ବିଧାନସଭାରେ ଉଠିଲା ବିଶୁଦ୍ଧ ପାନୀୟଜଳ ଯୋଗାଣ ପ୍ରସଙ୍ଗ
Rasmita Behera
ବାଲେଶ୍ୱର: ବାଲେଶ୍ୱର ସହରରେ ଅମୃତ ଯୋଜନା ମାଧ୍ୟମରେ ପ୍ରତ୍ୟେକ ଘରକୁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଥିଲେ ବି ଏହାର ସୁଫଳତା ଜଣସାଧାରଣଙ୍କ ନିକଟରେ ପହଞ୍ଚô ପାରିନାହିଁ । ଆଗାମୀ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ବାଲେଶ୍ୱର ପୌରପରିଷଦର ସମସ୍ତ ୱାର୍ଡବାସୀ ନିରବଚ୍ଛିନ୍ନ ପାନୀୟ ଜଳ ପାଇବା ଦିଗରେ ଜନ ସ୍ୱାସ୍ଥ୍ୟ ବିଭାଗର ପ୍ରସ୍ତୁତି ସମ୍ପର୍କରେ ବିଧାନସଭାରେ ପ୍ରଶ୍ନ ଉଠାଇଛନ୍ତି ବିଧାୟକ ମାନସ କୁମାର ଦତ୍ତ । ଏ ନେଇ ପ୍ରସ୍ତାବିତ ପ୍ରକଳ୍ପ ଏବଂ ପାନୀୟ ଜଳ ଯୋଗାଣ ପାଇଁ ହାତକୁ ନିଆଯାଇଥିବା ପଦକ୍ଷେପ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ପ୍ରଦାନ ପାଇଁ ବିଧାୟକ ଶ୍ରୀ ଦତ୍ତ ଅନୁରୋଧ କରିଥିଲେ । ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର ଏହାର ଉତ୍ତରରେ କହିଥିଲେ ଯେ, ବାଲେଶ୍ୱର ସହରର ଦୈନିକ ୨୩.୨୩ ନିୟୁତ ଲିଟର ପାନୀୟଜଳ ଆବଶ୍ୟକ ଥିବା ସ୍ଥଳେ ସମ୍ପ୍ରତି ୨୪.୧୫ ନିୟୁତ ଲିଟର ପାନୀୟ ଜଳ ଯୋଗାଇ ଦିଆଯାଉଛି । ପୌରପରିଷଦ ଅଞ୍ଚଳର ସମସ୍ତ ୩୧ଟି ୱାର୍ଡବାସୀଙ୍କୁ ପାଇପ ଲାଇନ୍ ଦ୍ୱାରା ପାଣି ଯୋଗାଇ ଦିଆଯାଉଛି ଏବଂ ପାଇପ ଲାଇନ ନଥିବା ସ୍ଥାନରେ ପାଇପ ବିଛାଇବା ପାଇଁ ଅମୃତ ଓ ବସୁଧା ଯୋଜନା ମାଧ୍ୟମରେ ୧୫୦.୯୬ କୋଟି ଟଙ୍କାର ୧୦ଗୋଟି ପ୍ରକଳ୍ପ କାର୍ଯ୍ୟ ଜାରି ରହିଛି । ବାଲେଶ୍ୱର ସହରରେ ଚଳିତ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଜଳକ୍ଲିଷ୍ଟ ଅଞ୍ଚଳରେ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇବା ପାଇଁ ବ୍ୟବସ୍ଥା କରାଯାଇଛି । ସେହିପରି ସହରରେ କାର୍ଯ୍ୟକ୍ଷମ ସମସ୍ତ ନଳକୂପଗୁଡିକୁ ସଚଳ ରଖିବା ପାଇଁ ଆବଶ୍ୟକୀୟ ଯନ୍ତ୍ରାଂଶ ଗଚ୍ଛିତ ରଖାଯାଇଛି । ବାଲେଶ୍ୱର ସହରରେ ସମ୍ପ୍ରତି ୨ଟି ଟ୍ୟାଙ୍କର ନିଯୋଜିତ ସହ ୧୨ଟି ପିଭିସି ଟ୍ୟାଙ୍କ ମାଧ୍ୟମରେ ୨୨ ଓ ୨୩ନଂ ୱାର୍ଡÿରେ ଥିବା ଜଳକ୍ଲିଷ୍ଟ ଅଞ୍ଚଳର ପାନୀୟ ଜଳ ଯୋଗାଇ ଦିଆଯାଉଛି । ବସୁଧା ଯୋଜନା ଅନ୍ତର୍ଗତ ୩୬.୮୦କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରୀ ହେଉଥିବା ବେଳେ ଅମୃତ ଯୋଜନାରେ ୧୧୪.୧୬ କୋଟି ଟଙ୍କାର ପ୍ରକଳ୍ପ କାର୍ଯ୍ୟ ଜାରି ରହିଥିବା ମନ୍ତ୍ରୀ ଡାକ୍ତର ମହାପାତ୍ର ସୂଚନା ଦେଇଥିଲେ ।
