ଛାତ୍ରୀକୁ ଅସଦାଚରଣ ଘଟଣା : ଫେରାର ଅଧ୍ୟାପକ କୋର୍ଟଚାଲାଣ
Rasmita Behera
ଯାଜପୁର ଟାଉନ : ଜନୈକା ଛାତ୍ରୀଙ୍କୁ ଅସଦାଚରଣ କରିବା ଘଟଣାରେ ପୋଲିସ ଫେରାର୍ ଥିବା ଅଧ୍ୟାପକ ଙ୍କୁ ଗିରଫ କରି କୋର୍ଟ ଚାଲାଣ କରିଛି । ଘଟଣାରୁ ପ୍ରକାଶ ଯାଜପୁର ଜିଲ୍ଲା ବରୀ ବ୍ଲକ୍ ଅଭିମନୁ୍ୟ ସାମନ୍ତ ସିଂହାର ମହାବିଦ୍ୟାଳୟର ଜନୈକା ଛାତ୍ରୀଙ୍କୁ ଅର୍ଥନୀତି ବିଭାଗର ଅଧ୍ୟାପକ ବିଦ୍ୟାଧର ଧଳ ଅସଦାଚରଣ କରିଥିବା ଅଭିଯୋଗ ହୋଇଥିଲା । ଚଳିତ ବର୍ଷ ଜାନୁଜାରୀ ୬ ତାରିଖରେ କଲେଜରେ ପ୍ରାକ୍ଟିକାଲ ପରୀକ୍ଷା ଚାଲିଥିଲା । ଛାତ୍ରୀଜଣକ ପରୀକ୍ଷା ଦେବା ସମୟରେ ଅର୍ଥନୀତି ବିଭାଗର ଅଧ୍ୟାପକ ବିଦ୍ୟାଧର ଧଳ ତାଙ୍କୁ ଅନ୍ୟ ଏକ କୋଠରିକୁ ଡାକି ନେଇ ଅସଦାଚରଣ କରିଥିଲେ । ଛାତ୍ରୀଜଣକ ପାଟି କରିବାରୁ ଜଣେ କର୍ମଚାରୀ ସେଠାକୁ ଆସିଥିଲେ ମଧ୍ୟ କିଛି ନ ଦେଖିଲା ପରି ଚାଲି ଯାଇଥିଲେ । ପରେ କିଛି ଛାତ୍ର ଘଟଣା ସ୍ଥଳକୁ ଆସିବାରୁ ଅଭିଯୁକ୍ତ ଅଧ୍ୟାଌକ ଘଟଣା ସ୍ଥଳରୁ ଖସି ପଳାଇଥିଲେ । ପୀଡ଼ିତା ଘରେ ପହଞ୍ଚି ଘଟଣା ସମ୍ପର୍କରେ ପରିବାର ଲୋକଙ୍କୁ ଜଣାଇଥିଲା । ଘଟଣା ପ୍ରଘଟ କଲେ ପରୀକ୍ଷାରେ ଫେଲ୍ କରାଇଦେବାକୁ ମଧ୍ୟ ପୀଡ଼ିତାକୁ ଅଭିଯୁକ୍ତ ଧମକ ଦେ ଇଥିଲେ । ଘଟଣାକୁ ରଫାଦଫା କରିବା ପାଇଁ ଚାପ ପଡ଼ିଥିଲା । ପିଡ଼ିତା ଛାତ୍ରୀ ଜଣକ ଏହାକୁ ଭୃକ୍ଷେପ ନ କରି ଥାନାରେ ଅଭିଯୋଗ କରିବା ପରେ ପୁଲିସ ଏକ ମାମଲା ଥାନା କେଶ ନଂ.୧୬/୨୫ ରୁଜୁ କରି ତଦନ୍ତ ଆରମ୍ଭ କରିଥିଲେ । ଅଭିଯୁକ୍ତ ଅଧ୍ୟାପକକୁ ଗିରଫ ପାଇଁ ପୀଡିତା ଛାତ୍ରୀଙ୍କ ସମେତ ବିଭିନ୍ନ ସଙ୍ଗଠନ ଅନଶନରେ ବସିଥିଲେ । ଅଭିଯୁକ୍ତ ବିଦ୍ୟାଧର ଧଳ ସେହିଦିନ ଠାରୁ ପ୍ରାୟ ଦୁଇମାସ ଧରି ଫେରାର ହୋଇଥିବାବେଳେ ତାଙ୍କୁ ଧରିବା ପାଇଁ ଯାଜପୁର ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରିଥିଲା । ଏହି ସ୍ୱତନ୍ତ୍ର ଟିମ୍ ଗୁଜୁରାଟ ର ସୁରଟ୍ ଅଞ୍ଚଳରେ ତାଙ୍କ ସଂପର୍କୀୟଙ୍କ ଭଉଣୀ ଘରେ ରହୁଥିବା ଜାଣି ତାଙ୍କୁ ସେଠାରୁ ଗିରଫ କରିଥିଲା । ତେବେ ଶନିବାର ଦିନ ସ୍ୱତନ୍ତ୍ର ଟିମ୍ ସହାୟତାରେ ଅଭିଯୁକ୍ତ ଯାଜପୁର ଏସ.ଡି.ଜେ.ଏମ୍ କୋର୍ଟରେ ହାଜର କରିଥିଲା । ଏସ.ଡି.ଜେ.ଏମ୍ ଜାମିନ୍କୁ ନାମଞ୍ଜୁର କରିବା ଫଳରେ ଅଭିଯୁକ୍ତଙ୍କୁ ଯାଜପୁର ଜିଲ୍ଲା କାରାଗାରକୁ ପଠାଇ ଦିଆଯାଛି ।
