୩ ଲକ୍ଷ ଟଙ୍କା ଓ ସୁନାଗହଣା ଲୁଟି ନେଲେ ଦୁର୍ବୃତ୍ତ 

ତିହିଡି : ବନ୍ଧୁକ ଓ ଛୁରି ଦେଖାଇ ଗୃହକର୍ତ୍ତା ଓ ତାଙ୍କ ସ୍ତ୍ରୀଙ୍କୁ ଭୟଭୀତ କରିବା ସହିତ ନଗଦ ୩ ଲକ୍ଷ ଟଙ୍କା ଓ ପ୍ରାୟ ୧୫ ଲକ୍ଷ ଭଳି ଟଙ୍କାର ସୁନାଗହଣା ଦୁର୍ବୃର୍ତ୍ତମାନେ ଲୁଟି ନେଇଛନ୍ତି । ସୋମବାର ବିଳମ୍ବିତ ରାତିରେ ଏଭଳି ଅଭାବନୀୟ ଘଟଣା ଘଟିଛି ପୀରହାଟ ଥାନା ଅନ୍ତର୍ଗତ ସାହାପୁର ବଜାରରେ  । ଅଭିଯୋଗରୁ ପ୍ରକାଶ ଯେ, ବାମନବିନ୍ଧା ପଞ୍ଚାୟର ବିଲବାମନବିନ୍ଧା ଗାଁର ସ୍ୱର୍ଗତ ନିରଞ୍ଜନ ପାଢୀଙ୍କ ପୁଅ ଚିତ୍ତରଞ୍ଜନ ପାଢୀ ସାହାପୁର ବଜାରରେ ଥିବା ଘରେ ନିଜ ପରିବାର ଓ ମାଆଙ୍କ ସହ ରହୁଥିଲେ  । ସୋମବାର ରାତିରେ ସେମାନେ ସମସ୍ତେ ଖାଇପିଇ ଶୋଇଥିଲେ  । ତେବେ ବିଳମ୍ବିତ ରାତି ପ୍ରାୟ ୧ଟା ୩୦ ସମୟରେ ମୁହଁରେ କଳା କପଡା ବାନ୍ଧିଥିବା  ୬ ଜଣ ଦୁର୍ବୃର୍ତ୍ତ ଘରର ପଛପଟୁ ଏକ ଶିଢି ସହାୟତାରେ ଛାତକୁ ଚଢିବା ସହିତ ଶିଢିଘରର କବାଟ ଖିଡିକ ଭାଙ୍ଗି ଘର ଭିତରକୁ ପ୍ରବେଶ କରିଥିଲେ । ଚିତ୍ତରଞ୍ଜନ, ତାଙ୍କ ସ୍ତ୍ରୀ ଓ ପିଲା ଶୋଇଥିବା ଘରର କବାଟ ମୁକୁଳା ଥିବାରୁ ଦୁର୍ବୃର୍ତ୍ତ ମାନେ ପ୍ରଥମେ ସେଠାରେ ପ୍ରବେଶ କରିବା ସହିତ ସେମାନଙ୍କ ମୁହଁକୁ କପଡାରେ ବାନ୍ଧି ଦେଇଥିଲେ । ପରେ ସେମାନେ ପଲଙ୍କ ଉପରେ ଥିବା ଚିତ୍ତରଞ୍ଜନଙ୍କ ମୋବାଇଲକୁ ତଳେ କଚାଡି ଭାଙ୍ଗିଦେବା ସହିତ ତାଙ୍କ ସ୍ତ୍ରୀଙ୍କ ମୋବାଇଲକୁ ନେଇ ଯାଇଥିଲେ । ସେହିପରି ଜଣେ ଦୁର୍ବୃର୍ତ୍ତ ଚିତ୍ତରଞ୍ଜନଙ୍କ ଗୋଡକୁ ଏକ ରଡରେ ଆଘାତ କରିଥିଲେ । ଉଭୟ ସ୍ୱାମୀ ଓ ସ୍ତ୍ରୀଙ୍କ ବେକରେ ବନ୍ଧୁକ ଓ ଛୁରି ଲଗାଇ ସେମାନେ ଆଲମାରି ଚାବିକାଠି ମାଗିଥିଲେ  । ଡ୍ରେସିଂ ଟେବୁଲ ଡ୍ରୟାରରେ ଥିବା ଚାବିକାଠି ଥିବା ଜାଣିବା ପରେ ତାକୁ ନେଇ ଆଲମାରି ଖୋଲିବା ସହିତ ସେଠାରେ ଥିବା ନଗଦ ୩ ଲକ୍ଷ ଟଙ୍କା ଓ ସୁନାଗହଣା ଲୁଟି ନେଇଥିଲେ  । ପରେ ଚିତ୍ତରଞ୍ଜନଙ୍କ ସ୍ତ୍ରୀ ଶାନ୍ତିଲତା ପିନ୍ଧିଥିବା ସମସ୍ତ ସୁନା ଅଳଙ୍କାର ଲୁଟି ନେବା ସହିତ ତାଙ୍କ ମାଆ ବାସନ୍ତୀ ଶୋଇଥିବା ଘରକୁ ଯାଇଥିଲେ । ସେଠାକୁ ଯାଇ ତାଙ୍କ ପାଖରେ ଥିବା କିଛି ସୁନା ଗହଣା ନେଇଯିବା ସହିତ ସମସ୍ତଙ୍କୁ ସେହି ଘରେ ପୂରାଇ ବାହାର ପଟୁ କବାଟ ବନ୍ଦ କରି ଘଟଣାସ୍ଥଳରୁ ଫେରାର ହୋଇଯାଇଥିଲେ । ଦୁର୍ବୃର୍ତ୍ତ ମାନେ ଚାଲିଯିବା ପରେ ମାଆ ବାସନ୍ତୀ ନିଜ ମୋବାଇଲରେ ଘଟଣା ସମ୍ପର୍କରେ ନିକଟରେ ରହୁଥିବା ଦେଢଶୁର ଓ ଦିଅରଙ୍କୁ ଫୋନ କରି ଜଣାଇଥିଲେ । ସେମାନେ ଆସି କବାଟ ଖୋଲି ସମସ୍ତଙ୍କୁ ଉଦ୍ଧାର କରିଥିଲେ । ଚିତ୍ତରଞ୍ଜନ ରାତିରେ ଏ ସମ୍ପର୍କରେ ପୀରହାଟ ପୋଲିସକୁ ଜଣାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତନାଘନା କରିଥିଲେ । ଆଜି ଚିତ୍ତରଞ୍ଜନଙ୍କ ଲିଖିତ ଅଭିଯୋଗ ଆଧାରରେ ପୋଲିସ ଅପରାହ୍ଣରେ ସାଇଣ୍ଟଫିକ ଟିମ୍‌ ଓ କୁକୁର ସହିତ ଘଟଣାସ୍ଥଳକୁ ଯାଇ ତଦନ୍ତ କରିଥିବା ଜଣାଯାଇଛି  । ଏଥିନେଇ ପୋଲିସ ଏକ ମାମଲା ନଂ-୮୪/୨୫ ରୁଜୁ କରିଛି ।