ବରିଷ୍ଠ ନାଗରିକ ମଞ୍ଚର ଜରୁରୀ ବୈଠକ:  ବରିଷ୍ଠ ନାଗରିକଙ୍କ ସମସ୍ୟା ସମାଧାନ ପାଇଁ ଦାବି

 ବାଲେଶ୍ୱର: ଜିଲ୍ଲା ବରିଷ୍ଠ ନାଗରିକ ମଞ୍ଚର ଏକ ଜରୁରୀ ବୈଠକ ମଞ୍ଚର ଜିଲ୍ଲା କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି । ମଞ୍ଚର ସଭାପତି ବୈଦ୍ୟନାଥ ଷଡ଼ଙ୍ଗୀ ଏହି ବୈଠକରେ ଅଧ୍ୟକ୍ଷତା କରିଥିଲେ । ସାଧାରଣ ସମ୍ପାଦକ ଦାମୋଦର ନାୟକ ଗତ ବୈଠକର ବିବରଣୀ ପାଠ କରିବା ସହ ଆଲୋଚ୍ୟ ବିଷୟ ଆଗତ କରିଥିଲେ । ବରିଷ୍ଠ ନାଗରିକ ଓ ଦିବ୍ୟାଙ୍ଗ ପ୍ରଭୃତି ନିର୍ଯାତିତ ବ୍ୟକ୍ତିମାନଙ୍କ  ପାଇଁ ସରକାରଙ୍କ ଦ୍ୱାରା ମଞ୍ଜୁରୀପ୍ରାପ୍ତ ବହୁମୁଖୀ ଭିତ୍ତିଭୂମି ପ୍ରକଳ୍ପ (ଆଇଆଇସି)ର ନିର୍ମାଣ କାର୍ଯ୍ୟ ଦୀର୍ଘ ବର୍ଷ ପରେ ବି ଜିଲ୍ଲାରେ ହୋଇପାରୁ ନଥିବାରୁ ଉପସ୍ଥିତ ସଦସ୍ୟମାନେ ଉଦ୍ବେଗ ପ୍ରକାଶ କରିଥିଲେ । ପୂର୍ବରୁ ଚିହ୍ନଟ କରାଯାଇଥିବା ବାଲେଶ୍ୱର ସହର ସନ୍ନିକଟ ଦହପଡ଼ା ମୌଜାରେ ଏହି ପ୍ରକଳ୍ପର ନିର୍ମାଣ କାର୍ଯ୍ୟାରମ୍ଭ ପାଇଁ ମଞ୍ଚ ପକ୍ଷରୁ ଦାବି କରାଯାଇଛି । ରାଜ୍ୟ ସରକାରଙ୍କ ପକ୍ଷରୁ ୮୦ବର୍ଷରୁ ଊଦ୍ଧ୍ୱର୍ ବରିଷ୍ଠ ନାଗରିକ ଓ ୮୦ପ୍ରତିଶତ ଭିନ୍ନକ୍ଷମ ବ୍ୟକ୍ତିମାନଙ୍କୁ ମାସିକ ୩ ହଜାର ୫ଶହ ଟଙ୍କା ଭତ୍ତା ଦେବା ନିଷ୍ପତ୍ତି ଜିଲ୍ଲାରେ କାର୍ଯ୍ୟକାରୀ ନ ହେବାରୁ ବିଭିନ୍ନ ବ୍ଲକ୍ରେ ଏହି ବର୍ଗର ବରିଷ୍ଠ ବୃଦ୍ଧବୃଦ୍ଧାମାନେ ଧାରଣାରେ ବସିଛନ୍ତି । କିନ୍ତୁ ସେମାନଙ୍କୁ ଘୋଷିତ ବର୍ଦ୍ଧିତ ଭତ୍ତା ଅର୍ଥ ନ ଥିବା ଆଳରେ ଦିଆଯାଉନଥିବାର ପ୍ରଶାସନିକ ଅଧିକାରୀମାନେ କହୁଛନ୍ତି । ଏଥିପାଇଁ ଜିଲ୍ଲା ପ୍ରଶାସନ ତୁରନ୍ତ ଆବଶ୍ୟକୀୟ କାର୍ଯ୍ୟପନ୍ଥା ଗ୍ରହଣ କରିବାକୁ ବୈଠକରେ ଅନୁରୋଧ କରାଯାଇଛି । ସେହିପରି ଦେଶର ଜରୁରୀକାଳିନ ଅବସ୍ଥାରେ ମିଶା ଓ ଡିଆଇଆରରେ କାରାବରଣ କରିଥିବା ବ୍ୟକ୍ତିମାନଙ୍କୁ ରାଜ୍ୟ ସରକାର ମାସିକ ପେନ୍ସନ୍ ଦେବାକୁ ଘୋଷଣା କରିଥିଲେ । ରାଜ୍ୟରେ ୨୧ଜଣ ବ୍ୟକ୍ତିଙ୍କୁ ଏହି ପେନସନ୍ ଗତ ଜାନୁଆରୀ ମାସରୁ ପ୍ରଦାନ କରାଯାଉଥିଲେ ମଧ୍ୟ ବାଲେଶ୍ୱର ଜିଲ୍ଲାରେ ଉକ୍ତ ପେନସନ୍ ପାଇଁ ଆବେଦନ କରିଥିବା ମାତ୍ର ୩ଜଣ ବରିଷ୍ଠ ନାଗରିକଙ୍କୁ ଜିଲ୍ଲା ପ୍ରଶାସନ ରାଜ୍ୟ ସରକାରଙ୍କୁ ତଥ୍ୟ ପ୍ରଦାନ କରିନଥିବା କାରଣରୁ ସେମାନେ ଏହି ସୁଯୋଗରୁ ବଞ୍ଚôତ ହୋଇଛନ୍ତି । ତେଣୁ ଏଥିପାଇଁ ତ୍ୱରିତ କାର୍ଯ୍ୟାନୁଷ୍ଠାନ ନିମିତ୍ତ ବାଲେଶ୍ୱର ଜିଲ୍ଲା ପ୍ରଶାସନ ଓ ପୋଲିସ୍ ପ୍ରଶାସନକୁ ବୈଠକରେ ନିବେଦନ କରାଯାଇଛି । ସେହିପରି ଅସହାୟ ବରିଷ୍ଠ ନାଗରିକମାନଙ୍କୁ ସ୍ଥାନୀୟ ପୁଲିସ୍ ପରିଚୟ ପତ୍ର ପ୍ରଦାନ କରାଯିବା ପାଇଁ ଦାବି କରାଯାଇଛି । ଏହି ବୈଠକରେ ମଞ୍ଚର କର୍ମକର୍ତ୍ତା ସର୍ବଶ୍ରୀ କମଳାକାନ୍ତ ବେହେରା, ଶରତ ଚନ୍ଦ୍ର ଦାଶ, ଗିରୀଶ ଚନ୍ଦ୍ର ଦାଶ, ଗୋପୀନାଥ ଦାସ, ସୀତାରାମ ପ୍ରଧାନ, ବେଣୁଧର ସାହୁ, ଲକ୍ଷ୍ମୀନାରାୟଣ ଘୋଷ, ଡ. ପଦ୍ମଲୋଚନ ପାତ୍ର, ବିଷ୍ଣୁ ମହାନ୍ତି, ଡ. ଗୋବିନ୍ଦ ଚନ୍ଦ୍ର ବିଶ୍ୱାଳ ଓ ଶ୍ୟାମସୁନ୍ଦର ଜେନା ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ଗୌରାଙ୍ଗ ପାଣିଗ୍ରାହୀ ସମସ୍ତଙ୍କୁ ଧନ୍ୟବାଦ ପ୍ରଦାନ କରିଥିଲେ ।