ସମୟକୁ ଅପେକ୍ଷା

ସମୟକୁ ଅପେକ୍ଷା
ଆଜ୍ଞା ନମସ୍କାର,
କୌଣସି ନା କୌଣସି ପ୍ରସଙ୍ଗ ନେଇ ଆମ ମନ ଭିତରେ ଆନେ୍ଦାଳନ ସୃଷ୍ଟି ହୁଏ । କେହି ନ ଜାଣିଲେ ବି, ଗୋଟିଏ ପ୍ରସଙ୍ଗକୁ ନେଇ ନିଜ ମନ ଭିତରେ ନିଜ ପାଇଁ ସନ୍ତୋଷଜନକ କିମ୍ବା ଅପ୍ରୀତିକର ପରିସ୍ଥିତିଟି ସୃଷ୍ଟି ହୁଏ । 
ଜୀବନର ଅନେକ ପରିସ୍ଥିତି ନିଜ ନିୟନ୍ତ୍ରଣରେ ନଥାଏ । ପ୍ରତ୍ୟେକ ମୁହୂର୍ତ୍ତରେ ମଣିଷ ପରିସ୍ଥିତିର ଦାସ । ସେଇ ପରିସ୍ଥିତିରେ ମଣିଷ ବଞ୍ଚିବାକୁ ବାଧ୍ୟ, ପରିସ୍ଥିତିର ଚାପରେ ମଣିଷ ମୁଣ୍ଡ ନୁଆଁଇବାକୁ ବାଧ୍ୟ । କେବଳ ନିଜ ଇଚ୍ଛାରେ ମଣିଷ କଦାପି ବଞ୍ଚିପାରିବ ନାହିଁ । ମଣିଷ ଯାହା ଇଚ୍ଛା ତାହା କଦାପି କରିପାରିବ ନାହିଁ । ମଣିଷ ପରିସ୍ଥିତିର ଦାସ ହୋଇଥିବାରୁ ଯେତେବେଳେ ଯାହା ଚାହିଁବ କରିଦେବ ନାହିଁ । 
ଜୀବନର ଅନେକ ସମୟରେ ପରିସ୍ଥିତି ବିିରୁଦ୍ଧରେ ସଂଗ୍ରାମ କରି ବିଜୟ ହାସଲ କରିବା ଅତିବ କଷ୍ଟ । ପରିସ୍ଥିତି ହେଉଛି ପ୍ରକୃତି । ଏହାରି ଉପରେ କାହାରି ନିୟନ୍ତ୍ରଣ ନଥାଏ । କିନ୍ତୁ ପ୍ରକୃତି ସବୁବେଳେ ସମାନ ନଥାଏ । ପ୍ରକୃତି ସମୟ ନେଇ ବଦଳେ ଏବଂ ବଦଳୁଥିବା ସମୟ ସବୁବେଳେ ଭଲ ନଥାଏ କି ଖରାପ ନଥାଏ । ସେଥିପାଇଁ ମଣିଷର ଧୈର୍ଯ୍ୟ ଆବଶ୍ୟକ । 
ସମୟ ସମୟରେ ଧୈର୍ଯ୍ୟହରା ମଣିଷ କିଛି ବି କରିପାରେ ନାହିଁ । ସଫଳତା ପାଇବାକୁ ହେଲେ ନିିଜର ବୁଦ୍ଧି, ସାହସ, ଧୈର୍ଯ୍ୟ-ଏସବୁ ସହିତ ସମୟକୁ ମଧ୍ୟ ଅପେକ୍ଷା କରିବାକୁ ହୁଏ । ବଡ଼ ବଡ଼ ସୈନ୍ୟବାହିନୀ, ଛୋଟ ଛୋଟ ସୈନ୍ୟବାହିିନୀ ଆଗରେ ପରାସ୍ତ ହୋଇଯାଇଥିବା ଅନେକ ଉଦାହରଣ ରହିଛି । ଏହା କେବଳ ସମୟ ଓ ପରିସ୍ଥିତି ପାଇଁ ହୁଏ । ପରିସ୍ଥିତି ବଦଳି ଗଲେ ସମୟ କାହା ପାଇଁ ଭଲ ହୁଏ ତ, କାହା ପାଇଁ ଖରାପ ହୁଏ । 
ତେବେ ପରିସ୍ଥିତିକୁ ଅପେକ୍ଷା କରି ମଣିଷ ନିଜର ଉଦ୍ୟମ ଓ ଚେଷ୍ଟାକୁ ବନ୍ଦ କରିଦେବା ଅନୁଚିତ । କେତେକ କ୍ଷେତ୍ରରେ ଉଦ୍ୟମ ଏବଂ ଚେଷ୍ଟା ଦ୍ୱାରା ପରିସ୍ଥିତି ବଦଳି ଯାଇପାରେ । କିନ୍ତୁ ଏହା ସବୁବେଳେ ବଦଳିଯିବ ବୋଲି ଭାବିବା ଠିକ୍ ନୁହେଁ । ସେଥିପାଇଁ ସବୁ ଶକ୍ତି ଉପରେ ସମୟ ହିଁ ବଳବାନ୍ ବୋଲି କୁହାଯାଇଥାଏ । ଅତଏବ ସବୁ ସମୟରେ, ସମୟକୁ ଅପେକ୍ଷା କରିବା ବଡ଼କଥା, ଧୈର୍ଯ୍ୟ ଧରିବା ବଡ଼କଥା । 
ପଢ଼ିଥିବା ହେତୁ ଆପଣଙ୍କ ନିକଟରେ କୃତଜ୍ଞ । ଆସନ୍ତୁ ପ୍ରତ୍ୟେକ ଦିନ ଆମେ "ଅମୃତ ବିନ୍ଦୁ' ମାଧ୍ୟମରେ ଜୀବନର କେତେ କଥା ବାବଦରେ ଜାଣିବା । ନମସ୍କାର ।