ମୁ୍ୟଜିକ୍ ନ ବଜାଇବାରୁ ଆକ୍ରମଣ ; ୫ ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୦୬ା୬ : ଶିଖରଚଣ୍ଡୀ ପାହାଡରେ ଅସମାଜିକ ଓ ମଦୁଆଙ୍କ ଆତଙ୍କରାଜ୍ । ପାହାଡକୁ ଭୋଜି କରିବାକୁ ଆସୁଥିବା ପର୍ଯ୍ୟଟକ ଓ ଯୁବକ ଯୁବତୀଙ୍କୁ ଆକ୍ରମଣ କରିବା ସହ ହେଉଛି ଅସଦାଚରଣ । ଯାହାକୁ ନେଇ ଇନଫୋସିଟି ଥାନାରେ ହେଉଛି ବାରମ୍ବାର ଅଭିଯୋଗ । ସେହିଭଳି ଗତକାଲି ମଧ୍ୟ ଏକ କମ୍ପାନୀର କର୍ମଚାରୀ ମାନେ ଶିଖରଚଣ୍ଡୀ ପାହାଡରେ ଶାନ୍ତିପୂର୍ଣ୍ଣ ଭାବେ ଭୋଜି କରୁଥିଲେ । ଏହି ସମୟରେ କିଛି ମଦ୍ୟପ ସେଠାରେ ପହଞ୍ଚି ଡ଼ିଜେ ମୁ୍ୟଜିକ୍ ବଜାଇବାକୁ କହିଥିଲେ । ହେଲେ ଏମାନେ ମନା କରିବାରୁ ଅଭିଯୁକ୍ତ ମାନେ ଯୁବକ ଓ ଯୁବତୀ ମାନଙ୍କୁ ମରଣାନ୍ତକ ଆକ୍ରମଣ କରିବା ସହ ଅସଦାଚରଣ କରିଥିଲେ । ଏନେଇ ଇନଫୋସିଟି ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ୨୬୦ରେ ମାମଲା ରୁଜୁକରି ତଦନ୍ତ ଚଳାଇ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ୫ ଅଭିଯୁକ୍ତ ହେଲେ, ପଟିଆ ଭୋଇ ସାହିର ଜଗଦିସ୍ ଆଚାର୍ଯ୍ୟ, ଲକ୍ଷ୍ମୀସାଗର ପୁରୁଣା ଷ୍ଟେସନ ବଜାରର ଗଣେଷ ବେହେରା, ଲକ୍ଷ୍ମୀସାଗର ଉପର ସାହିର ଆଶିଷ କୁମାର ଭୋଇ, ଲକ୍ଷ୍ମୀସାଗର ଲେଙ୍କା ସାହିର ଧର୍ମେନ୍ଦ୍ର ପ୍ରଧାନ, ଓ ରୋଷନ ଭୋଇ । ପରେ ସମସ୍ତଙ୍କୁ ଦଫା ୩୪୧, ୨୯୪, ୩୨୩, ୩୫୪, ୫୦୬, ୩୪ ଆଇପିସି ଧାରାରେ କୋର୍ଟ ଚାଲାଣ କରିଛି ।
ସୂଚନାଯୋଗ୍ୟଯେ, ବୁଧବାର ଦିନ ଅଭିଯୋଗକାରିଣୀ ଓ ତାଙ୍କର ଅଫିସ ସହକର୍ମୀ ମାନେ ଶିଖରଚଣ୍ଡୀ ପାହାଡରେ ଏକ ଭୋଜିର ଆୟୋଜନ କରିଥିଲେ । ପରେ ଶାନ୍ତିପୂର୍ଣ୍ଣ ଭାବେ ଭୋଜି ସାରିବା ବେଳେ ସେଠାରେ କିଛି ଅସମାଜିକ ଓ ମଦୁଆ ଯୁବକମାନେ ପହଞ୍ଚି ଡ଼ିଜେ ମୁ୍ୟଜିକ୍ ବଜାଇବାକୁ କହିଥିଲେ । ହେଲେ ଅଭିଯୋଗକାରିଣୀ ଓ ତାଙ୍କର ସହଯୋଗୀ ମାନେ ମନା କରିଦେଇଥିଲେ । ମନା କରିବାକୁ ନେଇ ଅଭିଯୁକ୍ତ ମାନେ ରାଗିଯାଇ ଅଭିଯୋଗକାରିଣୀ ଓ ତାଙ୍କର ସହଯୋଗୀ ମାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ଏନେଇ ଅଭିଯୋଗକାରିଣୀ ଇନଫୋସିଟି ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ୫ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି ।
