ସେଣ୍ଟ ଜାଭିୟର୍ସ ଆବାସିକ ବିଜ୍ଞାନ ଉଚ୍ଚ ମାଧ୍ୟମିକ ବିଦ୍ୟାଳୟ ଉଦ୍ଘାଟିତ

 କେନ୍ଦୁଝର : କେନ୍ଦୁଝର ସହର ନିଉ କଲୋନୀ ସ୍ଥିତ ସେଣ୍ଟ ଜାଭିୟର୍ସ ଗ୍ରୁପର ଏକ ନୂତନ ଯୁକ୍ତ ୨ ବିଜ୍ଞାନ ପାଠ୍ୟକ୍ରମ ଥିବା ଉଚ୍ଚ ମାଧ୍ୟମିକ ବିଦ୍ୟାଳୟ ଉଦ୍ଘାଟିତ ହୋଇଯାଇଛି । ଏହି ଶିକ୍ଷାନୁଷ୍ଠାନରେ ଯୁକ୍ତ ଦୁଇ ବିଜ୍ଞାନ ପାଠ ପଢା ଚଳିତ ଶିକ୍ଷାବର୍ଷରୁ ଆରମ୍ଭ ହେବ । ଏହି ଉଚ୍ଚ ମାଧ୍ୟମିକ ବିଦ୍ୟାଳୟଟି ଆବାସିକ ହୋଇଥିବାବେଳେ ଦିବାଧ୍ୟାୟୀ ଛାତ୍ରଛାତ୍ରୀ ପଢିବାର ବ୍ୟବସ୍ଥା ରହିଛି । ଓଡିଶା ଉଚ୍ଚ ମାଧ୍ୟମିକ ଶିକ୍ଷା ପରିଷଦର ପାଠ୍ୟ ଖସଡା ଅନୁଯାୟୀ ଯୁକ୍ତ ୨ ବିଜ୍ଞାନ ପାଠ ପଢା ହେବ । ସମସ୍ତ ଛାତ୍ରଛାତ୍ରୀଙ୍କ ଉପସ୍ଥିତିରେ ପୂଜାପାଠ ପରେ ଗ୍ରୀଷ୍ମକାଳୀନ ପାଠ୍ୟକ୍ରମ ଆରମ୍ଭ ହୋଇଥିଲା । ଉଚ୍ଚ ମାଧ୍ୟମିକ ବିଦ୍ୟାଳୟର ଚେୟାରମ୍ୟାନ୍ ଇଂ ଦେବବ୍ରତ ବେହେରାଙ୍କ ପୁତ୍ର ବୈଭବ ବିକ୍ରାନ୍ତ ପୂଜାର୍ଚ୍ଚନାରେ ମୁଖ୍ୟ କର୍ତ୍ତା ଭାବେ ପୂଜା କାର୍ଯ୍ୟ ସମ୍ପାଦନା କରିଥିଲେ । ନୂତନ ଉଚ୍ଚ ମାଧ୍ୟମିକ ବିଦ୍ୟାଳୟରେ ୧୨୮ ଜଣ ଛାତ୍ରଛାତ୍ରୀ ପାଠ ପଢିବା ପାଇଁ ସିଏଚ୍ଏସଇ ଠାରୁ ଅନୁମତି ମିଳିଛି । ମୁଖ୍ୟ ଅତିଥି ରୂପେ ରାଷ୍ଟ୍ରପତି ପୁରସ୍କାରପ୍ରାପ୍ତ କୃଷକ ଚନ୍ଦ୍ରଶେଖର ବେହେରା ନୂତନ ଉଚ୍ଚ ମାଧ୍ୟମିକ ବିଦ୍ୟାଳୟକୁ ଫିତା କାଟି ଉଦ୍ଘାଟନ କରିଥିଲେ । ଉକ୍ତ ଉଚ୍ଚ ମାଧ୍ୟମିକ ବିଦ୍ୟାଳୟର ଚେୟାରମ୍ୟାନ୍ ଇଂ ଦେବବ୍ରତ ବେହେରା ପ୍ରତିଦ୍ୱନ୍ଦିତାମୂଳକ ଯୁଗରେ ଗୁଣାତ୍ମକ ଶିକ୍ଷାଦାନ ଉପରେ ଗୁରୁତ୍ୱାରୋପ କରାଯିବ ବୋଲି ପ୍ରକାଶ କରିଥିଲେ । ଏଠାରେ ଛାତ୍ରଛାତ୍ରୀଙ୍କୁ ଶୀତତାପ ନିୟନ୍ତ୍ରିତ ଶ୍ରେଣୀ ପ୍ରକୋଷ୍ଠ, ସ୍ମାର୍ଟ କ୍ଲାସ, ଉନ୍ନତମାନର ଶିକ୍ଷାଦାନ ଉପରେ ଗୁରୁତ୍ୱ ଦିଆଯାଇ କେବଳ କେନ୍ଦୁଝର ସହର ନୁହେଁ ସମଗ୍ର ରାଜ୍ୟରେ ସର୍ବଶ୍ରେଷ୍ଠ ଉଚ୍ଚ ମାଧ୍ୟମିକ ବିଦ୍ୟାଳୟରେ ପରିଣତ କରାଯିବ ବୋଲି ଶ୍ରୀ ବେହେରା ପ୍ରକାଶ କରିଛନ୍ତି । ଏଠାରେ ୨ ବର୍ଷିୟା ନିୟମିତ ଯୁକ୍ତ ୨ ବିଜ୍ଞାନ ପାଠ ପଢା,ଦଶମ ପରୀକ୍ଷା ପରେ ଗ୍ରୀଷ୍ମକାଳୀନ ପାଠପଢା ସହ ମେଧାବୀ ଛାତ୍ରଛାତ୍ରୀମାନଙ୍କ ପାଇଁ ପ୍ରବେଶିକା ପରୀକ୍ଷା (ଜେଇଇ,ନିଟ୍) ପାଇଁ କୋଚିଂର ସୁବିଧା ରହିବ । ଅନୁଷ୍ଠାନର ଟ୍ରଷ୍ଟି ସୁସ୍ମିତା ବେହେରା ଶିକ୍ଷାର ବିକାଶ କିପରି ହୋଇପାରିବ ସେ ସଂପର୍କରେ ଆଲୋକପାତ କରିଥିଲେ । ଅନୁଷ୍ଠାନର ଅଧ୍ୟକ୍ଷା ନିବେଦିତା ମିଶ୍ର ଉନ୍ନତ ମାନର ବିଜ୍ଞାନ ଶିକ୍ଷା ଦ୍ୱାରା ଛାତ୍ରଛାତ୍ରୀମାନଙ୍କର ଭବିଷ୍ୟତ କିପରି ଉଜ୍ୱଳମୟ ହୋଇପାରିବ ସେ ଦିଗରେ ଏହି ଉଚ୍ଚ ମାଧ୍ୟମିକ ବିଦ୍ୟାଳୟଟି ଉନ୍ନତମାନର ଶିକ୍ଷାଦାନ ଦେବ ବୋଲି ପ୍ରକାଶ କରିଥିଲେ । ନୂତନ ଉଚ୍ଚ ମାଧ୍ୟମିକ ବିଦ୍ୟାଳୟର ଶୁଭାରମ୍ଭ କାର୍ଯ୍ୟକ୍ରମରେ ଉପସଭାପତି କିରନ ଭାରତୀ ସହଯୋଗ କରିଥିଲେ ।