ସୁପ୍ରିମ୍‌କୋର୍ଟରେ ଉନ୍ନାଓ କୁକର୍ମ ମାମଲା : ସେନଗରର ଜାମିନ୍‌ ଖାରଜ

ନୂଆଦିଲ୍ଲୀ : ଉନ୍ନାଓ କୁକର୍ମ ମାମଲାରେ ଦିଲ୍ଲୀ ହାଇକୋର୍ଟଙ୍କ ଜାମିନ ଆଦେଶକୁ ଆଜି ଖାରଜ କରିଛନ୍ତି ସୁପ୍ରିମକୋର୍ଟ। ସୋମବାର ଦିନ ସୁପ୍ରିମକୋର୍ଟ ଉନ୍ନାଓ କୁକର୍ମ ମାମଲାରେ ପୂର୍ବତନ ବିଜେପି ବିଧାୟକ କୁଲଦୀପ ସିଂହ ସେନଗରଙ୍କୁ ଜାମିନ ପ୍ରଦାନ କରିଥିବା ଦିଲ୍ଲୀ ହାଇକୋର୍ଟଙ୍କ ଆଦେଶ ଉପରେ ରୋକ ଲଗାଇବା ସହ ତାଙ୍କୁ ହାଜତରୁ ମୁକ୍ତ କରାଯିବ ନାହିଁ ବୋଲି ରାୟ ଦେଇଛନ୍ତି । ଭାରତର ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜେକେ ମାହେଶ୍ୱରୀ ଓ ବିଚାରପତି ଏଜି ମାସିହଙ୍କ ଅଧ୍ୟକ୍ଷତାରେ ଗଠିତ ଏକ ତିନି ଜଣିଆ ଖଣ୍ଡପୀଠ କହିଛନ୍ତି ଯେ ଏହି ମାମଲା "ଆଇନର ଗୁରୁତ୍ୱପୂର୍ଣ୍ଣ ପ୍ରଶ୍ନ’ ଉଠାଇଛି ଓ ଏହି ମାମଲାରେ ନୋଟିସ ଜାରି କରାଯାଇଛି । ହାଇକୋର୍ଟଙ୍କ ଆଦେଶକୁ ସ୍ଥଗିତ ରଖି କୋର୍ଟ ସ୍ପଷ୍ଟ କରିଛନ୍ତି ଯେ ସେନଗର ଜେଲରେ ରହିବେ, ଉଲ୍ଲେଖ କରିଛନ୍ତି ଯେ ସେ ପୂର୍ବରୁ ଅନ୍ୟ ଏକ ଫୌଜଦାରୀ ମାମଲାରେ ସଜା କାଟୁଛନ୍ତି । 

 କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଦ୍ୱାରା ଦାଖଲ କରାଯାଇଥିବା ଏକ ଆବେଦନ ଉପରେ ସୁପ୍ରିମକୋର୍ଟ କୁଲଦୀପ ସେନଗରଙ୍କୁ ଏହି ମାମଲାରେ ତାଙ୍କ ପ୍ରତିକ୍ରିୟା ମାଗିବାକୁ ଏକ ନୋଟିସ୍‌ ମଧ୍ୟ ଜାରି କରିଛନ୍ତି । ଶୁଣାଣି ସମୟରେ ସିବିଆଇ ପକ୍ଷରୁ ସଲିସିଟର ଜେନେରାଲ (ଏସଜି) ତୁଷାର ମେହେଟା ଯୁକ୍ତି ଦେଇଥିଲେ ଯେ ଏହା ଏକ ଶିଶୁ ବଳାତ୍କାରର ଭୟଙ୍କର ମାମଲା । ଧାରା ୩୭୬ ଆଇପିସି ଏବଂ ପକ୍ସୋ ଆଇନର ଧାରା ୫ ଏବଂ ୬ ଅନୁଯାୟୀ ଚାର୍ଜ ଫ୍ରେମ୍‌ କରାଯାଇଥିଲା । ଉନ୍ନାଓ କୁକର୍ମ ମାମଲା ୨୦୧୭ ମସିହାର, ସେତେବେଳେ ଜଣେ ନାବାଳିକା ଝିଅ ଉତ୍ତର ପ୍ରଦେଶର ଉନ୍ନାଓ ଜିଲ୍ଲାରେ ତତ୍କାଳୀନ ବିଜେପି ବିଧାୟକ କୁଲଦୀପ ସିଂହ ସେନଗରଙ୍କୁ କୁକର୍ମ କରିଥିବା ଅଭିଯୋଗ କରିଥିଲେ । ଏହି ମାମଲା ଦେଶବ୍ୟାପୀ ଉତ୍ତେଜନା ସୃଷ୍ଟି କରିଥିଲା, କାରଣ ପୁଲିସ ପ୍ରଥମେ ଏଫଆଇଆର ପଞ୍ଜିକରଣ କରିବାକୁ ମନା କରିଥିଲା ଏବଂ ପୀଡିତା ଓ ତାଙ୍କ ପରିବାରକୁ ଧମକ ଏବଂ ହଇରାଣ କରାଯାଇଥିଲା । ୨୦୧୯ ରେ ଦିଲ୍ଲୀର ଏକ କୋର୍ଟ ସେନଗରଙ୍କୁ କୁକର୍ମ ପାଇଁ ଦୋଷୀ ସାବ୍ୟସ୍ତ କରିଥିଲେ ଏବଂ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ । ପୀଡିତାଙ୍କ ପିତାଙ୍କ ହାଜତ ମୃତ୍ୟୁ ସହିତ ଜଡିତ ପୃଥକ ମାମଲାରେ ଓ ସାକ୍ଷୀମାନଙ୍କୁ ପ୍ରଭାବିତ କରିବାକୁ ଚେଷ୍ଟା କରିବା ପାଇଁ ତାଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା । ତାଙ୍କ ପରିବାରର ଅନେକ ସଦସ୍ୟ ଏବଂ ସହଯୋଗୀଙ୍କୁ ମଧ୍ୟ ସମ୍ପୃକ୍ତ ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା ।

   ଦିଲ୍ଲୀ ହାଇକୋର୍ଟ ଡିସେମ୍ବର ୨୩ ତାରିଖରେ ଏହି ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ବିଜେପି ନେତା ସେନଗରଙ୍କ ଜେଲ ଦଣ୍ଡକୁ ସ୍ଥଗିତ ରଖିଥିଲେ । ଗତିବିଧି ପ୍ରତିବନ୍ଧକ ଏବଂ ନିୟମିତ ପୋଲିସ ରିପୋର୍ଟିଂ ସମେତ କଠୋର ସର୍ତ୍ତାବଳୀ ଉପରେ ହାଇକୋର୍ଟ ତାଙ୍କୁ ଆଶ୍ୱସ୍ତି ପ୍ରଦାନ କରିଥିଲେ । ଦିଲ୍ଲୀ ହାଇକୋର୍ଟ ଦ୍ୱାରା ଜେଲ ଦଣ୍ଡ ସ୍ଥଗିତ ରଖିବା ଏବଂ ଜାମିନ ପ୍ରଦାନକୁ ଚ୍ୟାଲେଞ୍ଜ କରି ଦୁଇ ଜଣ ଓକିଲ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି ।