରଶ୍ନ ଶୁଣି, ଆମ ମନରେ ସ୍ୱତଃ କେତେକ ପ୍ରଶ୍ନ ଉଙ୍କି ମାରୁଛି  । ମନେକର ଜଣଙ୍କ ପରିବାରରେ ୧୦ ଜଣ ଅଛନ୍ତି  । ଯଦି ସମସ୍ତେ ଚାଷୀବନ୍ଦୀ ହୋଇଥିବେ ତେବେ ବାର୍ଷିକ ଆୟ ୫ ଲକ୍ଷ ଭିତରେ ରହିବା ସ୍ୱାଭାବିକ  । କିନ୍ତୁ ଅନ୍ୟ ଗୋଟିଏ ପରିବାରରେ ୪ ଜଣ ଅଛନ୍ତି  । ଯଦି ସେମାନେ ସମସ୍ତେ ଚାକିରି କରୁଥିବେ ବା ବ୍ୟବସାୟ କରୁଥିବେ ତେବେ ସେମାନଙ୍କ ବାର୍ଷିକ ଆୟ ୨୦ ଲକ୍ଷ ଟପିବା ବଡ଼ କଥା ନୁହେଁ  । ଏଭଳି କ୍ଷେତ୍ରରେ ଆମେ ପରିବାରର ଲୋକସଂଖ୍ୟାକୁ ତୁଳନା କରୁଛେ ନା ପରିବାର ଲୋକଙ୍କ ଯୋଗ୍ୟତା ଓ ଦକ୍ଷତାକୁ? ଏହା ମଧ୍ୟ ବିଚାର କରିବାର ଆବଶ୍ୟକତା ରହିଛି  ।
୧୮୦୦ ମସିହା ବେଳକୁ ବ୍ରିଟେନ ଥିଲା ବିଶ୍ୱର ବୃହତ୍ତମ ଆର୍ଥିକ ମହାଶକ୍ତି  । ସେହି ସମୟରେ ବି୍ରଟେନ ଅନେକ ଦେଶକୁ ଶାସନ ବି କରୁଥିଲା  । କିନ୍ତୁ ୧୯୪୮ ବେଳକୁ ବ୍ରିଟେନ ଅର୍ଥନୀତିକୁ ଆମେରିକା ଅର୍ଥନୀତି ପଛରେ ପକାଇ ଦେଇଥିଲା  । ଅବଶ୍ୟ କେତେକଙ୍କ ମତରେ ୧୮୮୦ ବେଳକୁ ଆମେରିକାର ଅଭିବୃଦ୍ଧି ବ୍ରିଟେନ ଠାରୁ ଅଧିକ ରହିଥିଲା  । ବ୍ୟାପକ ଶିଳ୍ପ ବିପ୍ଳବ ହିଁ ଆମେରିକାକୁ ଆର୍ଥିକସ୍ତରରେ ମଜବୁତ୍ କରିପାରିଥିଲା  । ବିଶେଷକରି ଅତ୍ୟାଧୁନିକ ପ୍ରଯୁକ୍ତି ବଳରେ ଆମେରିକା ବିଶ୍ୱରେ ରାଜ୍ କରିବାରେ ସକ୍ଷମ ହୋଇଥିଲା  । ଏକଦା ବିଶ୍ୱରେ ଆମେରିକା ଓ ଜାପାନର ଅର୍ଥନୀତିକୁ ନେଇ ବେଶ ଚର୍ଚ୍ଚା ହେଉଥିଲା  । କିନ୍ତୁ ୨୦୧୧ ବେଳକୁ ଜାପାନକୁ ପଛରେ ପକାଇ ଚାଇନା ବିଶ୍ୱର ଦ୍ୱିତୀୟ ବୃହତ୍ତମ ଅର୍ଥନୀତିର ସ୍ଥାନ ନେଇଥିଲା  । ସୀମିତ ଭୌଗୋଳିକ କ୍ଷେତ୍ର ଓ ମାନବସମ୍ବଳ ଜାପାନର ତ୍ୱରିତ ଅର୍ଥନୀତିକ ଅଭିବୃଦ୍ଧିରେ ବାଧକ ସୃଷ୍ଟି କରିଥିଲା  । ଧୀରେ ଧୀରେ ଏହାର ଅଭିବୃଦ୍ଧି ହାର କମିଯିବାରୁ ଜର୍ମାନୀ ବି ଜାପାନକୁ ପଛରେ ପକାଇଦେଇଛି  । ଅପରପକ୍ଷରେ ବିଶ୍ୱର ବୃହତ୍ତମ ଜନବହୁଳ ରାଷ୍ଟ୍ର ଭାରତର ଅର୍ଥନୀତି ଆଉ ପୂର୍ବଭଳି କଚ୍ଛପ ଗତିରେ ଚାଲୁନାହିଁ  । ଅବଶ୍ୟ ଏହାର ଶ୍ରେୟ ଆମେ ମନମୋହନ ସିଂଙ୍କୁ ଦେଇପାରିବା  । ସେ ଅର୍ଥମନ୍ତ୍ରୀ ଥିବାବେଳେ ଯେଉଁ ଉଦାରୀକରଣ ଓ ଜଗତୀକରଣ ଯୁଗ ଆରମ୍ଭ କରିଥିଲେ ତାହାହିଁ ଭାରତୀୟ ଅର୍ଥନୀତିକୁ ମଜବୁତ୍ କରିପାରିଛି  । ଏକଥାକୁ କଂଗ୍ରେସ ବିରୋଧୀ ଅଥବା ମନମୋହନ ବିରୋଧୀ ବି ସ୍ୱୀକାର କରିବାରେ କାର୍ପଣ୍ୟ ପ୍ରକାଶ କରନ୍ତି ନାହିଁ  ।
ସମ୍ପ୍ରତି ଭାରତର ଅର୍ଥନୀତି ଯେଉଁ ହାରରେ ଅଭିବୃଦ୍ଧି ହାସଲ କରୁଛି, ତାହା ଯଦି ବଜାୟ ରହେ ତେବେ ବର୍ଷେ ଦି ବର୍ଷ ମଧ୍ୟରେ ଆମେ ବିଶ୍ୱର ତୃତୀୟ ଆର୍ଥିକ ମହାଶକ୍ତି ହେବା ନିଶ୍ଚିତ  । ତେବେ ଗୁରୁତ୍ୱପୂର୍ଣ୍ଣ କଥାଟି ହେଉଛି, ଶହ ଶହ ବର୍ଷ ତଳେ ବିଶ୍ୱରେ ଚାଇନା ଠାରୁ ବି ଭାରତ ଆଗରେ ରହିଥିଲା  । ଖାଲି ଚାଇନା ନୁହେଁ ଭାରତ ଧନଧାନ୍ୟରେ ପରିପୂର୍ଣ୍ଣ ସମୃଦ୍ଧ ଦେଶ ଥିଲା ବୋଲି କୁହାଯାଏ  । କିନ୍ତୁ ଏବେ ଚାଇନା ଭାରତ ଠାରୁ ଢେର ଆଗରେ ରହିଛି  । କୁହାଯାଉଛି, ଚାଇନାର ଆଜିକା ଦିନର ଅର୍ଥନୀତିକୁ କାଟିବା ପାଇଁ ଭାରତକୁ ଆହୁରି ତିନି ଦଶନ୍ଧି ଲାଗିଯିବ  । ସମ୍ପ୍ରତି ଚାଇନାର ଜିଡ଼ିପି ୧୭ ଲକ୍ଷ କୋଟି ଡଲାରରେ ପହଁଚି ସାରିଛି  । ଯେତେବେଳେକି ଆମେରିକାର ଜିଡ଼ିପି ୨୭ ଲକ୍ଷ କୋଟି ଡଲାର ଟପିସାରିଛି  । ଅତଏବ ଭାରତର ଅର୍ଥନୀତି ୪.୧୯ ଲକ୍ଷ କୋଟି ଡଲାର ଥିବାବେଳେ ଚାଇନା ଅର୍ଥନୀତି ୪ ଗୁଣା ଓ ଆମେରିକା ଅର୍ଥନୀତି ୭ ଗୁଣା ଅଧିକ ଅଛି  । ତେଣୁ ୨୦୨୫ରୁ ହିଁ ଭାରତର ଅସଲ ପ୍ରତିଯୋଗିତା ଆରମ୍ଭ ହେବ  ।
