ଚନ୍ଦକାରେ ହେବ ଏସୀୟ ହାତୀ ଗବେଷଣା କେନ୍ଦ୍ର
Rasmita Behera
ଭୁବନେଶ୍ୱର: ଚନ୍ଦକାରେ ହେବ ଏସୀୟ ହାତୀ ଗବେଷଣାକେନ୍ଦ୍ର । ଆମ ରାଜ୍ୟର ହାତୀ ସଂରକ୍ଷଣ ମଡ଼େଲ ବିଶ୍ୱକୁ ବି ପ୍ରେରଣା ଦେବ । ବିଶ୍ୱର ବିଶେଷଜ୍ଞମାନେ ହାତୀ ସଂରକ୍ଷଣ ଉପରେ ଅଭିନବ ପଦକ୍ଷେପ ସମ୍ପର୍କରେ ଦେଇଥିବା ପରାମର୍ଶକୁ ରାଜ୍ୟ ସରକାର କାର୍ଯ୍ୟକାରୀ କରିବେ । ହାତୀ ସଂରକ୍ଷଣ ନେଇ ଅନୁଷ୍ଠିତ ଅନ୍ତର୍ଜାତୀୟ କର୍ମଶାଳାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହା କହିଛନ୍ତି ।
ମୁଖ୍ୟମନ୍ତ୍ରୀ କହିଲେଯେ, ଚନ୍ଦକା ବନ୍ୟପ୍ରାଣୀ ଡିଭିଜନର ଗୋଡ଼ିବାରିରେ ବସିଶ୍ୱର ପ୍ରଥମ ଏସୀୟ ହାତୀ ଗବେଷଣା କେନ୍ଦ୍ର ସ୍ଥାପନ କରାଯିବ । ଆଇସିୟୁଏନ ସ୍ପେଶିସ୍ ସର୍ଭାଇଭାଲ କମିଶନ, ଭାରତୀୟ ବନ୍ୟପ୍ରାଣୀ ଟ୍ରଷ୍ଟ, କଲମ୍ବସ ଜୁ ଓ ଆକ୍ୱାରିୟମ୍ ସହଯୋଗରେ ଏହା ସ୍ଥାପିତ ହେବ । ଏହା ଦକ୍ଷିଣ ଓ ଦକ୍ଷିଣ ପୂର୍ବ ଏସିଆ ପାଇଁ ବି ବେଶ୍ ଉପାଦେୟ ହେବ ବୋଲି ସେ କହିଥିଲେ । ମୁଖ୍ୟମନ୍ତ୍ରୀ କହିଲେଯେ, ହାତୀ ହେଉଛନ୍ତି ଆମ ସଂସ୍କୃତି, ଇତିହାସ ଓ ଆଧ୍ୟାତ୍ମିକତାର ଅଂଶ । କୃଷି ଓ ଭିତ୍ତିଭୂମିର ଅଭିବୃଦ୍ଧି ଯୋଗୁଁ ହାତୀମାନଙ୍କର ପାରମ୍ପରିକ ବାସସ୍ଥଳୀ ପ୍ରଭାବିତ ହୋଇଛି । ଫଳରେ ମଣିଷ ଓ ହାତୀ ମଧ୍ୟରେ ଲଢ଼େଇ ଭଳି ପରିସ୍ଥିତି ସୃଷ୍ଟି ହେଉଛି । ଏନେଇ ରାଜ୍ୟ ସରକାର ନେଇଥିବା ପଦକ୍ଷେପ ସମ୍ପର୍କରେ ମୁଖ୍ୟମନ୍ତ୍ରୀ ସୂଚନା ଦେଇଥିଲେ । ଓଡ଼ିଶା ହାତୀଙ୍କ ପାଇଁ ଏକ ବିକାଶ ମଡ଼େଲ ସୃଷ୍ଟି କରିବ, ଯେଉଁଠାରେ ହାତୀମାନେ ନିର୍ଭୟରେ ବିଚରଣ କରିପାରିବେ । ଏହି କର୍ମଶାଳାରେ ଭଲ ଭଲ ପଦକ୍ଷେପ ନେଇ ଆଲୋଚନା ହେବ । ବିଶ୍ୱରେ ଆରମ୍ଭ ହେଉଥିବା ହାତୀ ସଂରକ୍ଷଣ ଅଭିଯାନର ଓଡ଼ିଶା ନେତୃତ୍ୱ ନେବବୋଲି ସେ କହିଥିଲେ ।
