ଅରୁଣଙ୍କ ମନରେ ନିଆଁ : ନିଜେ ଜଳିବେ ନା ଜାଳିବେ

 ଭୁବନେଶ୍ୱର: ଏକଦା ରାଜ୍ୟ ରାଜନୀତିରେ ତିନି ଯୁବନେତାଙ୍କୁ ନେଇ ଚର୍ଚ୍ଚା ହେଉଥିଲା  । ତକôାଳୀନ ଜନତା ଦଳର ଅରୁଣ ସାହୁ, ବିଜେପିର ଧର୍ମେନ୍ଦ୍ର ପ୍ରଧାନ ଓ କଂଗ୍ରେସର ଲୁଲୁ ମହାପାତ୍ର  । ଏବେ ଲୁଲୁ ଆରପାରିରେ ଥିବାବେଳେ ଧର୍ମେନ୍ଦ୍ର ଓ ଅରୁଣ ରାଜନୀତିକ ମଇଦାନରେ ଅଛନ୍ତି  । ନିଜ ନିଜ ଦଳରେ ବି ସେମାନଙ୍କର ଢେର ପ୍ରଭାବ ରହିଛି  । କିନ୍ତୁ ଅରୁଣଙ୍କ ତେଜ ବିଜେଡ଼ିରେ ହ୍ରାସ ପାଇପାଇ ଚାଲିଛି  । ଦକ୍ଷତା ଅନୁଯାୟୀ ଦଳ ତାଙ୍କୁ ଦାୟିତ୍ୱ ଦେଇନାହିଁ  । ତେବେ ବିଜେଡ଼ି ପାୱାରରେ ଥିବାବେଳେ କ୍ଷମତା ପାଇଁ ଅରୁଣଙ୍କ ମୁହଁରେ ତୁଣ୍ଡି ବନ୍ଧା ହୋଇଥିବାବେଳେ ଏବେ କିନ୍ତୁ ତୁଣ୍ଡ ଖୋଲିଛି  । ଖାଲି ଖୋଲିନି ବରଂ ପାଟିରୁ ଅଗ୍ନିବର୍ଷା ହେଉଛି କହିଲେ ଭୁଲ୍ ହେବନାହିଁ  ।
ଏକ ସଭାରେ ଅରୁଣ ପରୋକ୍ଷରେ ଫାଇଭ୍ ଟି ବାଣ ମାରିଥିଲେ  । ଆମେ ଯେମିତି ଫାଇଭ ଟି ପାଇଁ ଗଲୁ, ତମେ ସେମିତି ଅସ୍ମିତା ପାଇଁ ଯିବ ବୋଲି ଅରୁଣ ବିଜେପି ଉଦେ୍ଦଶ୍ୟରେ କହିଥିଲେ  । ତେବେ ଫାଇଭ ଟି ବାଣକୁ ନେଇ ବିଜେଡ଼ିରେ ଆଲୋଡ଼ନ ସୃଷ୍ଟି ହୋଇଥିଲା  ।
ସେହିପରି ନବୀନ ବାବୁ ହସପିଟାଲରେ ଥିବାବେଳେ ରଣେନ୍ଦ୍ର ପ୍ରତାପ ସ୍ୱାଇଁ କିଭଳି ପାଣ୍ଡିଆନଙ୍କ ପନôୀ ସୁଜାତା କାର୍ତ୍ତିକେୟନ୍ଙ୍କୁ ଟାର୍ଗେଟ୍ କରିଥିଲେ ତାହା ସମସ୍ତେ ଜାଣିଛନ୍ତି  । ସେହି ସମୟରେ ପାଣ୍ଡିଆନଙ୍କ ବହୁ ଚର୍ଚ୍ଚିତ ଡାଇଲଗ୍, ‘ଆଇ ଆମ୍ ଡାଉନ୍, ବଟ ନଟଆଉଟ’କୁ ନେଇ ବି ଚର୍ଚ୍ଚା ହୋଇଥିଲା  । କୁହାଯାଉଛି ସେଠାରେ ଉଭୟ ରାଜା ଓ ଅରୁଣ ଥିଲେ  । ସୁଜାତା ଆସିବା ପୂର୍ବରୁ ଏନେଇ କଥା ଛଳରେ ଉଭୟ ନେତା କ୍ଷୋଭ ପ୍ରକାଶ କରିଥିଲେ  । ତେବେ ସୁଜାତା ଆସିବା ବେଳେ ଅରୁଣ ଚୁପ୍ ବସିଥିବାବେଳେ ରାଜା କିନ୍ତୁ ଭଲକି ଶୁଣାଇଥିଲେ  । ଅରୁଣ ଚୁପ୍ ବସିଥିଲେବି ସେ କୁଆଡ଼େ ରାଜାଙ୍କୁ ଟିହାଇଥିଲେ ବୋଲି ପାଣ୍ଡିଆନଙ୍କ ପାଖକୁ ବାର୍ତ୍ତା ଯାଇଥିବା ଚର୍ଚ୍ଚା ହେଉଛି  ।
ଖାଲି ସେତିକିନୁହେଁ ନିକଟରେ ଅରୁଣ ସାହୁ ଓ ଅନ୍ୟ କେତେକ ନେତା ନବୀନ ନିବାସ ଯାଇ ନବୀନଙ୍କୁ ଭେଟିଥିଲେ  । ପରେ ଅରୁଣ ଏନେଇ ବିବୃତ୍ତି ଦେଇଥିଲେ  । ସାଧାରଣତଃ ନବୀନଙ୍କୁ ଭେଟିବା ସମୟର ଫଟୋ କି ଭିଡ଼ିଓ ଜାରି ହୋଇଥାଏ  । ହେଲେ ଅରୁଣ ନବୀନ ନିବାସ ବାହାରେ ଭିଡ଼ିଓ ସୁଟ୍ କରି ବାର୍ତ୍ତା ଦେଇଥିଲେ  । ସେଦିନ ସେ ନବୀନଙ୍କୁ ଭେଟିଛନ୍ତି କି ନାହିଁ ତାହା ମା’ ଗଙ୍ଗେଇଙ୍କୁ ଜଣା  । କାହିଁକିନା ତାଙ୍କ ସହ ଯାଇଥିବା କୌଣସି ନେତା ନବୀନଙ୍କ ସହ ଭେଟଘାଟର ଫଟୋ ସୋସିଆଲ ମିଡ଼ିଆରେ ଛାଡ଼ିନଥିଲେ  ।
ଏହାର କିଛିଦିନ ପରେ ଅର୍ଥାତ ଗୁରୁଦିବସ ଦିନ ଅରୁଣ କିଭଳି ବିଦ୍ରୋହ ନିଅାଁରେ ଜଳୁଛନ୍ତି ତାହା ବଖାଣିଛନ୍ତି  । ରାଜ୍ୟର ଦୁର୍ଗତି କଥା ସେ କହିଥିଲେବି ବିଜେଡ଼ିର ଦୁର୍ଗତି ପାଇଁ ଦାୟୀ ନେତାଙ୍କୁ ସେ ପ୍ରକୃତରେ ଇଙ୍ଗିତ କରିଥିବା କୁହାଯାଉଛି  । ଏମିତିକି ଜାଳିପୋଡ଼ି ଧ୍ୱଂସ କରିଦେବାକୁ ଓ ବଡ଼ ବିପ୍ଳବ ପାଇଁ ମଧ୍ୟ ସେ ସଂକେତ ଦେଇଛନ୍ତି  । 
ରାଜନୀତିକ ମହଲରେ ହେଉଥିବା ଚର୍ଚ୍ଚା ଅନୁଯାୟୀ, ଅରୁଣ ଅନେକ ବର୍ଷ ଧରି ଦଳର କାର୍ଯ୍ୟଧାରାକୁ ନେଇ ସନ୍ତୁଷ୍ଟ ନାହାନ୍ତି  । ୨୦୧୭ ମେ’୬ରେ ହଠାତ୍ ଦଳର ୟଙ୍ଗ ବ୍ରିଗେଡ଼ମାନେ ମନ୍ତ୍ରୀମଣ୍ଡଳରୁ ଇସ୍ତଫା ଦେଲେ  । ସେଥର ୧୦ ମନ୍ତ୍ରୀ ଇସ୍ତଫା ଦେଇଥିବାବେଳେ ସେମାନଙ୍କ ମଧ୍ୟରେ ଥିଲେ ସଂଜୟ ଦାସବର୍ମା, ଅରୁଣ ସାହୁ, ପ୍ରଦୀପ ପାଣିଗ୍ରାହୀ, ପ୍ରଣବ ପ୍ରକାଶ ଦାସ, ସୁଦାମ ମାରାଣ୍ଡି ଓ ପୁଷ୍ପେନ୍ଦ୍ର ସିଂହଦେଓ ପ୍ରମୁଖ  । ସେତେବେଳେ ଅରୁଣ ଓ ସଂଜୟ ମଧ୍ୟ ଦଳର ଏମିତି ନିଷ୍ପତ୍ତିକୁ ନେଇ ସନ୍ତୁଷ୍ଟ ନଥିଲେ  । ବବି ଦାସ ହିଁ ଏଭଳି ନାଟକ ରଚିଥିବା ନେଇ ସେତେବେଳେ ଗଣମାଧ୍ୟମରେ ଖବର ପ୍ରକାଶ ପାଇଥିଲା  ।  