"ମଞ୍ଚ ହେଉଛି ଅଭିନୟର ଏନ୍ତୁଡିଶାଳ'
Rasmita Behera
ନବରଙ୍ଗପୁର: ସ୍ଥାନୀୟ ସଂସ୍କୃତି ଭବନ ଠାରେ ଜିଲ୍ଲା ସ୍ତରୀୟ ବିଶ୍ୱ ନାଟ୍ୟ ଦିବସ ପାଳନ ହୋଇଯାଇଛି । ଏହି ଅବସରରେ ତ୍ରିଧାରା ନାଟ୍ୟ ସଂଘ ସମ୍ପାଦକ ତଥା ବିଶିଷ୍ଟ ନାଟ୍ୟକାର ଜଗନ୍ନାଥ ବେହେରାଙ୍କ ଆହ୍ୱାନକ୍ରମେ ଶତାଧିକ ନାଟ୍ୟ ପ୍ରେମୀ ଏବଂ ବିଶିଷ୍ଟ ନାଟ୍ୟକାର, ନାଟ୍ୟ ନିଦେ୍ର୍ଦଶକଙ୍କୁ ନେଇ ଏକ ବୈଠକର ଆୟୋଜନ କରାଯାଇଥିଲା । ଉକ୍ତ ବୈଠକରେ ଜିଲ୍ଲା ସଂସ୍କୃତି ଅଧିକାରୀ ଘାଷିଆ ହରିଜନ ଅଧ୍ୟକ୍ଷତା କରିଥିଲେ । ପ୍ରଶାସନ ପ୍ରତ୍ୟେକ ସମୟରେ ମଞ୍ଚର ମଙ୍ଗଳ ପାଇଁ ତପ୍ତରତା ଦେଖାଇ ଆସିଛି ବୋଲି ନିଜ ବ୍ୟକ୍ତବ୍ୟରେ ଶ୍ରୀହରିଜନ କହିଥିଲେ । ସମ୍ମାନିତ ଅତିଥି ଭାବରେ ନାଟ୍ୟକାର ଓ ନିଦେ୍ର୍ଦଶକ ପ୍ରକାଶ ସାମନ୍ତରାୟ, ଟେଲି ଫିଲ୍ମ ନିଦେ୍ର୍ଦଶକ ମନୋଜ କୁମାର ପଟ୍ଟନାୟକ, ବିଶିଷ୍ଟ ହାସ୍ୟ ଅଭିନେତା ଦୁର୍ଗା ପ୍ରଧାନ, ଅବସରପ୍ରାପ୍ତ ପ୍ରଶାସନିକ ଅଧିକାରୀ ମନୋରମା ମାଝୀ ପ୍ରମୁଖ ଯୋଗ ଦେଇଥିଲେ । ନିଦେ୍ର୍ଦଶକ ମନୋଜ କୁମାର ପଟ୍ଟନାୟକ ତାଙ୍କ ବକ୍ତବ୍ୟରେ କଳାକାର ସମାଜକୁ ସଂସ୍କାର ଏବଂ ଶୃଙ୍ଖଳାର ଜ୍ଞାନ ପ୍ରଦାନ କରିଥାଏ ବୋଲି କହିଥିଲେ । ସଭା ପ୍ରାରମ୍ଭରେ ମା ସରସ୍ୱତୀଙ୍କ ନିକଟରେ ଦୀପ ପ୍ରଜ୍ୱଳନ କରି ସଭା କାର୍ଯ୍ୟ ପ୍ରାରମ୍ଭ କରାଯାଇଥିଲା । ହାସ୍ୟ ଅଭିନେତା ମନୋଜ କୁମାର ମହାରଣା ପ୍ରାରମ୍ଭିକ ସଙ୍ଗୀତ ଗାନ କରିଥିଲେ । ଅନ୍ୟତମ ଅତିଥି ଭାବରେ ବରିଷ୍ଠ ମଞ୍ଚ ନିଦେ୍ର୍ଦଶକ ଗୋକୁଳ ଖାଡାଙ୍ଗା ମଞ୍ଚର ଅତୀତ ଭବିଷ୍ୟତ ଉପରେ ଆଲୋକପାତ କରିଥିଲେ । ବିଶିଷ୍ଟ ମଞ୍ଚ ଅଭିନେତା ଦିଲୀପ ହୋତା ମଞ୍ଚକୁ ବଞ୍ଚାଇବାକୁ ହେଲେ ଯୁବ ସମାଜ ଆଗେଇ ଆସିବା ଉଚିତ ବୋଲି ମତ ପ୍ରକାଶ କରିଥିଲେ । ସେହିପରି ସହାୟକ ଜିଲ୍ଲାପାଳ ଆଶୁତୋଷ ପାତ୍ର ଜଣେ କଳାକାରର ଜନ୍ମ ମଞ୍ଚରୁ ଆରମ୍ଭ ହୋଇ ସେଇଠି ହିଁ ଶେଷ ହୁଏ ବୋଲି ମତବ୍ୟକ୍ତ କରିଥିଲେ । ଅଭିନୟ ଜଗତ ରେ ପାଦ ଥାପୁଥିବା ଅଭିନେତା, ଅଭିନେତ୍ରୀ, ନାଟ୍ୟକାର ଏବଂ ନିଦେ୍ର୍ଦଶକଙ୍କ ମଞ୍ଚ ହିଁ ଏନ୍ତୁଡ଼ିଶାଳ ବୋଲି ବୈଠକରେ ଯୋଗ ଦେଇଥିବା ଅନ୍ୟ ଅତିଥି ଗଣ ମତ ପ୍ରଦାନ କରିଥିଲେ ।
