‘ଡବଲ ଇଞ୍ଜିନ୍’ ଲାଇନ୍ଚ୍ୟୁତ
Rasmita Behera
ଭୁବନେଶ୍ୱର : ଆଜ୍ଞା ହଁ । ରାଜ୍ୟର ଡବଲ ଇଞ୍ଜିନ ଲାଇନଚ୍ୟୁତ ହୋଇଯାଇଛି । ଆମେ କେନ୍ଦ୍ରର ମୋଦି ସରକାର କି ରାଜ୍ୟର ମୋହନ ସରକାରଙ୍କ କଥା କହୁନାହୁଁ । ଆମେ କହୁଛୁ ବିଜେପିର ଡବଲ ଇଞ୍ଜିନ୍ କଥା । ମାନେ ଦଳ ଓ ସରକାରଙ୍କ କଥା । ମୋଦି ଓ ମୋହନ ସିନା ଠିକ୍ରେ ଚାଲିଛନ୍ତି ହେଲେ ମନମୋହନ ଆଉ ମୋହନ କିନ୍ତୁ ଠିକ୍ରେ ଚାଲୁନାହାନ୍ତି ବୋଲି ବିଜେପି ଅଳିନ୍ଦରେ ଚର୍ଚ୍ଚା ହେଉଛି । ଡବଲ ଇଞ୍ଜିନ୍ ଲାଇନଚ୍ୟୁତ୍ ହୋଇ ଯାଇଥିବାରୁ ବିଜେପି ନେତା ଓ କର୍ମୀଙ୍କ ମନରେ ଏକ ନେଗେଟିଭ୍ ଭାଇବ୍ସ ସୃଷ୍ଟିକରିଛି ।
ଅତୀତର ଭୁଲ୍ରୁ ଶିଖିବା ଏକ ସାଧାରଣ କଥା । କିନ୍ତୁ ବିଜେପି ଅତୀତର ଭୁଲରୁ ଶିଖି ପାରୁନାହିଁ । ୨୦୦୦ରୁ ୨୦୦୯ ପର୍ଯ୍ୟନ୍ତ ଦଳ ସରକାରରେ ଥିଲା । କିନ୍ତୁ ମେଣ୍ଟ ଭାଙ୍ଗିବା ପରେ ବିଜେଡ଼ି ସେଞ୍ଚୁରୀ ମାରି ସରକାର ଗଢ଼ିଥିଲେବି ବିଜେପି କିନ୍ତୁ ମାଟି କାମୁଡ଼ିଥିଲା । ତାହାର କାରଣ ହେଉଛି, ସେତେବେଳେ ବିଜେପିର ଅନେକ ମନ୍ତ୍ରୀ ସଂଗଠନ ଉପରେ ଆଦୌ ଗୁରୁତ୍ୱ ଦେଇନଥିଲେ । ଯେଉଁଥିପାଇଁ ବହୁ ବଡ଼ ବଡ଼ ମନ୍ତ୍ରୀ, ସାଂସଦ ଓ ବିଧାୟକ ବି ୨୦୦୯ ନିର୍ବାଚନରେ ଚିତ୍ପଟାଙ୍ଗ ମାରିଥିଲେ ।
ସେବେଠାରୁ ଦୀର୍ଘ ୧୫ ବର୍ଷ ଧରି ବିଜେପି ବିରୋଧୀ ଦଳରେ ଥିଲା । ସେତେବେଳେ ଦଳ ଭିତରେ ସାମାନ୍ୟ ତୁ ତୁ ମେଁ ମେଁ ଥିଲେବି ଦଳ ତା’ ବାଟରେ ଆଗେଇ ଚାଲିଥିଲା । କେନ୍ଦ୍ରରେ ମୋଦି ସରକାର ଆସିଥିବାବେଳେ ଧର୍ମେନ୍ଦ୍ର ପ୍ରଧାନ କେନ୍ଦ୍ରମନ୍ତ୍ରୀ ହୋଇଥିଲେ । ମୁଖ୍ୟମନ୍ତ୍ରୀ ହେବା ଆଶାରେ ଧର୍ମେନ୍ଦ୍ର ରାଜ୍ୟ ବିଜେପିକୁ ଚଳଚଞ୍ଚଳ କରିଥିବାବେଳେ ମୋଦି ଓ ଅମିତ୍ ଶାହା ବି ସବୁରକମ ସହାୟତା ଯୋଗାଇ ଦେଇଥିଲେ । ଯାହାର ଫଳସ୍ୱରୂପ ୨୦୨୪ରେ ବିଜେଡ଼ିକୁ ଚକମା ଦେଇ ଦଳ ସରକାର ଗଢ଼ିଛି । ହେଲେ ୧୦ ମାସରୁ ଉଦ୍ଧ୍ୱର୍ ସମୟ ହେଲା ସରକାର ଆସିଥିଲେବି ଦଳର ତୁଙ୍ଗ ନେତାମାନଙ୍କ କ୍ଷମତା ଟିକିଏ ବି ବଢ଼ିନାହିଁ । ବିଜେଡ଼ି ଅମଳରେ ସେମାନେ ଯେଉଁ ସ୍ଥିତିରେ ଥିଲେ ଏବେବି ସେହି ସ୍ଥିତିରେ ଅଛନ୍ତି ।
ମନ୍ତ୍ରୀ ପଦ ହେଉକି ନିଗମ ଅଧ୍ୟକ୍ଷ, କମିଶନ ସଦସ୍ୟ ହେଉକି ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ, ସବୁ ଏବେ ଫାଙ୍କା । ଏହାର କାରଣ ହେଉଛି ଦଳ ଓ ସରକାର ଭିତରେ ସମନ୍ୱୟ ନାହିଁ । ଦଳ ଓ ସରକାରରେ ପାୱାରକୁ ନେଇ ଏବେ ଛକାପଞ୍ଝା ଆରମ୍ଭ ହୋଇଯାଇଛି । ଧର୍ମେନ୍ଦ୍ର ବି ଆଉ ଆଗଭଳି ରାଜ୍ୟ ବିଜେପି ରାଜନୀତିରେ ସକ୍ରିୟ ଥିବା ଦେଖିବାକୁ ମିଳୁନାହିଁ । ଏବେ ସେ ବିକାଶ ମୂଳକ କାମ ଓ ସମ୍ବଲପୁର ଉପରେ ହିଁ ଫୋକସ୍ କରୁଛନ୍ତି । ଯାହାର ପ୍ରତିକୂଳ ପ୍ରଭାବ ଏବେ ସଂଗଠନ ଉପରେ ପଡ଼ିବା ଆରମ୍ଭ କଲାଣି । ଏବେଠୁ ବିଜେପି ନଚେତିଲେ ନେଡ଼ିଗୁଡ଼ କହୁଣୀକୁ ବୋହିଯିବା ଥୟ ।