ସମ୍ପ୍ରତି ଚାଇନା ଓ ଆମେରିକାର ଆର୍ଥିକ ଅଭିବୃଦ୍ଧି ସ୍ୱାଭାବିକ ଭାବେ କମିଯାଇଛି  । ଆମେରିକାର ବାର୍ଷିକ ଅଭିବୃଦ୍ଧି ୩% ଭିତରେ ସୀମିତ ଥିବାବେଳେ ଚାଇନାର ଅଭିବୃଦ୍ଧି ୫% ରହିଛି  । ଯେତେବେଳେକି ଭାରତ ହାରାହାରି ୭ରୁ ୮%  ଅଭିବୃଦ୍ଧି ହାସଲ କରୁଛି  । ଯାହାକି ଭାରତ ପାଇଁ ଏକ ଶୁଭ ସୂଚନା  । ଏସବୁ ଭିତରେ ବଡ଼ କଥାଟି ହେଉଛି, ବିକଶିତ ରାଷ୍ଟ୍ର ଭଳି ଭାରତର ଯୁବବର୍ଗ ଉଦ୍ୟୋଗ ଉପରେ ଧ୍ୟାନ କେନ୍ଦ୍ରୀଭୂତ କରୁଛନ୍ତି  । ସରକାରୀ ଚାକିରି କି ଚାଷବାସରେ ନିଜକୁ ସୀମିତ ନରଖି ସେମାନେ ଆର୍ଥିକ ପ୍ରଗତି ଉପରେ ଗୁରୁତ୍ୱ ଦେଉଛନ୍ତି  । ସତେ ଯେମିତି ଆମ ଯୁବବର୍ଗଙ୍କ ମନରେ ଏବେ ଉଦ୍ୟୋଗର କ୍ଷୁଧା ବେଶ ବାରି ହୋଇପଡୁଛି  । ବିଶ୍ୱର ସବୁଠାରୁ ଅଧିକ ଯୁବ ମାନବସମ୍ବଳ ଭାରତରେ ଅଛନ୍ତି  ।  ବିଶ୍ୱର ବଡ଼ ବଡ଼ କମ୍ପାନୀ ଏବେ ଭାରତର ମାନବସମ୍ବଳକୁ ଆଖିଆଗରେ ରଖି ଏଠାରେ ହିଁ କାରଖାନା ପ୍ରତିଷ୍ଠା କରୁଛନ୍ତି  ।ଶିଳ୍ପ ବିପ୍ଳବ ଭିତରେ ଆମେ କୃଷିକୁ ଭୁଲିଯିବା ଉଚିତ୍ ନୁହେଁ  । କୃଷି ବି ଅର୍ଥନୀତିକୁ ମଜବୁତ୍ କରିବାର ସାମର୍ଥ୍ୟ ରଖିଛି  । ଭାରତର ୪୩% ଲୋକ କୃଷି ସହ ଜଡ଼ିତ ଥିଲେବି ଆମର ଅର୍ଥନୀତିକୁ ଏହାର ଯୋଗଦାନ ମାତ୍ର ୧୬% ରହିଛି  । କୃଷି କ୍ଷେତ୍ରର ଅଭିବୃଦ୍ଧି ବାର୍ଷିକ ୩ରୁ ୪% ମଧ୍ୟରେ ହିଁ ସୀମିତ ଅଛି  । ଏହା ଆହୁରି ବୃଦ୍ଧି ପାଇବାର ଯଥେଷ୍ଟ ସୁଯୋଗ ବି ରହିଛି  । ଭାରତ ପାଇଁ ଏବେ ମୁଦ୍ରାସ୍ଫୀତି ଏକ ଆହ୍ୱାନ ସୃଷ୍ଟିକରିଛି  । ମୁଦ୍ରାସ୍ଫୀତି ହ୍ରାସ ନପାଇଲେ ଆମର କ୍ରୟ ଶକ୍ତି ହ୍ରାସ ପାଇବ, ସୁଧହାର ବି ବଢ଼ିବ  । ଯାହାକି ଆମର ବିତ୍ତୀୟ ଯୋଜନାକୁ ବ୍ୟାହତ କରିବ  । ଏଦିଗରେ ସରକାର ଦୃଷ୍ଟିଦେଲେ ଆମର ଆର୍ଥିକ ଅଭିବୃଦ୍ଧି ସହ ତାଳ ଦେଇ ନିଯୁକ୍ତି ବି ବଢ଼ିପାରିବ  ।
ଗଡ଼ମାଣତୀର, ଖୋରଧା, ମୋ:୮୯୧୭୨୫୮୫୫୭