ଦୁଇ ଥାନାରେ ୨ ଲୁଟେରା ଗିରଫ ; ୩ ବାଇକ ଜବତ
Jitendra Sahu
ଭୁବନେଶ୍ୱର, ୧୬ା୫ : କମିଶନରେଟ୍ ପୁଲିସର ଇନଫୋଭ୍ୟାଲି ଓ ତମାଣ୍ଡୋ ଥାନା ପୁଲିସ ୨ ଜଣ ୨ ଲୁଟେରାଙ୍କୁ ଗିରଫ କରିବା ସହ ସେମାନଙ୍କ ଠାରୁ ୩ଟି ବାଇକ ଜବତ କରିଛନ୍ତି । ୨ ଥାନାର ଦୁଇ ଅଭିଯୁକ୍ତ ହେଲେ, ଢ଼େଙ୍କାନାଳ ଜିଲ୍ଲାର ଦିଲୀପ୍ ସାହୁ ଓ ଖୋର୍ଦ୍ଧାର କୃପାସିନ୍ଧୁ ସାହୁ । ଆଜି ୨ ଜଣଙ୍କୁ କୋର୍ଟ ଚାଲାଣ କରାଯାଇଛି ।
ସୂଚନାଯୋଗ୍ୟଯେ, ଇନଫୋଭ୍ୟାଲି ଥାନାର ମାମଲା, ଗତ ଏପ୍ରିଲ ମାସ ୨୧ ତାରିଖରେ ଅଭିଯୋଗକାରୀ ସୀମାନ୍ତ କୁମାର ସାହୁ ତାଙ୍କର ବାଇକ ଟିକୁ ଅଳକାର ଗାଁ ସ୍ଥିତ ଉତ୍ତରାଣୀ ମିଲ ପଛ ପାଶ୍ୱର୍ରେ ଥିବା ଆମାଜନ ଅଫିସ ପରିସର ପାର୍କିଂରେ ରଖିଥିଲେ । ଏହି ସମୟରେ ଅଭିଯୁକ୍ତ ଜଣକ ସୁଯୋଗ ଦେଖି ତାଙ୍କର ବାଇକକୁ ଚୋରି କରି ନେଇଯାଇଥିଲା । ଏନେଇ ଅଭିଯୋଗକାରୀ ଇନଫୋଭ୍ୟାଲି ଥାନାରେ ଅଭିଯୋଗ ପରେ, ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତକୁ ଗିରଫ କରିବା ସହ ତାଠାରୁ ୨ଟି ଚୋରା ବାଇକ ଜବତ କରିଛି ।
ସେହିଭଳି ତମାଣ୍ଡୋ ଥାନା ପୁଲିସ ମଧ୍ୟ ଅଭିଯୋଗକାରୀ ସନ୍ତୋଷ କୁମାର ପଣ୍ଡା ଓ ତାଙ୍କର ସହକର୍ମୀ ଖଣ୍ଡଗିରି ସ୍ଥିତ ଓଡ଼ିଶା ହୋଟେଲରେ କର୍ମଚାରୀ ହୋଇଥିବା ବେଳେ ସେମାନେ କଳିଙ୍ଗ ବିହାର ସ୍ଥିତ ଉପରୋକ୍ତ ଠିକଣାରେ ରହୁଥିଲେ । ଅଭିଯୁକ୍ତ ଦିଲୀପ୍ ମଧ୍ୟ ଉକ୍ତ ହୋଟେଲର ଅନ୍ୟତମ କର୍ମଚାରୀ ଓ ସେ ୧୦ ଦିନ ପୂର୍ବରୁ ଚାକିରି ଛାଡି ଦେଇଥିଲା । ଅଭିଯୋଗକାରୀ ତାଙ୍କର ସ୍କୁଟି ଓ ତାର ଚାବି ରଖିଥିବା ସ୍ଥାନ ବିଷୟରେ ଅଭିଯୁକ୍ତ ପୂର୍ବରୁ ଅବଗତ ଥିଲା । ଏହାର ସୁଯୋଗ ନେଇ ଗତ ୧୪ ତାରିଖ ସକାଳ ସମୟରେ ଅଭିଯୋଗକାରୀଙ୍କ ଘରେ ପଶି ସେଠାରୁ ତାଙ୍କ ସ୍କୁଟିକୁ ଚୋରି କରି ନେଇଯାଇଥିଲା । ଏନେଇ ସେ ତମାଣ୍ଡୋ ଥାନାରେ ଅଭିଯୋଗ କରିବା ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଲୁଟେରାକୁ ଗିରଫ କରି ତାଠାରୁ ସ୍କୁଟିକୁ ଜବତ କରିଛି ।
