ଛୁରୀରେ ଆକ୍ରମଣ କରି ଘରୁ ଲୁଟ୍ ; ଲୁଟେରା ଗିରଫ
Jitendra Sahu
3760
-
ଭୁବନେଶ୍ୱର, ୯ା୯ : ରାତିରେ ଘରେ ପଶି ଅଭିଯୋଗକାରୀଙ୍କୁ ଛୁରୀରେ ଆକ୍ରମଣ କରି ମୋବାଇଲ ଓ ୫ ହଜାର ଟଙ୍କା ଲୁଟ୍ । ଏନେଇ ମୈତ୍ରୀବିହାର ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଲୁଟେରାକୁ ଗିରଫ କରିବା ସହ ତାଠାରୁ ୧୦ଟି ଦାମି ଚୋରା ମୋବାଇଲ ଓ ୫ ହଜାର ଟଙ୍କା ଜବତ କରିଛି । ଗିରଫ ଲୁଟେରା ହେଲା, ରଞ୍ଜିତ୍ କହଁର । ପୂର୍ବରୁ ଅଭିଯୁକ୍ତ ରଞ୍ଜିତ୍ ନାମରେ ନୟାପଲ୍ଲୀ ଥାନା, ସହିଦନଗର ଥାନା ଓ ମୈତ୍ରୀବିହାର ଥାନାରେ ୩ଟି ଅପରାଧିକ ମାମଲା ରହିଥିବା ଜଣାପଡ଼ିଛି । ପରେ ଆଜି ତାକୁ କୋର୍ଟ ଚାଲାଣ କରାଯାଇଛି ।
ସୂଚନା ଯୋଗ୍ୟଯେ, ଅଭିଯୋଗକାରୀ ବାଇଶି ମଲ୍ଲିକଙ୍କ ମୈତ୍ରୀବିହାର ଥାନା ଅନ୍ତର୍ଗତ ଶକ୍ତିବିହାର ଅଞ୍ଚଳରେ ସପରିବାର ରୁହନ୍ତି । ଗତ କାଲି ରାତିରେ ଅଭିଯୋଗକାରୀ ଏବଂ ତାଙ୍କ ସ୍ତ୍ରୀ ଘରେ ଶୋଇଥିବା ବେଳେ, ବିଳମ୍ବିତ ରାତିରେ ଅଭିଯୁକ୍ତ ଏବଂ ତାର ଜଣେ ସହଯୋଗୀ ମିଶି ଅଭିଯୋଗକାରିଙ୍କ ଘରେ ପଶି ଚୋରି ଉଦ୍ୟମ କରିଥିଲେ । ଏହି ସମୟରେ ଅଭିଯୋଗକାରୀ ନିଦରୁ ଉଠିପଡ଼ି ଅଭିଯୁକ୍ତକୁ କାବୁ କରିବାକୁ ଉଦ୍ୟମ ବେଳେ, ଅଭିଯୁକ୍ତ ଏକ ଛୁରୀରେ ଆକ୍ରମଣ କରି ଏକ ମୋବାଇଲ ଓ ୫ ହଜାର ଟଙ୍କା ନେଇ ଫେରାର ହୋଇଯାଇଥିଲେ । ଏନେଇ ଅଭିଯୋଗକାରି ମୈତ୍ରୀବିହାର ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଜଣେ ଅଭିଯୁକ୍ତକୁ ଶକ୍ତିବିହାର ଅଞ୍ଚଳରୁ ଗିରଫ କରାଯାଇଛି । ତାଠାରୁ ୧୦ଟି ମୋବାଇଲ ଓ ୫ ହଜାର ଟଙ୍କା ଜବତ କରାଯାଇଛି ।