ଆମେ ସବୁ ସଂଗଠନ କାର୍ଯ୍ୟ କରିବୁ, ମନ୍ତ୍ରୀ ପଦ ଛାଡ଼ି ରାଜ୍ୟ ବୁଲିବୁ ବୋଲି ବବି ହିଁ ନବୀନଙ୍କୁ ବୁଝାଇଥିଲେ  । ଅବଶ୍ୟ ଏ ବୁଦ୍ଧି ପାଣ୍ଡିଆନଙ୍କର ଥାଇପାରେ ବୋଲି କୁହାଯାଇପାରେ  । 
୨୦୨୦ ମାର୍ଚ୍ଚ ୫ରେ ପ୍ରଣବ ପ୍ରକାଶ ଦାସଙ୍କୁ ନବୀନ ବାବୁ ସଂଗଠନ ସମ୍ପାଦକ ଦାୟିତ୍ୱ ଦେଲେ  । ଅର୍ଥାତ୍ ଦଳରେ ସେ ନମ୍ବର ୨ ବୋଲାଇଲେ  । ଯାହାକୁ ନେଇ ବି ଅରୁଣ କ୍ଷୁବ୍ଧ ଥିଲେ  । କିନ୍ତୁ ବାଧ୍ୟରେ ମନକଥା ମନରେ ମାରି ରଖିôଥିଲେ  । ୨୦୨୪ ନିର୍ବାଚନ ପୂର୍ବରୁ ବବି ଦାସ ଓ ପରେ ପାଣ୍ଡିଆନଙ୍କ ମାତ୍ରାଧିକ ମାମଲତିକୁ ନେଇ ବି ସେ ଅସନ୍ତୁଷ୍ଟ ଥିଲେ  । କିନ୍ତୁ ନବୀନଙ୍କ ଡର ଓ ପତା କଟିଯିବା ଭୟରେ ସେ ନୀରବ ରହିଥିଲେ  । 
ଗତ ବର୍ଷ ମେ’ରେ ବିଜୁ ଜନତା ଦଳ ୨୪ ବର୍ଷ ପରେ ରାଜନୈତିକ ବ୍ୟାପାର କମିଟି ଗଠନ କରିଥିଲା  । ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଗଠିତ କମିଟିରେ ବିକ୍ରମ କେଶରୀ ଆରୁଖ, ପ୍ରମିଳା ମଲ୍ଲିକ, ନିରଞ୍ଜନ ପୂଜାରୀ, ସଞ୍ଜୟ କୁମାର ଦାସବର୍ମା, ପ୍ରଣବ ପ୍ରକାଶ ଦାସ, ସୁଦାମ ମାରାଣ୍ଡି, ଟୁକୁନି ସାହୁ, ସସ୍ମିତ ପାତ୍ର ଓ ସଂତୃପ୍ତ ମିଶ୍ର କମିଟିରେ ରହିଥିଲେ  । ତେବେ ଆଶ୍ଚର୍ଯ୍ୟଜନକ ଭାବେ ଅରୁଣ ଏଥିରେ ସ୍ଥାନ ପାଇନଥିଲେ  । ଯାହାକି ତାଙ୍କ କ୍ଷୋଭ ଓ ଅସନ୍ତୋଷକୁ ବଢ଼ାଇ ଦେଇଥିଲା  । ଏତଦବ୍ୟତୀତ ଦଳ ଏତେ ସରି ହେବା ପରେ ନିର୍ଦ୍ଦିଷ୍ଟ କୋଟରୀ ବିଜେଡ଼ିକୁ ଚଳାଉଥିବାରୁ ତାଙ୍କ ମନରେ ବିଦ୍ରୋହର ନିଅାଁ ଜଳିଛି  ।
ଏବେ କଥା ହେଉଛି, ଅରୁଣ ନିଜ ମନରେ ଥିବା ବିଦ୍ରୋହର ନିଅାଁରେ ନିଜେ ଅନୁତପ୍ତ ହୋଇ ଜଳିବେ ନା ବିସ୍ଫୋରଣ କରି ନିର୍ଦ୍ଦିଷ୍ଟ କୋଟରୀକୁ ଜଳାଇବେ ତାହା ଦେଖିବାକୁ ବାକି ରହିଲା  ।