ଏନଏସି ମାନ୍ୟତା ଦାବିରେ କଂଗ୍ରେସ ପକ୍ଷରୁ ବନ୍ଦ ଡାକରା
Rasmita Behera
କାକଟପୁର : କାକଟପୁର ନିର୍ବାଚନ ମଣ୍ଡଳୀର ହେଡ଼କ୍ୱାର୍ଟର ଭାବେ ପରିଗଣିତ ହେଉଥିବା ବେଳେ ଏନଏସି ମାନ୍ୟତା ତାଲିକାରେ ସର୍ବାଗ୍ରେ ରହିଥିଲା । ବିଜେଡି ସରକାର ସମୟରେ ନିର୍ବାଚନକୁ ଆଖିଆଗରେ ରଖି କାକଟପୁରକୁ ଏନଏସି ଘୋଷଣା ତାଲିକାରେ ରହିଥିଲା । ମାତ୍ର ନିର୍ବାଚନ ପରେ ବିଜେପି ସରକାର କୁ ଆସିଲା ପରେ କାକଟପୁରର ଏନଏସି ମାନ୍ୟତା ସ୍ୱପ୍ନ ପାଲଟିଛି । ରାଜ୍ୟରେ ବିଭିନ୍ନ ସ୍ଥାନରେ ଏନଏସି ମାନ୍ୟତା ପାଇଁ ବନ୍ଦ, ହରତାଳ, ବିକ୍ଷୋଭ ଚାଲିଥିବା ବେଳେ କାକଟପୁରର ମାନ୍ୟତା ଅଧାରେ ଅଟକିଛି । ତେବେ ଆଜି ରାଜ୍ୟ ବିରୋଧୀ ଦଳ ଜାତୀୟ କଂଗ୍ରେସର କାକଟପୁର ବ୍ଲକ କଂଗ୍ରେସ ପକ୍ଷରୁ ଏନଏସି ମାନ୍ୟତା ଦାବି ନେଇ ଆସନ୍ତା ୨୮ ତାରିଖ ଗୁରୁବାର ଦିନ କାକଟପୁର ୧୨ ଘଣ୍ଟିଆ ବନ୍ଦ ଡାକରା ପାଇଁ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ପତ୍ର ମାଧ୍ୟମରେ ଜଣାଇଛନ୍ତି । ବ୍ଲକ କଂଗ୍ରେସ ସଭାପତି ଅବଧୂତ ସ୍ୱାଇଁ ୧୨ ଘଣ୍ଟିଆ ଅଖ ଚକ ବନ୍ଦ ସହିତ ଶାନ୍ତିପୂର୍ଣ ବନ୍ଦ ସଫଳତା ପାଇଁ ଜନସାଧାରଣଙ୍କୁ ନିବେଦନ କରିଛନ୍ତି । ଏହି ବନ୍ଦ ଡାକରା ସଫଳ ପାଇଁ ପ୍ରଚାର ପ୍ରସାର ଦାୟିତ୍ୱକୁ କାକଟପୁର ପ୍ରେସକ୍ଲବକୁ ପତ୍ର ଦ୍ୱାରା ଦଳ ପକ୍ଷରୁ ଅବଗତ କରାଯାଇଛି । ବୈଠକରେ ବ୍ଲକ କଂଗ୍ରେସ ସଂଯୋଜକ ଜସ୍ୱବନ୍ତ ନାରାୟଣ ମହାନ୍ତି, ପୂର୍ବତନ ବ୍ଲକ ଅଧ୍ୟକ୍ଷ ବିପିନ ବିହାରୀ ମହାନ୍ତି, ଜିଲ୍ଲା ସମ୍ପାଦକ ସୋମ୍ୟକାନ୍ତ ଖୁଣ୍ଟିଆ, ବିଚିତ୍ରା ନନ୍ଦ ଦାଶ, ସେକ ଲିଆକାତ, ସୁକାନ୍ତ ପରିଡା, ନଳିନୀ କାନ୍ତ ଦୀକ୍ଷିତ, କରୁଣାକର ସେନାପତି, ରଜବ ଅଲ୍ଲୀ ବେଗ, ସେକ ହିମାୟତ, ପ୍ରଫୁଲ୍ଲ ନାୟକ, ପ୍ରଫୁଲ ବିଶ୍ୱାଳ, ହୃଷିକେଶ ବେହେରା, ନାରାୟଣ ପୃଷ୍ଟି ପ୍ରମୁଖ ଯୋଗ ଦେଇଥିଲେ ।
