ଯୁବକଙ୍କ ଗଳା ଚିପି ହତ୍ୟା ଉଦ୍ୟମ; ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୬ା୧୧ : ପୂର୍ବ ଝଗଡାକୁ ନେଇ ଜଣେ ଏନଜିଓ ଅଫିସର କର୍ମଚାରୀଙ୍କୁ ବେକରେ ଗାମୁଛା ପକାଇ ଗଳା ଚିପି ହତ୍ୟା ଉଦ୍ୟମ । ଏନେଇ ଥାନାରେ ଅଭିଯୋଗ ପରେ ତମାଣ୍ଡୋ ଥାନା ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ହେଲା, ଜଟଣୀ କଣ୍ଟିଆ ଅଞ୍ଚଳର ବିଷ୍ଠୁ ପ୍ରସାଦ ଜେନା ।
ସୂଚନା ଯୋଗ୍ୟଯେ, ଅଭିଯୋଗକାରୀ ନିମାଇଁ ଚରଣ ସ୍ୱାଇଁ ତମାଣ୍ଡୋ ଥାନା ଅଧିନ କଳିଙ୍ଗ ବିହାର ଅଞ୍ଚଳରେ ଥିବା ଏକ ଏନଜିଓ ଅଫିସରେ ଦୀର୍ଘ ଦିନ ହେବ କାର୍ଯ୍ୟ କରିଆସୁଥିବା ବେଳେ, ଅଭିଯୁକ୍ତ ଜଣକ ଏକ ନବ ନିର୍ମିତ ଦଳୀୟ ଅଫିସ କରିଛନ୍ତି । ଅଭିଯୋଗକାରୀଙ୍କର ଏନଜିଓ ମାଲିକଙ୍କ ସହିତ ଉତ୍ତମ ସମ୍ପର୍କ ଥିବାରୁ ଅଭିଯୁକ୍ତ ଜଣକ ଇର୍ଷା କରୁଥିଲେ ଓ ଏଥି ପାଇଁ ଉଭୟେ ନିମାଇଁ ଓ ଅଭିଯୁକ୍ତ ବିଷ୍ଠୁଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଗତ ମାସ ୧୬ ତାରିଖ ସନ୍ଧ୍ୟା ୭ଟା ୩୦ ସମୟରେ ଅଭିଯୋଗକାରୀ ଅଫିସ କମ୍ପୁଟରରେ କିଛି କାମ କରୁଥିବା ସମୟରେ ଅଭିଯୁକ୍ତ ନିଶାସକ୍ତ ଅବସ୍ଥାରେ ସେଠାରେ ପହଞ୍ଚିଥିଲେ ଓ ଅଫିସରେ ନିମାଇଁଙ୍କୁ ଏକାକୀ ଥିବାର ଦେଖି ଏକ କପଡାରେ ପଛପଟରୁ ତାଙ୍କ ଗଳା ଚିପି ହତ୍ୟା କରିବାକୁ ପ୍ରୟାସ କରିଥିଲେ । ଏଥିରେ ନିମାଇଁ ଅଣନିଶ୍ୱାସୀ ହୋଇପଡ଼ିଥିବା ବେଳେ, କୌଶଳ କ୍ରମେ ଖସି ଯାଇ ନିଜ ଜୀବନ ବଞ୍ଚାଇବାକୁ ପ୍ରୟାସ କରିଥିଲେ । ସେହି ସମୟରେ ଅଭିଯୁକ୍ତ ଜଣକ ନିମାଇଁଙ୍କର ହାତକୁ କାମୁଡ଼ି ଦେଇଥିଲେ ଓ ତାଙ୍କର ପକେଟରୁ ଏକ ମୋବାଇଲ ନେଇଥିଲେ । ଏତିକି ବେଳେ, ସହାୟତା ପାଇଁ ନିମାଇଁ ସ୍ଥାନୀୟ ଦୋକାନୀ ମାନଙ୍କୁ ଡାକିବାରୁ ଅଭିଯୁକ୍ତ ଜଣକ ସେମାନଙ୍କୁ ମଧ୍ୟ ସାହାର୍ଯ୍ୟ କରିବା ଠାରୁ ଦୁରେଇ ରହିବାକୁ ଧମକ ଦେଇ ସେଠାରୁ ଚାଲିଯାଇଥିଲା । ଏନେଇ ଅଭିଯୋଗକାରୀ ତମାଣ୍ଡୋ ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ଆଜି ଅଭିଯୁକ୍ତକୁ ଗିରଫ କରିଛି ।
