ମହିଳାଙ୍କୁ ଘରେ ପଶି କୁକର୍ମ ଉଦ୍ୟମ ; ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୨୧ା୫ : ସ୍ୱାମୀ ନଥିବା ବେଳେ ରାତିରେ ଘରେ ପଶି ମହିଳାଙ୍କୁ କୁକର୍ମ ଉଦ୍ୟମ । ପାଟି କରିବାରୁ ପଡୋଶୀ ଓ ସାହି ପଡିଶା ଲୋକେ ଦୌଡ଼ି ଆସି ଅଭିଯୁକ୍ତକୁ କାବୁ କରିବା ସହ ମହିଳାଙ୍କୁ ଉଦ୍ଧାର କରିଥିଲେ । ଏନେଇ ଖାରବେଳନଗର ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ଆଜି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ହେଲା ଖାରବେଳନଗର ମସଜିଦ୍ କଲୋନୀର ଏସ.କେ ରାମଜାନ୍ ଅଲ୍ଲୀ ।
ସୂଚନାଯୋଗ୍ୟଯେ, ଅଭିଯୋଗକାରିଣୀ ସ୍ୱାମୀ ଓ ଦୁଇ ସନ୍ତାନଙ୍କ ସହିତ ଖାରବେଳନଗର ଅଞ୍ଚଳରେ ରୁହନ୍ତି । ଅଭିଯୋଗକାରିଣୀଙ୍କ ସ୍ୱାମୀ ହେଉଛନ୍ତି ଜଣେ ଡ୍ରାଇଭର । ସେ ପ୍ରାୟ ସମୟ ବିଳମ୍ବିତ ରାତିରେ ଘରକୁ ଫେରିଥାନ୍ତି । ଏଣୁ ଅଭିଯୋଗକାରିଣୀ ପ୍ରତିଦିନ ଭଳି ରାତିରେ ଘରର କବାଟ ଖୋଲା ରଖି ଶୋଇଥାନ୍ତି । ସବୁଦିନ ଭଳି ଗତ ୧୮ ତାରିଖ ରାତିରେ ମଧ୍ୟ ସ୍ୱାମୀ ଘରକୁ ଆସିନଥିବାରୁ ସେ ଘରର କବାଟ ଖୋଲା ରଖି ଶୋଇଥିଲେ । ଏହାର ସୁଯୋଗ ନେଇ ଅଭିଯୁକ୍ତ ଜଣକ ଘରେ ପଶି ମହିଳାଙ୍କୁ ଶୋଇଥିବା ସମୟରେ ଉପରେ ମାଡି ବସି ଯୋର ଜବରଜସ୍ତ କୁକର୍ମ କରିବା ଲାଗି ପ୍ରୟାସ କରିଥିଲା । ଏହି ସମୟରେ ଅଭିଯୋଗକାରିଣୀଙ୍କ ନିଦ ଭାଙ୍ଗି ଯିବାରୁ ସେ ବଡ଼ପାଟି କରି ସାହି ପଡ଼ିଶା ଲୋକଙ୍କୁ ଡାକ ପକାଇଥିଲେ । ମହିଳାଙ୍କ ପାଟି ଶୁଣି ପାଖ ପଡୋଶୀ ଲୋକେ ଦୌଡି ଆସି ଅଭିଯୁକ୍ତ କବଳରୁ ମହିଳାଙ୍କୁ ଉଦ୍ଧାର କରିବା ସହ ଅଭିଯୁକ୍ତକୁ କାବୁ କରି ପରେ ଆପୋଷ ସମାଧାନ କରିବାକୁ ଚେଷ୍ଟା କରିଥିଲେ । ହେଲେ ଅଭିଯୁକ୍ତ ଜଣକ ଆଉ ଲୋକଙ୍କୁ ଧରାଛୁଆଁ ଦେଇନଥିଲା । ଫଳରେ ଏନେଇ ଅଭିଯୋଗକାରିଣୀ ଖାରବେଳନଗର ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଅଭିଯୁକ୍ତକୁ ମସଜିଦ୍ କଲୋନୀରୁ ଗିରଫ କରାଯାଇଛି ।
